ନୟାଗଡ଼ ଅଫିସ,୧୯।୧୦: ଅଣସଙ୍ଗଠିତ ଶ୍ରମିକଙ୍କ ନାମ ପଞ୍ଜୀକରଣ ଓ ସେମାନଙ୍କୁ ମାଗଣାରେ ଫର୍ମ ଯୋଗାଇ ଦିଆଯାଉଛି ବୋଲି ସରକାର ଡିଣ୍ଡିମ ପିଟୁଛନ୍ତି । ତେବେ ନୟାଗଡ଼ ଜିଲାରେ କୃଷି ଶ୍ରମିକଙ୍କ ନାମ ପଞ୍ଜୀକରଣ କରିବା ପାଇଁ ଜିଲା ଶ୍ରମ କାର୍ଯ୍ୟାଳୟକୁ ଆସିଲେ ୭୦୦ରୁ ୧୨୦୦ ଟଙ୍କା ଖର୍ଚ୍ଚ କରିବାକୁ ପଡୁଛି । ପୁଣି ଫର୍ମ କିଣିବାକୁ ୧୦ରୁ ୨୦ ଟଙ୍କା ପୃଥକ୍ ଭାବେ ଦେବାକୁ ହେଉଛି । ତଥାପି ଗୋଟିଏ ଦିନରେ ନାମ ପଞ୍ଜୀକରଣ ହୋଇ ପାରୁନାହିଁ ା ଏଥିପାଇଁ ମାସ ମାସ ଧରି ଅପେକ୍ଷା କରିବାକୁ କୁହାଯାଉଛି। ଏଣୁ ଜିଲାରେ କୃଷି ଶ୍ରମିକଙ୍କ ପଞ୍ଜୀକରଣ ବଢ଼ି ପାରୁନାହିଁ । ପୁଣି ସଚେତନତାର ଅଭାବ ଯୋଗୁ ଅନେକ କୃଷି ଶ୍ରମିକ ସେମାନଙ୍କ ନାମ ପଞ୍ଜିକୃତ କରୁ ନାହାନ୍ତି । ଜିଲାରେ ୨୦୨୨ ଜୁଲାଇ ୩୧ ପର୍ଯ୍ୟନ୍ତ ମାତ୍ର ୧୩୮୫ ଜଣ କୃଷି ଶ୍ରମିକ ନାମ ପଞ୍ଜିକରଣ କରିଥିବା ସୂଚନା ମିଳିଛି ା
କୃଷି ପ୍ରଧାନ ଜିଲା ନୟାଗଡ଼ । ତେବେ ବନ୍ୟା, ବାତ୍ୟା ଓ ମରୁଡ଼ି କୃଷି ପାଇଁ ଏଠାରେ ବାଧକ ସାଜିଛି । ସରକାରୀ ସହାୟତା ସମୁଦ୍ରକୁ ଶଙ୍ଖେ । ଧିରେ ଧିରେ ଚାଷ ପ୍ରତି ବିତସ୍ପୃହ ହୋଇ କୃଷକମାନେ ଚାଷ ଛାଡି ଅନ୍ୟ ଧନ୍ଦାକୁ ଆପଣେଇବାରେ ଲାଗିଛନ୍ତି। ତଥାପି ବହୁ ଲୋକ ଚାଷ କରୁଛନ୍ତି । ହେଲେ ସେମାନେ ନିଜେ ଜମିରେ କାମ କରି ନ ଥାନ୍ତି । ପାରିଶ୍ରମିକ ନେଇ କୃଷି ଶ୍ରମିକମାନେ ସେହି କାମ କରୁଛନ୍ତି। ମହିଳା କୃଷି ଶ୍ରମିକମାନେ ବି କାମ କରୁଛନ୍ତି ା
ସରକାର କୃଷି ଶ୍ରମିକଙ୍କୁ ଅଣସଙ୍ଗଠିତ ଶ୍ରମିକର ମାନ୍ୟତା ଦେଇ ସେମାନଙ୍କ ପାଇଁ ପଞ୍ଜୀକରଣ ବ୍ୟବସ୍ଥା କରିଛନ୍ତି । ହେଲେ ମାଗଣାରେ ଫର୍ମ ଓ ପଞ୍ଜୀକରଣ ପାଇଁ ବ୍ୟବସ୍ଥା ନାହିଁ । କେତେଜଣ ଦଲାଲ ଜିଲା ଶ୍ରମ କାର୍ଯ୍ୟାଳୟରେ ଧରାଧରି କରି କୃଷି ଶ୍ରମିକମାନଙ୍କୁ ଲୁଟି ଚାଲିଛନ୍ତି । ଦଲାଲମାନଙ୍କୁ ଜିଲା ଶ୍ରମ କାର୍ଯ୍ୟାଳୟ କର୍ମଚାରୀଙ୍କ ସହଯୋଗ ବି ମିଳୁଛି ା ଫଳରେ କୃଷି ଶ୍ରମିକମାନେ ଉପେକ୍ଷିତ ହୋଇ ଚାଲିଛନ୍ତି । ଜିଲା କୃଷି କାର୍ଯ୍ୟାଳୟରେ ମାଗଣାରେ ଫର୍ମ ଦିଆଯାଉ ନ ଥିବାରୁ ଦଲାଲମାନେ ଏହାର ଫାଇଦା ଉଠାଇ ଚାଲିଛନ୍ତି ବୋଲ ଅଭିଯୋଗ ହୋଇଛି ।
ସୂଚନା ଅନୁଯାୟୀ, ରାଜ୍ୟରେ ୧ ଲକ୍ଷ ୧୮ ହଜାର ୬୫୯ ଜଣ କୃଷି ଶ୍ରମିକଙ୍କ ନାମ ପଞ୍ଜୀକରଣ କରାଯାଇଛି ା ସେଥିରୁ ନୟାଗଡ଼ ଜିଲାରେ ମାତ୍ର ୧୩୮୫ ଜଣ ଅଛନ୍ତି ା ସବୁଠାରୁ ଅଧିକ କେନ୍ଦ୍ରାପଡ଼ା ଜିଲାରେ ୨୫ ହଜାର ୯୯ ଜଣଙ୍କ ନାମ ପଞ୍ଜୀକୃତ ହୋଇଥିବାବେଳେ ବଲାଙ୍ଗୀର ଜିଲାରେ କୌଣସି କୃଷି ଶ୍ରମିକଙ୍କ ନାମ ପଞ୍ଜୀକରଣ ଆଜି ପର୍ଯ୍ୟନ୍ତ ହୋଇନାହିଁ ା
ସେହିଭଳି ଝାରସୁଗୁଡ଼ାରେ ୭ଜଣ, ସୁନ୍ଦରଗଡ଼ରେ ୫୪୯, ସମ୍ବଲପୁରରେ ୫୬୯, ମୟୁରଭଞ୍ଜରେ ୬୩୬, ଖୋର୍ଦ୍ଧାରେ ୭୩୧, ଦେଓଗଡ଼ରେ ୮୩୪, ଅନୁଗୋଳରେ ୧୪୩୯, ବାଲେଶ୍ୱରରେ ୩୯୩୮, ଭଦ୍ରକରେ ୪୧୫୧, ବରଗଡ଼ରେ ୨୪୭୮, ବୌଦ୍ଧରେ ୧୦୨୨୩, ଛତ୍ରପୁରରେ ୨୬୧୩, କଟକରେ ୪୦୬୧, ଢ଼େଙ୍କାନାଳରେ ୧୦୯୨, ଗଜପତିରେ ୧୫୪୬, ଗଞ୍ଜାମରେ ୪୯୯୮, ଜଗତସିଂହପୁରରେ ୨୪୭୫, ଯାଜପୁରରେ ୨୯୭୧, କଳାହାଣ୍ଡିରେ ୧୩୩୫, କନ୍ଧମାଳରେ ୨୦୨୭, କେନ୍ଦୁଝରରେ ୨୭୧୭ କୋରାପୁଟରେ ୪୯୨୭, ମାଲାକାନାଗିରିରେ ୭୩୭୧, ନବରଙ୍ଗପୁରରେ ୧୦୯୪୦, ନୂଆପଡ଼ାରେ ୮୧୮୭, ପୁରୀରେ ୧୮୩୭, ରାୟଗଡ଼ାରେ ୩୮୨୭, ସୁବର୍ଣ୍ଣପୁରରେ ୨୫୮୮, ତାଳଚେରରେ ୧୧୦୮ଜଣ କୃଷି ଶ୍ରମିକଙ୍କ ନାମ ପଞ୍ଜୀକୃତ ହୋଇଛି ।
ଏନେଇ ନୂଆଗଁାର ରମାମଣି ମଲ୍ଲିକ କୁହନ୍ତି, ସରକାରୀ ଯୋଜନା ସମ୍ପର୍କରେ ଅନେକ କୃଷି ଶ୍ରମିକ ଜାଣି ନାହାନ୍ତି । ସେମାନଙ୍କୁ ସଚେତନ କରାଯାଉ ନାହିଁ । ଦଶପଲ୍ଲାର ଭମା ସାହୁ କୁହନ୍ତି, ମାଗଣା ପଞ୍ଜୀକରଣ ଓ ଫର୍ମ ଯୋଗାଣ କହି ୧ ହଜାରରୁ ୧୫ଶହ ଟଙ୍କା ଖର୍ଚ୍ଚ ହେଉଛି ।
ପୁଣି ଗୋଟିଏ ଦିନରେ ପଞ୍ଜୀକରଣ କରାଯାଉନାହିଁ । ସରକାରଙ୍କ କିଛି ସହାୟତା ନାହିଁ । ଓଡ଼ଗଁାର ଉଲ୍ଲାସ ପାତ୍ର କୁହନ୍ତି, ଆମ ଜାତିର ମହିଳାମାନେ କୃଷି ଶ୍ରମିକ ଭାବେ କାମ କରନ୍ତି । ହେଲେ ସେମାନଙ୍କ ନାମ ପଞ୍ଜୀକରଣ ନେଇ କେହି କେବେ କହି ନାହାନ୍ତି । ରଣପୁରର ବୁଢ଼ା ସ୍ବାଇଁ କୁହନ୍ତି, କୃଷି ଶ୍ରମିକମାନେ କାହିଁକି ପଞ୍ଜୀକରଣ କରୁ ନାହାନ୍ତି ତା’ର ସମୀକ୍ଷା ହେଉନି । ସମୀକ୍ଷା ହେଲେ ସେମାନେ କିପରି ଦଲାଲଙ୍କ ଦ୍ୱାରା ଲୁଟ୍ର ଶିକାର ହେଉଛନ୍ତି ତାହା ଜଣାପଡିବ । ଖାଲି ସରକାର ଯୋଜନା କରି ବାହାବା ନେଲେ କୃଷି ଶ୍ରମିକମାନେ ଉପକୃତ ହେବେ ନାହିଁ ବୋଲି ସେ କହିଛନ୍ତି । ଜିଲା ଶ୍ରମ ଅଧିକାରୀ ଶିବ ନାରାୟଣ ସାହୁ କୁହନ୍ତି, ମୁଁ ଅଳ୍ପ ଦିନ ହେଲା କାମରେ ଯୋଗ ଦେଇଛି ।
ନୟାଗଡ଼ରେ କୃଷି ଶ୍ରମିକଙ୍କ ନାମ ପଞ୍ଜୀକରଣ ଭଲ ନାହିଁ । କିପରି ଅଧିକ କୃଷି ଶ୍ରମିକଙ୍କ ନାମ ପଞ୍ଜୀକୃତ ହେବ ସେ ନେଇ ଶ୍ରମ ବିଭାଗ ପକ୍ଷରୁ ଉଦ୍ୟମ ଜାରି ରହିଛି ା
