ଜିଲା ଭାଜପା କମିଟି ବୈଠକ: ସିଏଏ ସମ୍ପର୍କରେ ଲୋକଙ୍କୁ ସଚେତନ କରାଯିବ
7:46 amJanuary 8, 2020 / 21

ଅନୁଗୋଳ ଅଫିସ, ୮।୧- ଅନୁଗୋଳ ଜିଲା ଭାଜପା କମିଟି ପକ୍ଷରୁ ମଙ୍ଗଳବାର ସ୍ଥାନୀୟ ଜିଲା କଳା କେନ୍ଦ୍ରଠାରେ ଏକ ବୈଠକ ଅନୁଷ୍ଠିତ ହୋଇଯାଇଛି। ପ୍ରଥମେ ନୂତନ ସଭାପତି ଦୀଲେଶ୍ୱର ପ୍ରଧାନଙ୍କୁ ପୂର୍ବତନ ସଭାପତି ଭାଗୀରଥି ପ୍ରଧାନ ଦାୟିତ୍ୱ ହସ୍ତାନ୍ତର କରିବା ପରେ ନୂତନ ସଭାପତିଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ ହୋଇଥିଲା। ଏଥିରେ ନାଗରିକତ୍ୱ ସଂଶୋଧନ ଆଇନ (ସିଏଏ) ସମ୍ପର୍କରେ ଲୋକଙ୍କୁ ସଚେତନ କରିବାକୁ ଆସନ୍ତା ୧୧ ତାରିଖରେ ଅନୁଗୋଳରେ ଭାଜପା ପକ୍ଷରୁ ଏକ ଶୋଭାଯାତ୍ରା କରାଯିବ ବୋଲି ନିଷ୍ପତ୍ତି ନିଆଯାଇଥିଲା। ଏଥିସହ ଘର ଘର ବୁଲି ଭାଜପା ନେତା, କର୍ମୀ ଲୋକଙ୍କୁ ସଚେତନ କରିବେ ବୋଲି ଜିଲା ସଭାପତି ପ୍ରଧାନ ସୂଚନା ଦେଇଥିଲେ। ଏହି ବୈଠକରେ ରାଜ୍ୟ ସିଏଏ ସଂଯୋଜକ ଚନ୍ଦ୍ର ଶେଖର ନନ୍ଦ ଜିଲାର ୩୧ଟି ମଣ୍ଡଳ ସଭାପତିଙ୍କୁ ନାଗରିକ ସଂଶୋଧନ ଆଇନ କ’ଣ ଓ ଲୋକଙ୍କୁ ଏ ନେଇ କିପରି ସଚେତନ କରାଯିବ ତାହା ବୁଝାଇଥିଲେ।