ସୌରାଷ୍ଟ୍ର, ୧୬।୩ – ନିଜ ଅଧିନାୟକତ୍ୱରେ ଦୁଇଦିନ ତଳେ ସୌରାଷ୍ଟ୍ରକୁ ପ୍ରଥମଥର ଲାଗି ରଣ୍ଜୀ ଟ୍ରଫି ଚାମ୍ପିୟନ କରାଇଥିବା ଜୟଦେବ ଉନାଡକଟ୍ଙ୍କ ନିର୍ବନ୍ଧ ରବିବାର ଅନୁଷ୍ଠିତ ହୋଇଯାଇଛି। ୨୮ ବର୍ଷୀୟ ଉନାଡକଟ ତାଙ୍କ ଅଫିସିଆଲ ସୋସିଆଲ ମିଡିଆ ଆକାଉଣ୍ଟ ଇନ୍ଷ୍ଟାଗ୍ରାମରେ ଭାବିପତ୍ନୀଙ୍କ ସହ ଏକାଠି ଠିଆ ହୋଇଥିବାରୁ ଏକ ଫଟୋ ଶେୟାର କରିଛନ୍ତି। ଏହି ଫଟୋ ତଳେ ସେ ‘ଛ ଘଣ୍ଟା, ୨ ମିଲ୍ସ ଓ ପରେ ଏକ କେକ୍’ ବୋଲି କ୍ୟାପସନ୍ ଲେଖିବା ସହ ଏକ ମୁଦି ଓ ହାର୍ଟଚିତ୍ର ଛାଡ଼ିଛନ୍ତି। ତେବେ ସବୁଠାରୁ ଉଲ୍ଲେଖନୀୟ ଘଟଣା ହେଉଛି ଏହି ବାମହାତୀ ସୌରାଷ୍ଟ୍ର ଦ୍ରୁତ ବୋଲର ତାଙ୍କ ଭାବି ପତ୍ନୀଙ୍କ ନାମ ଏଥିରେ ଉଲ୍ଲେଖ କରିନାହାନ୍ତି। କିନ୍ତୁ ନିର୍ବନ୍ଧ ଉତ୍ସବରେ ଯୋଗ ଦେଇଥିବା ସାଥୀ ସୌରାଷ୍ଟ୍ର ଖେଳାଳି ତଥା ଭାରତୀୟ ଟେଷ୍ଟ ଦଳର ନିର୍ଭରଯୋଗ୍ୟ ବ୍ୟାଟ୍ସମ୍ୟାନ ଚେତେଶ୍ୱର ପୂଜାରା ଜୟଦେବଙ୍କ ଭାବିପତ୍ନୀଙ୍କ ନାମ ପ୍ରକାଶ କରିଛନ୍ତି। ପୂଜାରା ତାଙ୍କ ଟୁଇଟର୍ ଆକାଉଣ୍ଟରେ ନିର୍ବନ୍ଧ ଉତ୍ସବର ଏକ ଫଟୋ ଛାଡ଼ିଛନ୍ତି, ଯେଉଁଥିରେ ପତ୍ନୀ ପୂଜା ପବରୀଙ୍କ ସହ ପୂଜାରା ଠିଆ ହୋଇଛନ୍ତି ଏବଂ ପାଖରେ ଉନାଡକଟ୍ ଓ ତାଙ୍କ ଭାବି ପତ୍ନୀ ମଧ୍ୟ ରହିଛନ୍ତି। ଏହି ଫଟୋରେ ପୂଜାରା ଲେଖିଛନ୍ତି ‘ପରିବାରରେ ତୁମକୁ ସ୍ବାଗତ କରୁଛୁ ରିନ୍ନି। ମୋତେ ବହୁତ ଖୁସି ଲାଗୁଛି କି ମୋ ଭାଇକୁ ତା’ର ଜୀବନ ସାଥୀ ମିଳିଯାଇଛି’। ପ୍ରକାଶଯୋଗ୍ୟ, ନିଜର ପ୍ରଭାବୀ ବୋଲିଂ ବଳରେ ଉନାଡକଟ୍ ସୌରାଷ୍ଟ୍ରକୁ ପ୍ରଥମଥର ରଣ୍ଜୀ ଚାମ୍ପିୟନ କରାଇବାରେ ସଫଳ ହୋଇଛନ୍ତି। ବେଙ୍ଗଲ ବିପକ୍ଷ ଫାଇନାଲ ମ୍ୟାଚ୍ରେ ପ୍ରଥମ ଇନିଂସ ଅଗ୍ରଣୀ ଭିତ୍ତିରେ ସୌରାଷ୍ଟ୍ର ଚାମ୍ପିୟନ ହୋଇଥିଲା। ଚଳିତ ରଣ୍ଜୀ ସିଜନରେ ସେ ୧୩.୨୩ ଆଭରେଜରେ ମୋଟ୍ ୬୭ ଉଇକେଟ୍ ଅକ୍ତିଆର କରିଥିଲେ। ଏଥିସହ ଗୋଟିଏ ସିଜନରେ ରଣ୍ଜୀ ଟ୍ରଫିରେ ଦ୍ରୁତ ବୋଲର ଭାବେ ସର୍ବାଧିକ ଉଇକେଟ୍ ହାସଲ କରିବାରେ ସେ ୨୧ ବର୍ଷର ରେକର୍ଡ ଭାଙ୍ଗିଛନ୍ତି। ୧୯୯୮-୯୯ ସିଜନରେ କର୍ନାଟକର ଡୋଡ୍ଡା ଗଣେଶ ୬୫ ଉଇକେଟ୍ ନେଇ ଏହି ରେକର୍ଡର ଅଧିକାରୀ ରହିଥିଲେ।
