ନୂଆଦିଲ୍ଲୀ,୫ା୧୨(ପି.ଟି.): ଆଇଏନ୍ଏକ୍ସ ମିଡିଆ ମନିଲଣ୍ଡରିଂ ମାମଲାରେ ପୂର୍ବତନ ଅର୍ଥମନ୍ତ୍ରୀ ପି. ଚିଦାମ୍ବରମଙ୍କୁ ସୁପ୍ରିମକୋର୍ଟ ଜାମିନ ମଞ୍ଜୁର କରିବା ପରେ ବୁଧବାର ରାତିରେ ସେ ଜେଲ୍ରୁ ମୁକୁଳିଛନ୍ତି। ବରିଷ୍ଠ କଂଗ୍ରେସ ନେତାଙ୍କୁ ଜାମିନରେ ଛାଡ଼ିଲେ ସେ ସାକ୍ଷୀଙ୍କୁ ପ୍ରଭାବିତ କରିବା ସହ ପ୍ରମାଣ ନଷ୍ଟ କରିପାରନ୍ତି ବୋଲି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କରିଥିବା ଅଭିଯୋଗକୁ ଅଦାଲତ ଅଗ୍ରାହ୍ୟ କରିଦେଇଥିଲେ। ଚିଦାମ୍ବରମ କିମ୍ବା ତାଙ୍କ ତରଫରୁ କୌଣସି ବ୍ୟକ୍ତି ସାକ୍ଷୀଙ୍କୁ ଧମକ ଦେବା କିମ୍ବା ସାକ୍ଷ୍ୟ ଦେବାରୁ ବିରତ କରିବା ଭଳି ପ୍ରମାଣ ନାହିଁ। ତେଣୁ ଇଡିର ଯୁକ୍ତି ଗ୍ରହଣୀୟ ନୁହେଁ ବୋଲି ଖଣ୍ଡପୀଠ କହିଥିଲେ। ୧୦୬ ଦିନ ହାଜତରେ ରହିବା ପରେ ୭୪ ବର୍ଷୀୟ କଂଗ୍ରେସ ନେତା ତିହାର ଜେଲ୍ରୁ ମୁକ୍ତ ହୋଇଛନ୍ତି। ଜେଲ୍ ବାହାରେ ବହୁସଂଖ୍ୟାରେ ଦଳୀୟ କର୍ମୀ ଓ ସମର୍ଥକ ଉପସ୍ଥିତ ରହି ତାଙ୍କୁ ଫୁଲମାଳ ଦେଇ ସ୍ବାଗତ କରିଥିଲେ। ମାମଲା ସମ୍ପର୍କରେ ସେ ଗଣମାଧ୍ୟମକୁ ସାକ୍ଷାତକାର ଦେଇପାରିବେ ନାହିଁ କିମ୍ବା ସର୍ବସାଧାରଣରେ ମନ୍ତବ୍ୟ ରଖିପାରିବେ ନାହିଁ ବୋଲି ଅଦାଲତ କହିଛନ୍ତି। ଚିଦାମ୍ବରମଙ୍କ ରାଜ୍ୟର ଜଣେ ସାକ୍ଷୀ ତାଙ୍କ ସହ ମୁହଁ।ମୁହିଁ ହେବାକୁ ପ୍ରସ୍ତୁତ ନ ଥିବା ଲେଖି ଜଣାଇଥିବା ଇଡି କହିବାରୁ ଏଥିପାଇଁ ପୂର୍ବତନ ଅର୍ଥମନ୍ତ୍ରୀଙ୍କୁ ଦାୟୀ କରାଯାଇପାରିବ ନାହିଁ ବୋଲି ଖଣ୍ଡପୀଠ କହିଥିଲେ। ନଭେମ୍ବର ୧୫ରେ ଦିଲ୍ଲୀ ହାଇକୋର୍ଟ ଚିଦାମ୍ବରମଙ୍କ ଜାମିନ ଆବେଦନକୁ ଖାରଜ କରିଦେଇଥିଲେ। ଜଷ୍ଟିସ୍ ଆର୍. ବାନୁମଥିଙ୍କ ଅଧ୍ୟକ୍ଷତାରେ ଜଷ୍ଟିସ ଏ.ଏସ୍. ବୋପାନ୍ନା ଏବଂ ହୃଷୀକେଶ ରାୟଙ୍କୁ ନେଇ ଗଠିତ ଖଣ୍ଡପୀଠ ଏହି ରାୟକୁ ଖାରଜ କରିଦେଇଛନ୍ତି। ଚିଦାମ୍ବରମ ଦେଶଛାଡି ଚାଲିଯିବା ଆଶଙ୍କା ନାହିଁ ବୋଲି ହାଇକୋର୍ଟ ଯାହା କହିଛନ୍ତି ସେଥିରେ କୌଣସି ଆପତ୍ତି ନାହିଁ ବୋଲି ଇଡି ତରଫରୁ ସଲିସିଟର ଜେନେରାଲ ତୁଷାର ମେହେଟ୍ଟା ଅଦାଲତଙ୍କୁ କହିଥିଲେ। ତେବେ ସେ ସାକ୍ଷୀଙ୍କୁ ପ୍ରଭାବିତ କରିବା ଓ ପ୍ରମାଣ ନଷ୍ଟ କରିବା ଅଭିଯୋଗକୁ ଠିକ୍ ଭାବରେ ବିଚାରକୁ ନିଆଯାଇ ନାହିଁ। ଚିଦାମ୍ବରମଙ୍କ ସମ୍ପର୍କରେ ଅଧିକ ତଥ୍ୟପ୍ରମାଣ ସଂଗ୍ରହ କରିବାକୁ ଥିବାରୁ ପ୍ରମାଣ ନଷ୍ଟ ସମ୍ଭାବନାକୁ ଏଡାଇ ଦିଆଯାଇ ନ ପାରେ ବୋଲି ମେହେଟ୍ଟା କହିଥିଲେ। ତେବେ ଅଭିଯୁକ୍ତ ରାଜନୈତିକ କ୍ଷମତା କିମ୍ବା ପଦବୀରେ ନ ଥିବାରୁ ବର୍ତ୍ତମାନ ସ୍ଥିତିରେ ସେ ହସ୍ତକ୍ଷେପ କରିବା ସମ୍ଭାବନା ନାହିଁ। ତେଣୁ ଆନୁମାନିକ ଭାବେ ଅଭିଯୋଗକୁ ଗ୍ରହଣ କରାଯାଇପାରିବ ନାହିଁ ବୋଲି ଖଣ୍ଡପୀଠ କହିଥିଲେ।
ବରିଷ୍ଠ କଂଗ୍ରେସ ନେତା ଚିଦାମ୍ବରମଙ୍କୁ ୧୦୬ ଦିନ ଜେଲ୍ରେ ରଖିବା ସରକାରଙ୍କ ପ୍ରତିଶୋଧ ପରାୟଣ ମାନସିକତା ବୋଲି ଦଳର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ କହିଛନ୍ତି। ଚିଦାମ୍ବରମ ତାଙ୍କର ନିର୍ଦୋଷତା ପ୍ରମାଣିତ କରିପାରିବା ନେଇ ସେ ନିଶ୍ଚିତ ବୋଲି ରାହୁଲ ଦୃଢ଼ୋକ୍ତି ପ୍ରକାଶ କରିଛନ୍ତି। ଆଇଏନ୍ଏକ୍ସ ମିଡିଆ ଦୁର୍ନୀତି ମାମଲାରେ ଅଗଷ୍ଟ ୨୧ରେ ଚିଦାମ୍ବରମଙ୍କୁ ସିବିଆଇ ଗିରଫ କରିବା ଦିନଠାରୁ ସେ ହାଜତରେ ଥିଲେ। ଅକ୍ଟୋବର ୧୬ରେ ଇଡି ତାଙ୍କୁ ମନିଲଣ୍ଡରିଂ ମାମଲାରେ ଗିରଫ କରିଥିଲା। ଚିଦାମ୍ବରମଙ୍କ ବିରୋଧରେ ଏହା ସରକାରଙ୍କର ବଡ଼ ଷଡ଼ଯନ୍ତ୍ର ବୋଲି ଲୋକ ସଭାରେ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ କହିଛନ୍ତି।
