ନୂଆଦିଲ୍ଲୀ,୧୫।୮: କୋହଲିଙ୍କ ଦମ୍ଦାର ଶତକୀୟ ଇନିଂସ ବଳରେ ଭାରତୀୟ ଦଳ ଓ୍ବେଷ୍ଟଇଣ୍ଡିଜ ବିପକ୍ଷ ୩ ମ୍ୟାଚ୍ ବିଶିଷ୍ଟ ସିରିଜ୍କୁ ୨-୦ ବ୍ୟବଧାନରେ ଜିତି ନେଇଛି। ଏହି ମ୍ୟାଚ୍ରେ ଭାରତୀୟ ଅଧିନାୟକ କ୍ୟାରିୟରର ୪୨ତମ ଶତକ ହାସଲ କରିଛନ୍ତି। ଏହା ସହିତ ସେ ଏକ ଦଶନ୍ଧିରେ ଅନ୍ତର୍ଜାତୀୟ କ୍ରିକେଟରେ ସର୍ବାଧିକ ରନ୍ କରିଥିବା ବ୍ୟାଟ୍ସମ୍ୟାନ ହୋଇପାରିଛନ୍ତି। ପୂର୍ବତନ ଅଷ୍ଟ୍ରେଲିଆନ ଅଧିନାୟକ ରିକି ପଣ୍ଟିଂ ୨୦୦୦ରୁ ୨୦୧୦ ମଧ୍ୟରେ ୧୮,୯୬୨ ରନ୍ କରିଥିଲେ। କୋହଲି ୩ ଫର୍ମାଟର ଅନ୍ତର୍ଜାତୀୟ କ୍ରିକେଟରେ ଏପର୍ଯ୍ୟନ୍ତ ମୋଟ ୨୦,୫୦୨ ରନ୍ କରିଛନ୍ତି। ସେଥିମଧ୍ୟରୁ ଚଳିତ ଦଶନ୍ଧିର ୨୦,୦୧୮ ରନ୍ କରିଛନ୍ତି। ଗୋଟିଏ ଦଶନ୍ଧିରେ ୨୦ ହଜାର ରନ୍ କରିବାରେ ସେ ବିଶ୍ୱର ଏକମାତ୍ର ବ୍ୟାଟ୍ସମ୍ୟାନ ହୋଇପାରିଛନ୍ତି। ଏହି ତାଲିକାରେ ପଣ୍ଟିଂଙ୍କ ତଳକୁ ଦକ୍ଷିଣ ଆଫ୍ରିକାର କିମ୍ବଦନ୍ତୀ ଅଲରାଉଣ୍ଡର ଜ୍ୟାକ୍ସ କ୍ୟାଲିସ ୩ୟ ସ୍ଥାନରେ ରହିଛନ୍ତି। ସେ ଗତ ଦଶନ୍ଧିରେ ୧୬,୭୭୭ ରନ୍ କରିଥିଲେ। ଶ୍ରୀଲଙ୍କାର ମାହେଲା ଜୟବର୍ଦ୍ଧନେ ଓ କୁମାର ସଙ୍ଗକାରା ଯଥାକ୍ରମେ ୧୬,୩୦୪ ଓ ୧୫,୯୯୯ ରନ୍ ସହ ୪ର୍ଥ ଓ ୫ମ ସ୍ଥାନରେ ରହିଛନ୍ତି। ଭାରତର ସଚିନ ତେନ୍ଦୁଲକର (୧୫,୯୬୨) ୬ଷ୍ଠ ଓ ରାହୁଲ ଡ୍ରାଭିଡ୍ (୧୫,୮୫୩) ୭ମ ସ୍ଥାନରେ ରହିଛନ୍ତି। ଏହାବାଦ୍ ୩୦ ବର୍ଷୀୟ ବ୍ୟାଟ୍ସମ୍ୟାନ କୋହଲି ଏପର୍ଯ୍ୟନ୍ତ ୬୮ ଅନ୍ତର୍ଜାତୀୟ ଶତକ ଲଗାଇ ସାରିଛନ୍ତି। ସର୍ବକାଳୀନ ରେକର୍ଡ ଠାରୁ ସେ ଆଉ ୩୨ ଶତକ ପଛରେ ଅଛନ୍ତି। ଏହି ରେକର୍ଡ ଏବେ ସଚିନ ତେନ୍ଦୁଲକର(୧୦୦)ଙ୍କ ନାମରେ ରହିଛି।
