କଟକ ଅଫିସ,୨୬।୬: କଟକ ଏସ୍ସିବି ମେଡିକାଲ କଲେଜ ଏବଂ ହସ୍ପିଟାଲର ସମ୍ପ୍ରସାରଣ ଓ ଉନ୍ନତିକରଣ କାର୍ଯ୍ୟର ସମୀକ୍ଷା ବୈଠକ ଶୁକ୍ରବାର ଅନୁଷ୍ଠିତ ହୋଇଯାଇଛି। ମେଡିକାଲ କ୍ୟାମ୍ପସ ପରିସରରେ ରହିଥିବା ଆଉକିଛି ସରକାରୀ କ୍ବାର୍ଟର୍ସ ଖୁବଶୀଘ୍ର ଖାଲି କରାଯିବ। ଏଥିସହିତ ସମ୍ପ୍ରସାରଣ ପାଇଁ ବିଭିନ୍ନ ବିଭାଗ ଅଧୀନରେ ଥିବା କ୍ବାର୍ଟର୍ସକୁ ଆସନ୍ତା ଜୁଲାଇ ୭ ସୁଦ୍ଧା ଖାଲିକରିବା ଓ ଜବରଦଖଲ ଉଚ୍ଛେଦ କାର୍ଯ୍ୟକୁ ତ୍ୱରାନ୍ବିତ କରାଯିବା ଉପରେ କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତ(ଆର୍ଡିସି) ଅନିଲ କୁମାର ସାମଲ ସମ୍ପୃକ୍ତ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ଆର୍ଡିସି ସାମଲ ବଡ଼ ମେଡିକାଲ ସମ୍ପ୍ରସାରଣ ଅଗ୍ରଗତି କାର୍ଯ୍ୟରେ ସମୀକ୍ଷା କରିବା ସହିତ ଯେଉଁମାନେ ନିର୍ଦ୍ଧାରିତ ତାରିଖ ସୁଦ୍ଧା ଅଫିସ ଓ କ୍ୱାର୍ଟର୍ସ ଖାଲି ନ କରିବେ ସେମାନଙ୍କୁ ପାଣି ଓ ବିଦ୍ୟୁତ୍ ବନ୍ଦ କରିଦିଆଯିବ ବୋଲି ସେ କହିଥିଲେ। ସେହିପରି ସୁଇପର କଲୋନୀ ଓ ବେହେରା କଲୋନୀବାସୀଙ୍କ ସହିତ ଆଲୋଚନା କରି ଖୁବ୍ଶୀଘ୍ର ସେମାନଙ୍କୁ ପୁନର୍ବାସ ଓ ଥଇଥାନ କରାଯିବ। ବଡ ମେଡିକାଲ ସମ୍ପ୍ରସାରଣ କରାଯିବା ପରିପ୍ରେକ୍ଷୀରେ ଯେଉଁମାନେ ଅନଧିକାରଭାବେ ଜବରଦଖଲ କରି ରହିଛନ୍ତି ସେମାନଙ୍କୁ ସେହିସ୍ଥାନ ଖାଲିକରିବା ପାଇଁ କ୍ଷତିପୂରଣ ବାବଦରେ ସରକାରଙ୍କ ତରଫରୁ ୫୦ ହଜାର ଟଙ୍କା ଆର୍ଥିକ ସହାୟତା ଯୋଗାଇ ଦିଆଯାଉଥିବା ଜିଲାପାଳ ଭବାନୀ ଶଙ୍କର ଚୟନୀ ଏହି ସମୀକ୍ଷା ବୈଠକରେ ପ୍ରକାଶ କରିଥିଲେ। ଏସ୍ସିବି ମେଡିକାଲ ସମ୍ପ୍ରସାରଣ ନିମନ୍ତେ ମେଡିକାଲ ନିକଟ ତାଳଦଣ୍ଡା କେନାଲ ଉଭୟ ପାଶର୍ବ ରାସ୍ତା କାର୍ଯ୍ୟକୁ ତ୍ୱରାନ୍ବିତ ପାଇଁ ପୂର୍ତ୍ତ ଡିଭିଜନ ନଂ. ୧କୁ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି। ବୈଠକରେ ଅନ୍ୟମାନଙ୍କ ମଧ୍ୟରେ ସିଏମ୍ସି କମିଶନର ଅନନ୍ୟା ଦାସ, ପୂର୍ତ୍ତବିଭାଗ ଅଧ୍ୟକ୍ଷଣ ଯନ୍ତ୍ରୀ ତାରାପ୍ରସାଦ ମିଶ୍ର, ରାଜସ୍ବ ଆୟୁକ୍ତଙ୍କ ସଚିବ ଧନଞ୍ଜୟ ହେମ୍ରମ, ଅତିରିକ୍ତ ଜିଲାପାଳ ପୂର୍ଣ୍ଣଚନ୍ଦ୍ର ମିଶ୍ର, ପର୍ତ୍ତବିଭାଗ ନିର୍ବାହୀ ଯନ୍ତ୍ରୀ ଏମ. ଆର. ଖାନ୍ଙ୍କ ସମେତ ବିଭିନ୍ନ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ।
