Advertisement

ତଦନ୍ତ ଆଳରେ ରାଜକୋଷ ବରବାଦ: ୨୦ ବର୍ଷରେ ୨୭ ତଦନ୍ତ କମିଶନ

ଭୁବନେଶ୍ୱର,୨୭।୮(ବ୍ୟୁରୋ): ରାଜ୍ୟରେ ଘଟୁଥିବା ଗୁଳିକାଣ୍ଡ, ହତ୍ୟା, ବଳାତ୍କାର, ମଦ ମୃତ୍ୟୁ, ପୋଲିସ ନିର୍ଯାତନା, ସାମ୍ପ୍ରଦାୟିକ ହିଂସା ଆଦି ବିଭିନ୍ନ ସତ୍ୟାସତ୍ୟ ଜାଣିବା ଘଟଣା ପାଇଁ ରାଜ୍ୟ ସରକାର ବସାଉଛନ୍ତି ତଦନ୍ତ କମିଶନ। ବର୍ଷ ପରେ ବର୍ଷ ଗଡ଼ି ଚାଲିଛି। ଶେଷ ହେଉନି ତଦନ୍ତ। କମିଶନଗୁଡ଼ିକର ଅବଧି ତଦନ୍ତ ଆଳରେ ଲମ୍ବିଯାଉଛି। ରାଜ୍ୟ ରାଜକୋଷରୁ କୋଟି କୋଟି ଟଙ୍କା ପାଣି ଭଳି ବୋହି ଯାଉଛି। ଘଟଣାର ସତ୍ୟାସତ୍ୟ ପ୍ରକାଶ ପାଇବା ପୂର୍ବରୁ ଅନେକ ତଦନ୍ତ କମିଶନର ଘଟୁଛି ଅକାଳ ମୃତ୍ୟୁ। ଆଉ କେତେକ କମିଶନ ସରକାରଙ୍କ ନିକଟରେ ସେମାନଙ୍କ ରିପୋର୍ଟ ଦାଖଲ କରିଥିଲେ ମଧ୍ୟ କୌଣସି ଆଖିଦୃଶିଆ କାର୍ଯ୍ୟାନୁଷ୍ଠାନ ନିଆଯାଉନାହିଁ। ଏପରିକି ବହୁ ଅର୍ଥ ଶ୍ରାଦ୍ଧ କରି ବସାଯାଇଥିବା ତଦନ୍ତ କମିଶନ କି ରିପୋର୍ଟ ଦେଲେ ସର୍ବସାଧାରଣ ଜାଣିବା ପାଇଁ ବିଧାନସଭାରେ ମଧ୍ୟ ଉପସ୍ଥାପନ ହେଉନାହିଁ। ଘଟଣାର ଛାପ ଜନମାନସରୁ ଲିଭିଗଲା ପରେ କମିଶନ ରିପୋର୍ଟଗୁଡ଼ିକ ଆପେଆପେ ଫାଇଲ୍‌ରେ ଚାପି ହୋଇଯାଉଛି।
ଗୃହ ବିଭାଗରୁ ମିଳିଥିବା ସୂଚନା ଅନୁଯାୟୀ ଗତ ୨୦ ବର୍ଷ ମଧ୍ୟରେ ରାଜ୍ୟରେ ଘଟିଥିବା ବିଭିନ୍ନ ଘଟଣା ପାଇଁ ରାଜ୍ୟ ସରକାର ୨୭ଟି ବିଚାର ବିଭାଗୀୟ ତଦନ୍ତ କମିଶନ ବସାଇଛନ୍ତି। ସେହି କମିଶନଗୁଡ଼ିକର ପରିଚାଳନା ପାଇଁ ରାଜକୋଷରୁ ବ୍ୟୟ ହୋଇଛି ୯ କୋଟି ୨୨ ଲକ୍ଷ ୬୬ ହଜାର ୬୧ଟଙ୍କା। ୧୯୯୯ରେ ଜି.ଉଦୟଗିରି ଜେଲ ଭଙ୍ଗା ଘଟଣା ଓ ରଣଲଇ ସାମ୍ପ୍ରଦାୟିକ ହିଂସାକାଣ୍ଡର ତଦନ୍ତ କରିବା ପାଇଁ ଜଷ୍ଟିସ କେ. ସି. ଜଗଦେବରାୟ କମିଶନ ଗଠନ ହୋଇଥିଲା। ଏ ବାବଦରେ ୨୭ଲକ୍ଷ ୩୪ ହଜାର ୪୩୮ ଟଙ୍କା ବ୍ୟୟ କରାଯାଇଛି। ସେହି ବର୍ଷ ମେ ୨୯ ତାରିଖରେ ଘେରି ଭଙ୍ଗା ଉଚ୍ଛେଦକୁ ନେଇ ଚିଲିକାରେ ପୋଲିସ ଓ ମତ୍ସ୍ୟଜୀବୀଙ୍କ ମଧ୍ୟରେ ସଂଘର୍ଷ ହୋଇଥିଲା। ଏଥିରେ ଜଣେ ମହିଳାଙ୍କ ସମେତ ୪ଜଣ ମତ୍ସ୍ୟଜୀବୀ ପ୍ରାଣ ହରାଇଥିଲେ। ଏହି ଘଟଣାର ତଦନ୍ତ କରିଥିଲେ ଜଷ୍ଟିସ ପି. କେ. ତ୍ରିପାଠୀ କମିଶନ। ଏଥିପାଇଁ ଖର୍ଚ୍ଚ ହୋଇଛି ୧୭ଲକ୍ଷ ୭୨ହଜାର ଟଙ୍କା। ୨୦୦୦ରେ ବାଲେଶ୍ୱର ଡ୍ରଗ୍‌ ମାଫିଆ ଘଟଣାର ତଦନ୍ତ କରିଥିଲେ ଜଷ୍ଟିସ ପି. କେ. ମହାନ୍ତି କମିଶନ। ଏଥିପାଇଁ ଖର୍ଚ୍ଚ ହୋଇଛି ୧୧ ଲକ୍ଷ ୫୪ ହଜାର ଟଙ୍କା। ସେହି ବର୍ଷ ଏସ୍‌ସିବି ମେଡିକାଲ କଲେଜ ଓ ହସ୍ପିଟାଲ ପରିସରରେ ହୋଇଥିବା ହିଂସାକାଣ୍ଡ ଘଟଣାର ତଦନ୍ତ କରିଥିଲେ ଜଷ୍ଟିସ ପି. କେ. ମିଶ୍ର କମିଶନ। ଏ ବାବଦରେ ଖର୍ଚ୍ଚ ହୋଇଛି ୮ ଲକ୍ଷ ୭୧ ହଜାର ଟଙ୍କା। ୨୦୦୧ ନଭେମ୍ବର ୧୫ ତାରିଖରେ ପୁରୀରେ ପୋଲିସ ଏବଂ ଓକିଲଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା। ଏହି ଘଟଣାର ତଦନ୍ତ କରିଥିଲେ ଏ. କେ. ପରିଚ୍ଛା ଏବଂ ଏସ୍‌. କେ. ମିଶ୍ର କମିଶନ। ଏଥିପାଇଁ ଖର୍ଚ୍ଚ ହୋଇଛି ୪ ଲକ୍ଷ ୨ ହଜାର ଟଙ୍କା। ସେହିପରି ୨୦୦୧ ଡିସେମ୍ବର ୪ ତାରିଖରେ ନବରଙ୍ଗପୁର ଜିଲା ରଙ୍ଗବାଟି ଏବଂ ରାୟଘରଠାରେ ଘଟିଥିବା ଗୁଳିକାଣ୍ଡ ଘଟଣାର ତଦନ୍ତ କରିଥିଲେ ଜଷ୍ଟିସ ବାସୁଦେବ ପାଣିଗ୍ରାହୀ ଏବଂ କୋରାପୁଟ ଜିଲା ସେସନ୍ସ ଜଜ୍‌ କମିଶନ। ଏଥିପାଇଁ ଖର୍ଚ୍ଚ ହୋଇଛି ୧୪ ଲକ୍ଷ ୩୦ ହଜାର ୮୦୬ଟଙ୍କା। ୨୦୦୬ରେ ଶହୀଦନଗର ଥାନା ହାଜତରେ ଦିଲୀପ ସାହୁ ନାମକ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିଲା। ଏହି ଘଟଣାର ତଦନ୍ତ କରିଥିଲେ ଖୋର୍ଦ୍ଧା ଜିଲା ସେସନ୍ସ ଜଜ୍‌। ଏ ବାବଦରେ ଖର୍ଚ୍ଚ ହୋଇଛି ୩ ଲକ୍ଷ ୧୬ ହଜାର ୩୪୧ ଟଙ୍କା। ସେହି ବର୍ଷ ସମ୍ବଲପୁର ଜିଲା କୁଚିଣ୍ଡା ହାଜତରେ ଗଜେନ୍ଦ୍ର ମାଝି ନାମକ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିଲା। ଏହି ଘଟଣାର ତଦନ୍ତ କରିଥିଲେ ସମ୍ବଲପୁର ଜିଲା ସେସନ୍ସ ଜଜ୍‌। ଏଥିରେ ଖର୍ଚ୍ଚ ହୋଇଛି ୨ ଲକ୍ଷ ୧୦ ହଜାର ଟଙ୍କା। ସେହି ବର୍ଷ ଅନ୍ୟ ଏକ ଘଟଣାରେ କେନ୍ଦୁଝର ଜିଲା ଥାନା ସମ୍ମୁଖରେ ହୋଇଥିବା ଗୁଳିକାଣ୍ଡର ତଦନ୍ତ କରିଥିଲେ କେନ୍ଦୁଝର ଜିଲା ସେସନ୍ସ ଜଜ୍‌। ଏ ବାବଦରେ ଖର୍ଚ୍ଚ ହୋଇଛି ୧ ଲକ୍ଷ ୭୫ ହଜାର ଟଙ୍କା। ୨୦୦୬ କଳିଙ୍ଗନଗର ଗୁଳିକାଣ୍ଡ ଘଟଣାର ତଦନ୍ତ କରିଥିଲେ ଜଷ୍ଟିସ ଏ.ଏସ୍‌. ନାଇଡୁ, ଜଷ୍ଟିସ ପି. କେ. ପାତ୍ର ଏବଂ ଜଷ୍ଟିସ ପି. କେ. ମହାନ୍ତି କମିଶନ। ଏଥିପାଇଁ ଖର୍ଚ୍ଚ ହୋଇଛି ୪୫ ଲକ୍ଷ ୪୯ ହଜାର ୫୦୦ଟଙ୍କା। ଓଡ଼ିଶା ବିଧାନସଭା ନିଯୁକ୍ତିରେ ହୋଇଥିବା ଦୁର୍ନୀତିର ତଦନ୍ତ କରିଥିଲା ସଂସଦୀୟ ବ୍ୟାପାର ବିଭାଗ। ଏଥିପାଇଁ ଖର୍ଚ୍ଚ ହୋଇଥିଲା ୨୨ଲକ୍ଷ ୬୩ ହଜାର ୨୮୨ ଟଙ୍କା। ସେହିପରି ଗଞ୍ଜାମ ମଦ ମୃତ୍ୟୁ ଘଟଣାର ତଦନ୍ତ ପାଇଁ ଖର୍ଚ୍ଚ ହୋଇଛି ୨୦ ଲକ୍ଷ ୪୧ ହଜାର। ଖୋର୍ଦ୍ଧା ଜିଲା ବିଷାକ୍ତ ମଦ ମୃତ୍ୟୁ ଘଟଣା ତଦନ୍ତ ପାଇଁ ୮ ଲକ୍ଷ ୭୮ହଜାର, ୨୦୦୭ରେ କନ୍ଧମାଳ ଜିଲାର ବିଭିନ୍ନ ସ୍ଥାନରେ ହୋଇଥିବା ହିଂସାକାଣ୍ଡ ଘଟଣାର ତଦନ୍ତ ପାଇଁ ୫୩ ଲକ୍ଷ ୮୩ ହଜାର ୬୭ ଟଙ୍କା ବ୍ୟୟ କରାଯାଇଛି । ୨୦୦୮ରେ ସମ୍ବଲପୁର, ବ୍ରହ୍ମପୁର, ବାରିପଦା ଓ ଭୁବନେଶ୍ୱରଠାରେ ଏକ ସ୍ଥାୟୀ ବେଞ୍ଚ ସ୍ଥାପନ ସକାଶେ ବସିଥିବା ତଦନ୍ତ ପାଇଁ ୨୨ ଲକ୍ଷ ୫୫ ହଜାର ୪୦୦ ଟଙ୍କା ଏବଂ ୨୦୦୯ରେ ସ୍ବାମୀ ଲକ୍ଷ୍ମଣାନନ୍ଦ ସରସ୍ବତୀ ହତ୍ୟା ଘଟଣାର ତଦନ୍ତ ପାଇଁ ରାଜ୍ୟ ସରକାର ୩୨ ଲକ୍ଷ ୬୬ ହଜାର ୪୭୯ ଟଙ୍କା ଖର୍ଚ୍ଚ କରିଛନ୍ତି। ୨୦୦୯ରେ ଅନ୍ୟ ଏକ ଘଟଣାରେ ଢେଙ୍କାନାଳ ଭୁବନରେ ପୋଲିସ ଗୁଳିକାଣ୍ଡରେ ଦୁର୍ଯ୍ୟୋଧନ ମଲ୍ଲିକ ନାମକ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିଲା। ସେହି ବର୍ଷ ବଲାଙ୍ଗୀର ସହରରେ ପୋଲିସ ଭ୍ୟାନ ଧକ୍କାରେ ୨ ଜଣ ଇଞ୍ଜିନିୟରିଂ ଛାତ୍ରଙ୍କର ମୃତ୍ୟୁ ହୋଇଥିଲା। ଏହି ଘଟଣାର ତଦନ୍ତ ପାଇଁ ସରକାର ରାଜକୋଷରୁ ୧୧ ଲକ୍ଷ ୯୬ ହଜାର ୭୯୭ ଟଙ୍କା ଖର୍ଚ୍ଚ କରିଛନ୍ତି। ସେହିପରି ୨୦୧୦ରେ କଟକ ଜିଲା ବାଗଲପୁର ପୋଲିସ ଗୁଳିକାଣ୍ଡ ଘଟଣାର ତଦନ୍ତ ପାଇଁ ୩୧, ୬୧, ୩୯୧ ଟଙ୍କା ଖର୍ଚ୍ଚ ହୋଇଥିବା ବେଳେ ୨୦୧୧ରେ ରାଉରକେଲାଠାରେ ପୋଲିସ ଓ ବିଚାରପତି ବିବାଦ ମାମଲାରେ ୩୧,୦୬,୮୬୦ ଟଙ୍କା, ସେହିବର୍ଷ ନଭେମ୍ବର ୩୦ରେ ପୁରୀ ଜିଲା ଅର୍ଜୁନଗୋଦାଠାରେ ଏକ ବଳାତ୍କାର ମାମଲାରେ ସରକାର ତଦନ୍ତ କମିଶନ ବସାଇବା ବାବଦରେ ୩୫, ୩୦, ୮୧୮ଟଙ୍କା ଖର୍ଚ୍ଚ କରିଛନ୍ତି ।
ସେହିପରି ଚିଟ୍‌ଫଣ୍ଡ ତଦନ୍ତ ପାଇଁ ସରକାରୀ ତହବିଲରୁ ଖର୍ଚ୍ଚ ହୋଇଛି ୫,୫୫,୩୦,୯୬୯ ଟଙ୍କା। ୨୦୧୬ରେ କନ୍ଧମାଳ ଜିଲା ଗୁମୁଡ଼ିମାହା ପୋଲିସ ଗୁଳିକାଣ୍ଡ ଘଟଣାର ତଦନ୍ତ ପାଇଁ ୧, ୭୩, ୭୪୨ଟଙ୍କା, କୋରାପୁଟ ଜିଲା ନାବାଳିକା ବଳାତ୍କାର ଘଟଣାର ତଦନ୍ତ ପାଇଁ ୩୯, ୩୭୦ ଏବଂ ପୁରୀ ଶ୍ରୀଜଗନ୍ନାଥ ରତ୍ନଭଣ୍ଡାର ଚାବି ହଜିବା ଘଟଣାର ତଦନ୍ତ ପାଇଁ ରାଜକୋଷରୁ ୨୨, ୨୭, ୯୧୮ ଟଙ୍କା ଖର୍ଚ୍ଚ କରାଯାଇଛି। ତେବେ ଗଞ୍ଜାମ ଜିଲାର ଫାସିପଡ଼ା ପୋଲିସ ଗୁଳିକାଣ୍ଡ ଏବଂ ୨୦୧୭ ଅକ୍ଟୋବର ୧୦ ତାରିଖରେ ସମ୍‌ ହସ୍ପିଟାଲ ଅଗ୍ନିକାଣ୍ଡ ଘଟଣାରେ ସରକାର କିଛି ଖର୍ଚ୍ଚ କରି ନ ଥିବା କହିଛନ୍ତି। ଉକ୍ତ ତଦନ୍ତ କମିଶନ ମଧ୍ୟରୁ ମାତ୍ର ୮ଟି ଘଟଣାର ତଦନ୍ତ ରିପୋର୍ଟ ବିଧାନସଭାରେ ଉପସ୍ଥାପନ କରାଯାଇଥିବା ବେଳେ ଅନ୍ୟ କେତେକ ଘଟଣାର ସରକାର ପରୀକ୍ଷାନିରୀକ୍ଷା କରୁଛନ୍ତି ଓ ଆଉ କେତେକର ତଦନ୍ତ ଜାରି ରହିଥିବା କୁହାଯାଉଛି। ପୂର୍ବତନ ଆଇନ ମନ୍ତ୍ରୀ ତଥା କଂଗ୍ରେସ ଦଳ ନେତା ନରସିଂହ ମିଶ୍ର କହିଛନ୍ତି ଯେ ରାଜ୍ୟ ସରକାର ସମୟ କିଣିବାକୁ ତଦନ୍ତ କମିଶନକୁ ଅସ୍ତ୍ର ଭାବେ ବ୍ୟବହାର କରୁଛନ୍ତି। ତଦନ୍ତ ଗଡି ଚାଲୁଛି, ଲୋକମାନେ ଘଟଣାକୁ ପାସୋରି ଯାଉଛନ୍ତି। ରାଜକୋଷରୁ ପର୍ଯ୍ୟାପ୍ତ ଅର୍ଥ ବରବାଦ ହେଉଛି। ମାତ୍ର ଉଦ୍ଦେଶ୍ୟ ସାଧିତ ହେଉ ନାହିଁ। ଧର୍ମକୁ ଆଖିଠାର ଭଳି ନାମକୁ ମାତ୍ର କେତେକ ରିପୋର୍ଟ ବିଧାନସଭାରେ ଉପସ୍ଥାପନ କରାଯାଉଛି । ସେଗୁଡିକୁ ମଧ୍ୟ ସରକାର ପାଳନ କରୁନାହାନ୍ତି ବୋଲି ମିଶ୍ର କହିଛନ୍ତି।


Enter your email to get our daily news in your inbox.

All Right Reserved By Dharitri.Com

ଭୁବନେଶ୍ୱର ବସ୍ତି ନାଁ ଶୁଣିଲେ ଭୟ ଘାରୁଛି

ଭୁବନେଶ୍ୱର,୨୮ା୬(ବ୍ୟୁରୋ): ରାଜ୍ୟର ଆଉ ଏକ ହଟ୍‌ସ୍ପଟ୍‌ ପାଲଟିବାକୁ ଯାଉଛି ରାଜଧାନୀ। ବସ୍ତି ପାଇଁ ବିଗିଡି ଗଲାଣି ସ୍ଥିତି। ସାଲିଆ ସାହି ବସ୍ତିରୁ ପଜିଟିଭ୍‌ ଠାବ ହେବାର...

ଆମ ମନ୍ଦିର ଐତିହ୍ୟର ସ୍ମାରକୀ

ଓଡ଼ିଆ ଜାତିର ଏଇ ଦୁର୍ଦ୍ଦିନ ବେଳେ ଆମ ଲୁଣ୍ଠିତ ଧନରେ ହେଉଡ଼ି ମାରୁଥିବା ମାନନୀୟମାନେ ଆମ ସାଂସ୍କୃତିକ ପରମ୍ପରା ମୂଳରେ ଚୋଟ ମାରି ଚାଲିଲେ। ଆମେ...

ଜୁନିୟର ମଡେଲ ଇଣ୍ଟରନ୍ୟାଶନାଲ : ହଂକଂରେ ଭାରତରୁ ପ୍ରତିନିଧିତ୍ୱ କରିବେ ଶରଣ୍ୟା

ଭୁବନେଶ୍ୱର,୧୭।୫(ବ୍ୟୁରୋ):  ଗତ ଏପ୍ରିଲ ୨୭ରୁ ୨୯ ପର୍ଯ୍ୟନ୍ତ କେରଳର କୋଝିକୋଡ଼ଠାରେ ଅନୁଷ୍ଠିତ ଜୁନିୟର ମଡେଲ ଇଣ୍ଟରନ୍ୟାଶନାଲ ୨୦୧୯ରେ ବାଜି ମାରିଛନ୍ତି ଆଉ ଜଣେ ଓଡ଼ିଆ। ଜୁନିୟର...

ସରକାରୀ କର୍ମଚାରୀଙ୍କ ଛୁଟି ବାତିଲ

ଭୁବନେଶ୍ୱର,୨୪।୫: ବାତ୍ୟା ମୁକାବିଲା ପାଇଁ ରାଜ୍ୟ ସରକାର ମେ ୩୧ ତାରିଖ ପର୍ଯ୍ୟନ୍ତ ରାଜ୍ୟର ସବୁ ସରକାରୀ କର୍ମଚାରୀଙ୍କ ଛୁଟି ବାତିଲ କରିଛନ୍ତି। କର୍ମଚାରୀଙ୍କୁ ହେଡ...

ବାଜପୁର ଗାଁରେ ୧୮ ଝାଡ଼ାବାନ୍ତିରେ ଆକ୍ରାନ୍ତ

ମାଧପୁର,୧।୫(ଡି.ଏନ୍‌.ଏ.): ଅନୁଗୋଳ ଜିଲା ଆଠମଲ୍ଲିକ ବ୍ଲକ ଅଧୀନ ଟୁସର ପଞ୍ଚାୟତର ବାଜପୁର ଗ୍ରାମରେ ୧୮ ଜଣ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିବା ଜଣାପଡିଛି। ସୂଚନାଯୋଗ୍ୟ, ଗତ ୨୮ରେ...

ଏଣିକି ମନ୍ଦିର ଆୟବ୍ୟୟର ହେବ ଅଡିଟ୍‌, ଏଜିଙ୍କୁ ଚିଠି ଲେଖିଲେ ଦେବୋତ୍ତର କମିଶନର

ଭୁବନେଶ୍ୱର,୨୬।୯(ବ୍ୟୁରୋ)- ଏଣିକି ମନ୍ଦିର ଆୟବ୍ୟୟର ଅଡିଟ୍‌ କରାଯିବ। ଏନେଇ ଦେବୋତ୍ତର କମିଶନର ଏଜିଙ୍କୁ ଚିଠି ଲେଖିଛନ୍ତି। ରାଜ୍ୟର ୬୧ଟି ମନ୍ଦିରର ଅଡିଟ୍‌ ପାଇଁ ଏଜିଙ୍କୁ ଚିଠି...

ଗଞ୍ଜାମରେ ଶନିବାର ନୋ ବ୍ୟାଗ୍‌ ଡେ

ଛତ୍ରପୁର,୫ା୩(ଡି.ଏନ.ଏ.): ପିଲାମାନେ ଅତ୍ୟଧିକ ଓଜନର ସ୍କୁଲବ୍ୟାଗ ନେଉଥିବାରୁ ସେମାନଙ୍କ ଶାରିରୀକ ସମସ୍ୟା ଦେଖାଦେଉଛି। ଏହାକୁ କମାଇବା ପାଇଁ ହାଇକୋର୍ଟ ଓ ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ କେଉଁ ଶ୍ରେଣୀ...

ଟ୍ରକ୍‌କୁ ପଛରୁ ପିଟିଲା ଆମ୍ବୁଲାନ୍ସ: ମହିଳା ରୋଗୀଙ୍କ ସମେତ ୩ଜଣଙ୍କ ଜୀବନ ଗଲା

ଚଣ୍ଡିଖୋଲ, ୧।୫ (ଡି.ଏନ୍‌.ଏ.): ଯାଜପୁର ଜିଲା ବଡଚଣା ଥାନା ଅନ୍ତର୍ଗତ ୧୬ନଂ ଜାତୀୟ ରାଜପଥର ଚଣ୍ଡିଖୋଲ ଓ ବଡଚଣା ମଧ୍ୟସ୍ଥଳୀରେ ଶନିବାର ବିଳମ୍ବିତ ରାତିରେ ଏକ...

Advertisement
Archives

Model This Week