ନୂଆଦିଲ୍ଲୀ,୮।୫(ପି.ଟି.): ବିନା ଅଧ୍ୟକ୍ଷ ଓ ସମ୍ପାଦକରେ ଦୁର୍ନୀତି କବଳିତ ଦିଲ୍ଲୀ ଓ ଡିଷ୍ଟ୍ରିକ୍ଟ କ୍ରିକେଟ ଆସୋସିଏଶନ (ଡିଡିସିଏ) କିପରି ଚାଲିବ ସେ ନେଇ ଭାରତୀୟ କ୍ରିକେଟ କେଣ୍ଟ୍ରାଲ ବୋର୍ଡ (ବିସିସିଆଇ) ଉପାୟ ଖୋଜିବା ଆରମ୍ଭ କରିଛି। ଡିଡିସିଏର ଅଧ୍ୟକ୍ଷ ପଦରେ କେହି ନ ଥିବା ବେଳେ ସମ୍ପାଦକ ଜେଲ୍ରେ ଅଛନ୍ତି। ତେଣୁ ଡିଡିସିଏର ପରିଚାଳନା ପାଇଁ ବିସିସିଆଇ ଏକ ଆଡ-ହକ୍ କମିଟି ଗଠନ କରିବ ବୋଲି କହିଛି।
ବିସିସିଆଇ ଡିଡିସିଏକୁ ବାର୍ଷିକ ଅନୁଦାନ ଦେବା ମଧ୍ୟ ବନ୍ଦ କରିଦେଇଛି। କିଛିଦିନ ତଳେ ଟେଲି- କନ୍ଫୋରେନ୍ସ ମାଧ୍ୟମରେ ଆପେକ୍ସ କାଉନସିଲ ସଦସ୍ୟମାନେ ଆହ-ହକ୍ କମିଟି ଗଠନ ନେଇ ଆଲୋଚନା କରିଥିଲେ। ଡିଡିସିଏରେ ଦୁର୍ନିୀତି ଚରମସୀମାରେ ପହଞ୍ଚିଛି। ତେଣୁ ଦୁର୍ନୀତିକୁ ରୋକିବା ଓ ଡିଡିସିଏର ପରିଚାଳନା ପାଇଁ ଏକ ଆଡ- ହକ୍ କମିଟିର ଆବଶ୍ୟକତା ରହିଛି ବୋଲି ବିସିସିଆଇର ଜଣେ ଅଧିକାରୀ କହିଛନ୍ତି। ବରିଷ୍ଠ ଖବରଦାତା ରଜତ ଶର୍ମା ଯେବେଠାରୁ ଇସ୍ଥଫା ଦେଲେଣି ସେବେଠାରୁ ଅଧ୍ୟକ୍ଷ ପଦ ଖାଲି ପଡିଛି। ସେହିପରି ସୀମା ଶୁଳ୍କ ଅଧିନୀୟମ ଉଲ୍ଲଂଘନ କରି ଡିଡିସିଏ ସାଧାରଣ ସମ୍ପାଦକ ବିନୋଦ ତିହାରା ମିରଟ ଜେଲରେ ରହିଛନ୍ତି। ପୁଣି ଡିଡିସିଏ ଆପେକ୍ସ କାଉନ୍ସିଲର ଅଧିକାଂଶ ସଦସ୍ୟଙ୍କୁ ଦୁର୍ନୀତି ଅଭିଯୋଗରେ ସସ୍ପେଣ୍ଡ କରାଯାଇଛି। ଏହକା ବାଦ୍ ଦେଲେ ଦିଲ୍ଲୀ ରଣଜୀ ଟିମ୍ ଚୟନରେ ବୟସ ଜାଲିଆତି କରାଯିବାର ମଧ୍ୟ ଅଭିଯୋଗ ହୋଇଛି। ଲକ୍ଡାଉନ୍ ପୂର୍ବରୁ କିମ୍ବା ପରେ ଏହି ଆଡ-ହକ୍ କମିଟି ଗଠନ କରାଯାଇପାରେ ବୋଲି ଆପେକ୍ସ କାଉନ୍ସିଲର ଜଣେ ସଦସ୍ୟ କହିଛନ୍ତି। କୋର୍ଟଙ୍କ ଦ୍ୱାରା ନିଯୁକ୍ତ ଜଣେ ପ୍ରଶାସକ ଯେପରି ଦାୟିତ୍ୱ ନ ନିଅନ୍ତି, ଏହାକୁ ଏଡାଇବା ପାଇଁ ଏହି ଆଡହକ୍ କମିଟି ଗଠନ ଉପରେ ବିସିସିଆଇ ଗୁରୁତ୍ୱ ଦେଉଛି।
