ସମଗ୍ର ବିଶ୍ୱକୁ ମହାମାରୀ କରୋନା ଭୂତାଣୁ ଗ୍ରାସ କରିଥିବା ବେଳେ ଟିକ୍ଟକ୍ରେ ଏକ ଭିଡିଓ ଭାଇରାଲ ହୋଇଥିଲା। ଯେଉଁଥିରେ ଜଣେ ଟିକ୍ଟକ୍ ୟୁଜର ମାସ୍କର ମଜା ଉଡ଼ାଉଥିବା ବା ଥଟ୍ଟା ପରିହାସ କରୁଥିବା ଦେଖିବାକୁ ମିଳିଥିଲା। ଯାହା ତାଙ୍କ ପାଇଁ ଏବେ ମହଙ୍ଗା ପଡ଼ିଛି। ସେହି ଯୁବକ ଜଣକ ନିଜେ ଏବେ କରୋନା ପଜିଟିଭ୍ ଭାବେ ଚିହ୍ନଟ ହୋଇଛନ୍ତି। ଟିକ୍ଟକ୍ ୟୁଜର ଜଣକ ହେଉଛନ୍ତି ମଧ୍ୟପ୍ରଦେଶର ସାଗର ଜିଲାର। ଏକ ଟିକ୍ଟକ୍ ଭିଡିଓରେ କରୋନାରୁ ବଞ୍ଚିବା ପାଇଁ ମାସ୍କ ବ୍ୟବହାରକୁ ସେ ଥଟ୍ଟା ପରିହାସ କରିଥିଲେ। ଯେଉଁ ସମୟରେ ଦେଶରେ ତୀବ୍ର ବେଗରେ କରୋନା ମାଡ଼ିଚାଲିଥିଲା। ଏହି ଯୁବକ ଜଣକ ବାଇକ୍ରେ ବସି ଟିକ୍ଟକ୍ ଭିଡିଓ ଶୁଟିଂ କରୁଥିଲେ। ଭିଡିଓଟିକୁ ଦେଖି କେହି ଜଣେ ତାଙ୍କୁ ମାସ୍କ ପିନ୍ଧିବାକୁ କହିଥିଲେ। ପରେ ଯୁବକ ଜଣକ ମାସ୍କ ପିନ୍ଧିବାକୁ ମନା କରିଦେଇଥିଲେ। ସେ କହିଥିଲେ ଏ କପଡ଼ା ଉପରେ କ’ଣ ବିଶ୍ୱାସ? ଯଦି ତୁମେ ବିଶ୍ୱାସ କରୁଛ କର।
ସେହିପରି ଭିଡିଓର ଦ୍ୱିତୀୟ ଭାଗରେ ଉକ୍ତ ମାସ୍କକୁ ସେ ପବନରେ ଉଡ଼ାଇ ଦେଉଥିବା ନଜର ଆସିଥିଲା। ଏହାର କିଛିଦିନ ପରେ ସଂପୃକ୍ତ ଯୁବକଙ୍କଠାରେ କରୋନା ଲକ୍ଷଣ ଦେଖାଦେବାରୁ ତାଙ୍କର ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ଯେଉଁଥିରେ ସେ କରୋନା ସଂକ୍ରମିତ ହୋଇଥିବା ଜଣାପଡ଼ିଛି। ଏହା ପରେ ଅଧିକାରୀମାନେ ହସ୍ପିଟାଲ ଯାଇ ତାଙ୍କ ମୋବାଇଲ୍ ସିଜ୍ କରିଥିଲେ। ସଂପୃକ୍ତ ଯୁବକ ଜଣକ ଆଇସୋଲେଶନରେ ଥାଇ ମଧ୍ୟ ଟିକ୍ଟକ୍ ଭିଡିଓ ଅପ୍ଲୋଡ କରୁଥିଲେ। ଏହି ଭିଡିଓରେ ସେ କୋଭିଡ୍-୧୯ରେ ସଂକ୍ରମିତ ଏବଂ ବର୍ତ୍ତମାନ ସେ ଲୋକଙ୍କ ସହ କଥାବାର୍ତ୍ତା ହୋଇପାରିବେ ନାହିଁ ବୋଲି ଭିଡିଓ ଅପ୍ଲୋଡ୍ କରିଥିଲେ। ଅନ୍ୟପକ୍ଷରେ ସାଗର ଜିଲାର ସରକାରୀ ବୁନ୍ଦେଲଖଣ୍ଡ ମେଡିକାଲ କଲେଜର ଡାକ୍ତର କହିଛନ୍ତି, ବର୍ତ୍ତମାନ ଯୁବକଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି।
