କେନ୍ଦ୍ରାପଡ଼ା ଅଫିସ, ୨୪ା୬: ରାଜ୍ୟର ଘରୋଇ ଚିକିତ୍ସାଳୟଗୁଡିକରେ କିଭଳି ମନମାନି ଚାଲିଛି ତା’ର ଏକ ଉଦାହରଣ ଦେଖିବାକୁ ମିଳିଛି ଭୁବନେଶ୍ୱରସ୍ଥିତ ଏକ ଘରୋଇ ମେଡିକାଲରେ। କେନ୍ଦ୍ରପଡ଼ା ଜିଲା ମାର୍ଶାଘାଇ ଅଞ୍ଚଳରୁ ଚିକିତ୍ସା ପାଇଁ ଆସିଥିବା ଜଣେ ବ୍ୟକ୍ତିଙ୍କ ପୁଅର ମୃତ୍ୟୁ ଘଟିବା ପରେ ଟଙ୍କା ନ ଥିବାରୁ ମୃତଦେହ ଛଡାଯାଇ ନ ଥିଲା। ଫଳରେ ଡାକ୍ତରଖାନାରେ ଦୀର୍ଘ ୧୧ ଘଣ୍ଟାଧରି ମୃତଦେହ ପଡ଼ି ରହିଥିଲା। ଏହି ଘଟଣା ରବିବାର କେନ୍ଦ୍ରାପଡ଼ା ଜିଲାରେ ଚର୍ଚ୍ଚାର ବିଷୟ ହୋଇଛି। ଏନେଇ ବିଭିନ୍ନ ସାମାଜିକ ଗଣମାଧ୍ୟମରେ ଖବର ପ୍ରଚାରିତ ହେବାପରେ ଆନ୍ତର୍ଜାତିକ ମାନବାଧିକାର କମିଟି ଓ ଗ୍ରାମୀଣ ବିକାଶ ଯୁବକ ସଂଘ ଏଥିରେ ହସ୍ତକ୍ଷେପ କରିବା ପରେ ରବିବାର ଦ୍ୱିପ୍ରହରରେ ମୃତଦେହକୁ ଡାକ୍ତରଖାନାରୁ ଅଣାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।
ସୂଚନାଯୋଗ୍ୟ, ପାଟକୁରା ଥାନା ମାର୍ଶାଘାଇ ବ୍ଲକ ଅନ୍ତର୍ଗତ କରିଲୋପାଟଣା ଗ୍ରାମର ସୁଧାକର ସାହୁଙ୍କ ପୁଅ ହରପ୍ରସାଦ (୪୫)ଗଲବ୍ଲାଡରରେ ଷ୍ଟୋନ ହେବାସହ ଜଣ୍ଡିସ ରୋଗରେ ପୀଡିତ ଥିଲେ। ଗତ ୧୬ ତାରିଖରେ ତାଙ୍କୁ ଭୁବନେଶ୍ୱରସ୍ଥିତ ଏକ ବଡ଼ ଘରୋଇ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଗତ ଶନିବାର ରାତି ୩ଟା୨୦ରେ ତାଙ୍କ ମୃତ୍ୟୁ ଘଟିଥିଲା। ଏ ସମ୍ପର୍କରେ ହସ୍ପିଟାଲ କର୍ତ୍ତୃପକ୍ଷ ବାପା ସୁଧାକରଙ୍କୁ ଜଣାଇବା ସହ ଚିକିତ୍ସା ବାବଦରେ ୬ ଲକ୍ଷ ଟଙ୍କା ବିଲ୍ ହୋଇଥିବା କହିଥିଲେ। ଏଥିସହ ପୂରା ଟଙ୍କା ପୈଠ ନ କଲେ ମୃତଦେହ ଛଡାଯିବ ନାହିଁ ବୋଲି ଚେତାବନୀ ଦେଇଥିଲେ।
ଏନେଇ ସୁଧାକର କହିଛନ୍ତି, ସେ ଜମି ବିକି ହସ୍ପିଟାଲ କର୍ତ୍ତୃପକ୍ଷଙ୍କୁ ୧ ଲକ୍ଷ ୬୦ ହଜାର ଟଙ୍କା ଦେଇଛନ୍ତି। ଏବେ ତାଙ୍କ ପାଖରେ ଆଉ ଟଙ୍କା ନାହିଁ। ଏଥିସହ ମୃତଦେହ କିପରି ଆଣିବେ ସେନେଇ ଚିନ୍ତା ପ୍ରକଟ କରିଥିଲେ। ସାମାଜିକ ଗଣମାଧ୍ୟମରେ ଏ ସମ୍ପର୍କରେ ପ୍ରଚାରିତ ହେବାପରେ ଆନ୍ତର୍ଜାତିକ ମାନବାଧିକର କମିଟିର କେନ୍ଦ୍ରାପଡା ଜିଲା ଆବାହକ ପ୍ରତାପ ଚନ୍ଦ୍ର ପାଢ଼ୀ, ଶିବ ସୁନ୍ଦର ସ୍ବାଇଁ ଓ ଗ୍ରାମୀଣ ବିକାଶ ଯୁବକ ସଂଘର ମାନସ ତ୍ରିପାଠୀ ହସ୍ପିଟାଲ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିଥିଲେ। ମାତ୍ର ହସ୍ପିଟାଲ କର୍ତ୍ତୃପକ୍ଷ ଅଧିକ ୨ ଲକ୍ଷ ୯୮ ହଜାର ଟଙ୍କା ଦେବାକୁ କହିଥିଲେ ନଚେତ୍ ଟଙ୍କା ବାବଦରେ ଏକ ଚୁକ୍ତିପତ୍ର କରିବାକୁ ବାଧ୍ୟ କରିଥିଲେ। ତେବେ ପରବର୍ତ୍ତୀ ସମୟରେ ମାନବାଧିକାର କମିଟି ସଦସ୍ୟ, ଗ୍ରାମୀଣ ବିକାଶ ସଂଘ ଓ ଗଣମାଧ୍ୟମର ଚାପରେ ହସ୍ପିଟାଲରୁ ମୃତଦେହ ଛାଡି ଦେଇଥିଲେ। ଏ ସମ୍ପର୍କରେ ସମ୍ପୃକ୍ତ ହସ୍ପିଟାଲ କର୍ତ୍ତୃପକ୍ଷ କୌଣସି ମତାମତ ଦେବା ପାଇଁ ମନା କରିଛନ୍ତି।
