ଆଳି,୨।୧୨ (ଡି.ଏନ୍.ଏ.): ସ୍ବାଧୀନତାର ୭୨ ବର୍ଷ ପରେ ବି କେନ୍ଦ୍ରାପଡ଼ା ଜିଲା ଆଳି ବ୍ଲକ ଅଧୀନ ପଦନୀପାଳ ପଞ୍ଚାୟତକୁ ଏ ପର୍ଯ୍ୟନ୍ତ ଗମନାଗମନ ଭଳି ମୌଳିକ ସୁବିଧା ଯୋଗାଇ ଦିଆଯାଇନାହିଁ। ଚତୁଃପାର୍ଶ୍ୱରେ ଖରସ୍ରୋତା ଓ କାଣୀନଦୀ ପ୍ରବାହିତ ହେଉଥିବାରୁ ପଞ୍ଚାୟତବାସୀ ବାହାରକୁ ଯିବା ପାଇଁ ହେଲେ ଡଙ୍ଗା ଉପରେ ନିର୍ଭର କରନ୍ତି। ଯାତାୟାତ ସୁବିଧା ନିମନ୍ତେ ପୋଲଟିଏ ନିର୍ମାଣ କରିବାକୁ ପଞ୍ଚାୟତବାସୀ ଦୀର୍ଘବର୍ଷ ଧରି ଦାବି କରି ଆସୁଥିଲେ ବି ଏଯାଏଁ ସରକାର ଏ ଦିଗରେ ପଦକ୍ଷେପ ନେଇନାହାନ୍ତି। ତେବେ ଗ୍ରାମବାସୀ କିଛିଦିନ ପୂର୍ବରୁ ନିଜ ଉଦ୍ୟମରେ ନଦୀ ମଧ୍ୟରେ ଏକ ବାଉଁଶ ପୋଲ ନିର୍ମାଣ କରିଥିଲେ। କିନ୍ତୁ ତାହା ନଷ୍ଟ ହୋଇଯିବା ପରେ ଗତ ଦୁଇ ମାସ ହେବ ପଞ୍ଚାୟତବାସୀ ପୁଣି ଚାନ୍ଦା ଆଦାୟ କରି ଖରସ୍ରୋତା ନଦୀ ଉପରେ ଏକ ସେତୁ ନିର୍ମାଣ କରୁଛନ୍ତି। ସେଠାକାର ଶତାଧିକ ଲୋକ ହାତରେ କୋଡି, କୋଦାଳ ଧରି ପୋଲ ନିର୍ମାଣ କାର୍ଯ୍ୟ କରୁଥିବା ଦେଖାଯାଉଛି॥
ପଞ୍ଚାୟତବାସୀଙ୍କ ଅଭିଯୋଗ ମୁତାବକ, ସରକାରଙ୍କଠାରୁ ବାରମ୍ବାର ମିଛ ପ୍ରତିଶ୍ରୁତି ପାଇବା ପରେ ଅଞ୍ଚଳବାସୀ ନିଜ ଉଦ୍ୟମରେ ପୋଲ ନିର୍ମାଣ କରୁଛନ୍ତି। ପୋଲଟିଏ ପାଇଁ ସ୍ଥାନୀୟ ଅଞ୍ଚଳର ଶିକ୍ଷାବିତ୍ ରବୀନ୍ଦ୍ର କୁମାର ଦାସ ମାନବାଧିକାର କମିଶନଙ୍କ ଦ୍ୱାରସ୍ଥ ହୋଇଥିଲେ। ଏହାପରେ ସେତୁ ନିର୍ମାଣ ନିମନ୍ତେ ଟେଣ୍ଡର ହୋଇଥିଲା। ୨୦୦୯ରେ ୯ କୋଟି ଟଙ୍କା ବ୍ୟୟରେ ସେତୁ ନିର୍ମାଣ ହେବ ବୋଲି ପ୍ରଥମ ଥର ପାଇଁ ଟେଣ୍ଡର ହୋଇଥିଲା। କିନ୍ତୁ ଏହାପରେ ବାରମ୍ବାର ଏହି ସେତୁ ନିର୍ମାଣ ନିମନ୍ତେ ଅଟକଳ ମୂଲ୍ୟ ବୃଦ୍ଧି ପାଇବାରେ ଲାଗିଛି, କିନ୍ତୁ ସେତୁ ନିର୍ମାଣର ଚିହ୍ନବର୍ଣ୍ଣ ନାହିଁ। ଅପରପକ୍ଷରେ ଉଚ୍ଚ ପଦସ୍ଥ ଅଧିକାରୀମାନେ ଗ୍ରାମକୁ ଆସି ଗ୍ରାମବାସୀଙ୍କୁ ପୋଲ ହେବା ନେଇ ମିଛ ପ୍ରତିଶ୍ରୁତି ଦେଇ ଫେରିଯାଉଛନ୍ତି। ବର୍ଷ ତମାମ ଡଙ୍ଗାରେ ବିପଦପୂର୍ଣ୍ଣ ଭାବେ ଯାତାୟାତ କରିବାକୁ ପଡ଼ୁଥିବାରୁ ଚାନ୍ଦା ଆଦାୟ କରି ପୋଲ ନିର୍ମାଣ କରୁଛୁ ବୋଲି ପଦନିପାଳ, କଳମଡ଼ା ଓ ଦୈତାରୀପୁର ଗ୍ରାମବାସୀ କହିଛନ୍ତି।
ଉକ୍ତ ପଞ୍ଚାୟତ ଅଧୀନରେ ୫ ହଜାରରୁ ଊର୍ଦ୍ଧ୍ୱ ଲୋକ ବସବାସ କରୁଛନ୍ତି। ମାତ୍ର ଗମନାଗମନ ଅସୁବିଧା ସହ ଶିକ୍ଷା, ସ୍ବାସ୍ଥ୍ୟ ଭଳି ମୌଳିକ ସୁବିଧାରୁ ମଧ୍ୟ ଲୋକେ ବଞ୍ଚତ୍ତ ହେଉଥିବା ଅଭିଯୋଗ ହୋଇଛି। ତେବେ ପଦନୀପାଳ ପଞ୍ଚାୟତକୁ ବାହ୍ୟଜଗତ ସହ ଯୋଡ଼ିବା ପାଇଁ ଏକ ସ୍ଥାୟୀ ପୋଲ ନିର୍ମାଣ ପାଇଁ ଗ୍ରାମର ବସନ୍ତ ମହାନ୍ତି, ଭାଗବତ ରାଉତ, ସୁଶାନ୍ତ ସାହୁ, ନିରଞ୍ଜନ ମଲିକ, ହରିଶ୍ଚନ୍ଦ୍ର ରାୟ, ବିଶ୍ୱଜିତ ପାତ୍ର, ସୌଭାଗ୍ୟ ରାଉତ, ଟୁଲୁ ଜେନା, ଗଗନ ଜେନା, ସ୍ବରାଜ ଜେନା, ଅନନ୍ତ ମଲିକ, ରଶ୍ମିରଞ୍ଜନ ମହାନ୍ତି, ସୁଧୀର ପାତ୍ର ଓ ଅଜୟ ପାତ୍ର ପ୍ରମୁଖ ଦାବି କରିଛନ୍ତି।
