ନୂଆଦିଲ୍ଲୀ,୧୭ା୧୧(ଆଇଏଏନ୍ଏସ୍): ପାର୍ଲାମେଣ୍ଟର ଶୀତ ଅଧିବେଶନ ସୋମବାରଠାରୁ ଆରମ୍ଭ ହେଉଥିଲାବେଳେ ଏଥିରେ ସରକାର ବିବାଦୀୟ ନାଗରିକତ୍ୱ (ସଂଶୋଧନ) ବିଲ୍, ବ୍ୟକ୍ତିଗତ ଡାଟା ସୁରକ୍ଷା ବିଲ୍ ସମେତ ୩୫ଟି ବିଧେୟକ ଆଣିବାକୁ ଯାଉଛନ୍ତି। ଡିସେମ୍ବର ୧୩ରେ ଶେଷ ହେବାକୁ ଥିବା ଏହି ଅଧିବେଶନରେ ମୋଟ ୨୦ଟି କାର୍ଯ୍ୟଦିବସ ରହିଛି।
ନାଗରିକତ୍ୱ ଆଇନ, ୧୯୫୫ରେ ସଂଶୋଧନ କରି ଆଫଗାନିସ୍ତାନ, ବାଂଲାଦେଶ, ପାକିସ୍ତାନରୁ ଆସିଥିବା ବେଆଇନ ଦେଶାନ୍ତରୀ ହିନ୍ଦୁ, ଶିଖ୍, ବୌଦ୍ଧ ଧର୍ମାବଲମ୍ବୀ, ଜୈନ, ପାର୍ସି ଓ ଖ୍ରୀଷ୍ଟିଆନମାନଙ୍କୁ ଭାରତୀୟ ନାଗରିକତ୍ୱ ପ୍ରଦାନ ଲାଗି ସରକାର ବିଲ୍ ଆଣିବେ। ପଡୋଶୀ ଦେଶରୁ ଆସିଥିବା ଅଣମୁସଲମାନ ଦେଶାନ୍ତରୀଙ୍କୁ ନାଗରିକତ୍ୱ ପ୍ରଦାନ କରିବା ଭାଜପାର ମୁଖ୍ୟ ଏଜେଣ୍ଡା ଥିଲା। ନାଗରିକତ୍ୱ ଆଇନ, ୧୯୫୫ ଅନୁଯାୟୀ ଭାରତର ନାଗରିକତ୍ୱ ହାସଲ କରିବାକୁ ହେଲେ ଆବେଦନକାରୀ ଭାରତରେ ଶେଷ ୧୨ ମାସ ନିଶ୍ଚିତ ରହିବା ସହିତ ପୂର୍ବ ୧୪ ବର୍ଷରୁ ୧୧ ବର୍ଷ ରହିଥିବେ। ସଂଶୋଧିତ ବିଲ୍ରେ ଉକ୍ତ ୧୧ ବର୍ଷ ସମୟସୀମାକୁ ୬ ବର୍ଷକୁ ହ୍ରାସ କରାଯିବ ।
ପୂର୍ବର ନରେନ୍ଦ୍ର ମୋଦି ସରକାର ଏହି ବିଲ୍ ଆଣିଥିଲେ ହେଁ ବିରୋଧୀ ଦଳଗୁଡ଼ିକର ଜୋର୍ଦାର ପ୍ରତିବାଦ କାରଣରୁ ଅଟକି ରହିଥିଲା। ଲୋକ ସଭା ଭଙ୍ଗ ହେବାରୁ ଉକ୍ତ ବିଲ୍ ରଦ୍ଦ ହୋଇଯାଇଥିଲା। ଏହା ବ୍ୟତୀତ କର୍ପୋରେଟ ସଂସ୍ଥାଗୁଡ଼ିକ ପରିଚାଳନା କରୁଥିବା ଉପଭୋକ୍ତା ତଥ୍ୟ ଉପରେ କଟକଣା ଲାଗୁ କରିବା ଲାଗି ବ୍ୟକ୍ତିଗତ ଡାଟା ସୁରକ୍ଷା ବିଲ୍ ଅଣାଯିବ। ସେହିପରି ଇ-ସିଗାରେଟ ଉତ୍ପାଦନ ଓ ବିକ୍ରି ନିଷିଦ୍ଧ ଲାଗି ସରକାର ଗତ ସେପ୍ଟେମ୍ବରରେ ଅଧ୍ୟାଦେଶ ଆଣିଥିଲେ। ଏହା ବଦଳରେ ଆଇନ ଆଣିବା ଲାଗି ଶୀତ ଅଧିବେଶନରେ ବିଲ୍ ଅଣାଯିବ। ଆସିବାକୁ ଥିବା ଅନ୍ୟ ଗୁରୁତ୍ୱପୂର୍ଣ୍ଣ ବିଲ୍ ମଧ୍ୟରେ ରହିଛି ଟ୍ରାନ୍ସଜେଣ୍ଡର (ଅଧିକାର ସୁରକ୍ଷା) ବିଲ୍, ଶିଳ୍ପ ସମ୍ପର୍କ କୋଡ୍ ବିଲ୍, ଟିକସ ଆଇନ ସଂଶୋଧନ ବିଲ୍, କମ୍ପାନୀ (ଦ୍ୱିତୀୟ ସଂଶୋଧନ) ବିଲ୍, ଚିଟ୍ଫଣ୍ଡ (ସଂଶୋଧନ) ବିଲ୍, ନ୍ୟାଶନାଲ କମିଶନ ଫର୍ ଇଣ୍ଡିଆନ ସିଷ୍ଟମ୍ ଅଫ୍ ମେଡିସିନ୍ ବିଲ୍, ୨୦୧୯, ସରୋଗେସି (ନିୟନ୍ତ୍ରଣ) ବିଲ୍ ଏବଂ ଜାଲିଆନାଓ୍ବାଲା ବାଗ୍ ଜାତୀୟ ସ୍ମାରକୀ (ସଂଶୋଧନ) ବିଲ୍।
ଶନିବାର ଲୋକ ସଭା ବାଚସ୍ପତି ଓମ୍ ବିର୍ଲା ଡାକିଥିବା ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବିଭିନ୍ନ ଦଳର ନେତା ଯୋଗଦେଇଥିଲେ। ଅନ୍ୟମାନଙ୍କ ମଧ୍ୟରେ ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲ୍ଲାଦ ଜୋଷୀ ଏବଂ ଅର୍ଜୁନ ରାମ ମେଘଓ୍ବାଲ ଉପସ୍ଥିତ ଥିଲେ। ସେହିପରି ଲୋକ ସଭାରେ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ, ତୃଣମୂଳ କଂଗ୍ରେସରୁ ସୁଦୀପ ବନ୍ଦୋପାଧ୍ୟାୟ, ଡିଏମ୍କେରୁ ଟି.ଆର୍. ବାଲୁ, ବିଏସ୍ପିରୁ ଡାନିସ୍ ଅଲିି ବୈଠକରେ ଯୋଗଦେଇଥିଲେ। ବିରୋଧୀ ଦଳଗୁଡ଼ିକ ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବା ଯୋଜନାରେ ଅଛନ୍ତି।
