ନୂଆଦିଲ୍ଲୀ,୧୨ା୯: ଟ୍ରାଫିକ୍ ନିୟମ ଉଲ୍ଲଂଘନ ପାଇଁ ଧାର୍ଯ୍ୟ ଜରିମାନା ରାଶିକୁ ହ୍ରାସ କରାଇବାକୁ ଉଦ୍ୟମ କରୁଥିବା ରାଜ୍ୟ ଏହାର ପରିଣାମ ପାଇଁ ଦାୟୀ ରହିବେ ବୋଲି କେନ୍ଦ୍ର ପରିବହନ ମନ୍ତ୍ରୀ ନୀତୀନ ଗଡକରୀ ବୁଧବାର କହିଛନ୍ତି। ପାର୍ଲାମେଣ୍ଟ ସଂଶୋଧିତ ମୋଟରଯାନ ଆଇନକୁ ଅନୁମୋଦନ କରିବା ପରେ ଭାଜପା ଶାସିତ ରାଜ୍ୟ ଗୁଜରାଟ ଜରିମାନା କମାଇଥିବାରୁ ଏହା ଦଳକୁ ଶକ୍ତ ଧକ୍କା ଦେଇଛି। କେତେକ ରାଜ୍ୟ ଜରିମାନା ଲାଗୁ କରିବେ ନାହିଁ ବୋଲି କହୁଥିବାବେଳେ ଟଙ୍କାଠାରୁ ଜୀବନ ଅଧିକ ମୂଲ୍ୟବାନ ବୋଲି ଗଡକରୀ କହିଛନ୍ତି। ଜୀବନ ବଞ୍ଚାଇବା ପାଇଁ ମୋଟରଯାନ ଆଇନକୁ କଠୋର କରାଯାଇଛି। ଆଇନ ପ୍ରତି ଲୋକଙ୍କ ଭୟ ରହିବା ଆବଶ୍ୟକ ବୋଲି ସେ ମତ ଦେଇଛନ୍ତି।
ଟ୍ରାଫିକ ନିୟମ ଉଲ୍ଲଂଘନକାରୀଙ୍କ ପାଇଁ ଜରିମାନା ପରିମାଣ ୯୦ ପ୍ରତିଶତ ହ୍ରାସ କରାଯିବ ବୋଲି ଗୁଜରାଟ ସରକାର ମଙ୍ଗଳବାର କହିଥିଲେ। ଏଭଳି ଜରିମାନାକୁ ପଶ୍ଚିମବଙ୍ଗରେ ଲାଗୁ କରାଯିବ ନାହିଁ ବୋଲି ମୁଖ୍ୟମନ୍ତ୍ରୀ ମମତା ବାନାର୍ଜୀ ରୋକ୍ଠୋକ କହିଛନ୍ତି। ଭାରତରେ ସଡ଼କ ଦୁର୍ଘଟଣାରେ ବର୍ଷକୁ ଦେଢ଼ ଲକ୍ଷ ଲୋକଙ୍କ ଜୀବନ ଯାଉଛି। ସେମାନଙ୍କ ମଧ୍ୟରୁ ୬୫ ପ୍ରତିଶତଙ୍କ ବୟସ ୧୮ରୁ ୩୫ ବର୍ଷ ମଧ୍ୟରେ। ସେମାନଙ୍କ ଜୀବନ ବଞ୍ଚାଇବା ପାଇଁ ସରକାର ନୂଆ ଆଇନ ଆଣିଛନ୍ତି। ଏଥିପାଇଁ ରାଜ୍ୟ ସରକାରଙ୍କ ସହଯୋଗ ଦରକାର। ଏହାକୁ ଦଳ ଓ ରାଜ୍ୟ ସରକାରଙ୍କଠାରୁ ଊର୍ଦ୍ଧ୍ୱରେ ଦେଖାଯିବା ଆବଶ୍ୟକ ବୋଲି ଗଡ଼କରୀ କହିଛନ୍ତି। ବ୍ରିଟେନ, କାନାଡା, କାଲିଫର୍ନିଆ ଓ ଆର୍ଜେଣ୍ଟିନା ଭଳି ଦେଶର ମୋଟରଯାନ ଆଇନକୁ ଅନୁଧ୍ୟାନ କରିବା ପରେ କେନ୍ଦ୍ର ସରକାର ସଂଶୋଧିତ ଆଇନ ଆଣିଥିଲେ। ସବୁ ମୁଖ୍ୟମନ୍ତ୍ରୀ ଏହାକୁ ଅନୁଧ୍ୟାନ କରିବା ଉଚିତ ବୋଲି ସେ ମତ ଦେଇଛନ୍ତି।
‘ଓଡ଼ିଶାରେ ଜରିମାନା କମାଇବାକୁ ବିଚାର ଚାଲିଛି’
ଟ୍ରାଫିକ୍ ନିୟମକୁ ହେୟଜ୍ଞାନ କରି ଗାଡ଼ିର କାଗଜପତ୍ର ଠିକ୍ କରି ନ ଥିବା ଲୋକମାନେ ଏବେ ବ୍ୟତିବ୍ୟସ୍ତ ହୋଇପଡ଼ିଲେଣି। କାରଣ ସେମାନଙ୍କୁ ନୂଆ ମୋଟର ଯାନ ଆଇନ ଲାଗୁ ହେବା ପରେ ଦେବାକୁ ପଡ଼ୁଛି ୧୦ଗୁଣା ଜରିମାନା। ଏବେ ଡ୍ରାଇଭିଂ ଲାଇସେନ୍ସଠାରୁ ଆରମ୍ଭ କରି ପ୍ରଦୂଷଣ ସାର୍ଟିଫିକେଟ୍, ବୀମା, ଫିଟ୍ନେସ ଓ ଅନ୍ୟାନ୍ୟ କାଗଜପତ୍ର ଯୋଗାଡ଼ ନ କଲେ ରାସ୍ତାରେ ଗାଡ଼ି ଗଡ଼ାଇବା ମୁସ୍କିଲ। ପୂର୍ବରୁ ଅବଧି ପୂରି ଯାଇଥିଲେ ମଧ୍ୟ ଗାଡ଼ିର କାଗଜପତ୍ର ନବୀକରଣ ହେଉ ନ ଥିଲା। ଏବେ ଜୋରଦାର ଧରପଗଡ଼ ପରେ ଗତ କିଛିଦିନ ହେବ ପରିବହନ କାର୍ଯ୍ୟାଳୟରେ ନାହିଁ ନ ଥିବା ଭିଡ଼ ଦେଖିବାକୁ ମିଳୁଛି। ବଡ଼ଧରଣର ଜରିମାନା ଯୋଗୁ ବିଭିନ୍ନ ଜାଗାରେ ଆଶାନ୍ତି ସୃଷ୍ଟି ହୋଇଥିଲେ ମଧ୍ୟ ଲୋକେ ନିଜର ବୃହତ୍ତର ସ୍ବାର୍ଥ ଦୃଷ୍ଟିରୁ ଗାଡ଼ିର କାଗଜପତ୍ର
ଠିକ୍ ରଖିବା ଓ ଟ୍ରାଫିକ୍ ନିୟମ ପାଳନ କରିବାକୁ ଆସ୍ତେ ଆସ୍ତେ ପ୍ରସ୍ତୁତ ହେଉଛନ୍ତି, ଯାହା ପରିବହନ କାର୍ଯ୍ୟାଳୟରେ ହେଉଥିବା ଭିଡ଼ରୁ ସ୍ପଷ୍ଟ ହେଉଛି। କିନ୍ତୁ ରାଜ୍ୟ ସରକାର ଜରିମାନା ପରିମାଣ ହ୍ରାସ କରିବାକୁ ବିଚାର କରୁଛନ୍ତି। ଗୁଜରାଟ ସରକାରଙ୍କ ଭଳି ମୋଟର ଯାନ ଜରିମାନା ପାଖାପାଖି ଅଧା ହ୍ରାସ କରିବାକୁ ସରକାର ଚିନ୍ତା କରୁଛନ୍ତି ବୋଲି ବାଣିଜ୍ୟ ଓ ପରିବହନ ସଚିବ ଜି. ଶ୍ରୀନିବାସ ସୂଚନା ଦେଇଛନ୍ତି। ସେ କହିଛନ୍ତି ଯେ ମୋଟର ଯାନ ଆଇନ କାର୍ଯ୍ୟକାରିତାକୁ ନେଇ ଅନ୍ୟ ରାଜ୍ୟଗୁଡ଼ିକର ବ୍ୟବସ୍ଥାକୁ ଅନୁଧ୍ୟାନ କରାଯାଉଛି। ସେମାନଙ୍କ ଗେଜେଟ ନୋଟିଫିକେଶନଗୁଡିକୁ ଅନୁଧ୍ୟାନ କରାଯିବା ପରେ ଜରିମାନା ରାଶି କମାଇବା ନେଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି। ଆଞ୍ଚଳିକ ପରିବହନ କାର୍ଯ୍ୟାଳୟ-୧କୁ ସଚିବ ଅଚାନକ ପରିଦର୍ଶନ କରିଥିଲେ। ସେଠାରେ ଡ୍ରାଇଭିଂ ଲାଇସେନ୍ସ, ଲର୍ନିଂ ଲାଇସେନ୍ସ ଆଦି ଦେବାକୁ କି ବ୍ୟବସ୍ଥା କରାଯାଇଛି ସେସବୁର ଅନୁଧ୍ୟାନ କରିଥିଲେ। ଲୋକମାନଙ୍କୁ ଗାଡି କାଗଜପତ୍ର ଯୋଗାଇ ଦେବାକୁ ପରିବହନ କାର୍ଯ୍ୟାଳୟରେ ଅଧିକ କାଉଣ୍ଟର ଖୋଲିବାକୁ ସେ ଆରଟିଓଙ୍କୁ ନିର୍ଦ୍ଦେଶ ଦେଇଥିଲେ।
