ଛତ୍ରପୁର,୨୯ା୫(ଡି.ଏନ୍.ଏ)-ପୁଣି ଟ୍ରେନ ଚେନ ପୁଲିଂ କରି ଓହ୍ଲାଇ ପଡ଼ିଛନ୍ତି ପ୍ରବାସୀ। ଏପରି ଘଟଣା ଗଞ୍ଜାମ ଜିଲା ଛତ୍ରପୁର ରେଳ ଷ୍ଟେଶନରେ ଦେଖିବାକୁ ମିଳିଛି। ସୁରଟରୁ ପ୍ରବାସୀଙ୍କୁ ନେଇ ବାଲେଶ୍ୱର ଅଭିମୁଖେ ଯାଉଥିବା ଏକ ଟ୍ରେନ୍ର ଚେନ୍ ପୁଲିଂ କରି ଶୁକ୍ରବାର ସାରେ ୧୨୦୦ରୁ ଊର୍ଦ୍ଧ୍ୱ ପ୍ରବାସୀ ଓହ୍ଲାଇ ପଡ଼ିଥିଲେ। ଏପରି କି ସାମାଜିକ ଦୂରତାକୁ ପଛରେ ପକାଇ ପ୍ରବାସୀ ଶ୍ରମିକ ଓ ସେମାନଙ୍କ ପରିବାର ସଦସ୍ୟ ଗୋଟିଏ ସ୍ଥାନରେ ରୁଣ୍ଡ ହୋଇ ଘଣ୍ଟା ଘଣ୍ଟା ଏକାଠି ରହିଥିବା ଦେଖିବାକୁ ମିଳିଥିଲା। ପ୍ରବାସୀମାନେ ଓହ୍ଲାଇ ପଡ଼ିବା ପରେ ଉକ୍ତ ଟ୍ରେନ୍ଟି ନିଜ ଗନ୍ତବ୍ୟ ସ୍ଥାନ ଅଭିମୁଖେ ଚାଲିଯାଇଥିବା ଜଣାପଡ଼ିଛି। ଖବରପାଇ ଛତ୍ରପୁର ଉପଜିଲାପାଳ ପ୍ରିୟରଞ୍ଜନ ପୃଷ୍ଟି, ବିଡିଓ ଅମ୍ବିକା ପ୍ରସାଦ ଦଶ, ତହସିଲଦାର ନୀଳମାଧବ ଭୋଇ, ଡେପୁଟି କଲେକ୍ଟର ବିଜୟାନନ୍ଦ ସେଠୀ ପ୍ରମୁଖ ପହଞ୍ଚି ଲୋକଙ୍କୁ ସାମାଜିକ ଦୂରତା ରକ୍ଷା କରିବାକୁ ପରାମର୍ଶ ଦେଇଛନ୍ତି। ଟ୍ରେନ୍ରୁ ଓହ୍ଲାଇ ପଡିଥିବା ଜିଲାର ସମସ୍ତ ପ୍ରବାସୀଙ୍କୁ ନିଜ ନିଜ ବ୍ଲକର ପଞ୍ଚାୟତରେ ଥିବା କ୍ୱାରାଣ୍ଟାଇନ କେନ୍ଦ୍ରକୁ ବସ ଯୋଗେ ପଠାଯିବ ବୋଲି ସୂଚନା ମିଳିଛି।
