ଭୁବନେଶ୍ୱର,୨୮।୨(ବ୍ୟୁରୋ): ଯାତ୍ରୀଙ୍କ ସୁରକ୍ଷା ପାଇଁ ଟ୍ରେନ୍ରେ ଟଙ୍କା ମାଗିବାକୁ କିନ୍ନରମାନଙ୍କୁ ବାରଣ କରାଯାଇଛି। ସେମାନେ ଯେପରି ଷ୍ଟେଶନ ନ ମାଡ଼ନ୍ତି ସେଥିଲାଗି ରେଳ ସୁରକ୍ଷା ବଳ (ଆର୍ପିଏଫ) ଓ ଜେନେରାଲ ରେଲ୍ଓ୍ବେ ପୋଲିସ (ଜିଆର୍ପି) ପକ୍ଷରୁ କଟକଣା ଲାଗୁ କରାଯିବା ସହ ବିଭିନ୍ନ କିନ୍ନର ବସ୍ତିକୁ ଯାଇ ସଚେତନ କରାଯାଉଛି। କିନ୍ନରମାନେ ଟ୍ରେନରେ ଚଢି ଟଙ୍କା ମାଗୁଥିବା ନଜରକୁ ଆସିଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ରେଲ୍ଓ୍ବେ ଏଡିଜି ନିର୍ଦ୍ଦେଶ ଦେଇଥିଲେ। ହେଲେ ଏବେ ବି କିନ୍ନରମାନେ ବିଭିନ୍ନ ଟ୍ରେନ୍ରେ ବୁଲି ବୁଲି ଯାତ୍ରୀଙ୍କଠାରୁ ଜବରଦସ୍ତ ଟଙ୍କା ଆଦାୟ କରୁଥିବା ଅଭିଯୋଗ ହେଉଛି। ଟଙ୍କା ନ ଦେଲେ ହଇରାଣ କରୁଛନ୍ତି। ଉଲଗ୍ନ ହୋଇ ଖରାପ ଭାଷାରେ ଗାଳିଗୁଲଜ କରୁଛନ୍ତି। ଏପରି କି ଟ୍ରେନ୍ରୁ ଠେଲି ଦେବାକୁ ଧମକ ଦେବା ସହ ଉଦ୍ୟମ ମଧ୍ୟ କରୁଛନ୍ତି। ଗତ ୨୩ ତାରିଖରେ ଭୁବନେଶ୍ୱରରୁ ବେଙ୍ଗାଲୁରୁ ଯାଉଥିବା ପ୍ରଶାନ୍ତି ଏକ୍ସପ୍ରେକ୍ସ(୧୮୪୬୩)ରେ ଜଣେ କିନ୍ନର ଘଣ୍ଟାଏ ଧରି ଏଭଳି ଉତ୍ପାତ କରୁଥିବା ଦେଖିବାକୁ ମିଳିଛି। କିନ୍ନରଙ୍କ ଏଭଳି ଆକ୍ରୋଶର ସମ୍ମୁଖୀନ ହୋଇଥିବା ଜଣେ ଯାତ୍ରୀ ନିଜ ମୋବାଇଲ୍ ଫୋନ୍ରେ ଭିଡିଓ ଶୁଟିଂ କରିବା ସହ ତାହାକୁ ଫେସ୍ବୁକ୍ ଆକାଉଣ୍ଟ୍ରେ ପୋଷ୍ଟ କରିଛନ୍ତି। ଉକ୍ତ ଭିଡିଓ ଭାଇରାଲ ହେବା ପରେ ଗୁରୁବାର ରେଲ୍ଓ୍ବେ ଏଡିଜି ପ୍ରଣବିନ୍ଦୁ ଆଚାର୍ଯ୍ୟ ତଦନ୍ତ ନିର୍ଦ୍ଦେଶ ଦେଇଛନ୍ତି। ଘଟଣାର ସତ୍ୟତା ଜଣାପଡିବା ପରେ ସମ୍ପୃକ୍ତ କିନ୍ନରଙ୍କୁ ଚିହ୍ନଟ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ସେ କହିଛନ୍ତି, କିନ୍ନରମାନଙ୍କୁ ଷ୍ଟେଶନ ଆସିବାକୁ ମନା କରାଯାଇଥିଲେ ମଧ୍ୟ କେତେଜଣ ଲୁଚିଛପି ଟ୍ରେନ୍ରେ ଚଢି ଟଙ୍କା ମାଗୁଛନ୍ତି। ଯେଉଁ ଟ୍ରେନରେ ଏଭଳି ଘଟଣା ଘଟୁଛି ସୋସିଆଲ ମିଡିଆରେ ନ ଛାଡି ଆର୍ପିଏଫ୍ କିମ୍ବା ଜିଆର୍ପିରେ ରିପୋର୍ଟ କରିବାକୁ ସେ ଯାତ୍ରୀଙ୍କୁ ନିବେଦନ କରିଛନ୍ତି।
ମିଳିଥିବା ସୂଚନାନୁସାରେ, ପ୍ରଶାନ୍ତି ଏକ୍ସପ୍ରେକ୍ସ ଭୁବନେଶ୍ୱର ଷ୍ଟେଶନ ଛାଡିବା ପରେ ଉକ୍ତ କିନ୍ନରଙ୍କୁ ଦଖିବାକୁ ପାଇଥିଲେ। ସେ ଯାତ୍ରୀଙ୍କ ନିକଟକୁ ଯାଇ ଟଙ୍କା ମାଗିଥିଲେ। କେତେଜଣ ଯାତ୍ରୀ ପ୍ରଥମେ ଟଙ୍କା ଦେବାକୁ ମନା କରିବାରୁ ସେ ଉଲଗ୍ନ ହୋଇ ଗାଳିଗୁଲଜ କରିଥିଲେ। ଟଙ୍କା ଦେବାକୁ ମନା କରିବାରୁ ଜଣେ ଯୁବକଙ୍କୁ ଆକ୍ରମଣ ଉଦ୍ୟମ କରିଥିଲେ। ଉପସ୍ଥିତ ଅନ୍ୟ ଯାତ୍ରୀମାନେ ବିରୋଧ କରିବାରୁ କିନ୍ନର ଜଣକ ଆଗ ଷ୍ଟେଶନରେ ଦେଖିନେବି ବୋଲି ଧମକ ଦେଇଥିଲେ। ପରେ ଉକ୍ତ ଯାତ୍ରୀଙ୍କୁ କିନ୍ନର ଜଣକ ଟାଣିନେଇ ଟ୍ରେନର ଡୋର ନିକଟରେ ଠେଲି ଦେବାକୁ ଉଦ୍ୟମ କରୁଥିବା ଭିଡିଓରେ ଦେଖିବାକୁ ମିଳୁଛି। ଏହି ଘଟଣା ରେଲ୍ଓ୍ବେ କର୍ତ୍ତୃପକ୍ଷ ଓ ପୋଲିସର କାର୍ଯ୍ୟଧାରାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି।
