ନୂଆଦିଲ୍ଲୀ,୩୦-୫: ସୁପ୍ରିମକୋର୍ଟ ସାମଗ୍ରୀ ଏବଂ ସେବା ଟିକସ(ଜିଏସ୍ଟି) ଫାଙ୍କି ଅଭିଯୋଗରେ ଟିକସ ଅଧିକାରୀଙ୍କ ଦ୍ୱାରା ଯେକୌଣସି ବ୍ୟକ୍ତିଙ୍କୁ ଗିରଫ କରିବାର ଅଧିକାର ରହିଛି କି ନା ତାହାର ସମୀକ୍ଷା କରିବେ। ଟିକସ ଅଧିକାରୀଙ୍କ ଅଧିକାରକୁ ନେଇ ସର୍ବୋଚ୍ଚ ଅଦାଲତରେ ମାମଲା ଦାଏର ହୋଇଛି। ବୁଧବାର ଅଦାଲତ ଏହା ଉପରେ ବିଚାର କରିବା ଲାଗି ଏକମତ ହୋଇଛନ୍ତି। ଏଥିସହିତ ସର୍ବୋଚ୍ଚ ଅଦାଲତ କେନ୍ଦ୍ର ସରକାରଙ୍କୁ ନୋଟିସ ମଧ୍ୟ ଜାରି କରିଛନ୍ତି। ପ୍ରଧାନ ବିଚାରପତି ରଞ୍ଜନ ଗୋଗୋଇ ଓ ଜଷ୍ଟିସ ଅନିରୁଦ୍ଧ ବୋଷ୍ଙ୍କ ଅବକାଶକାଳୀନ ଖଣ୍ଡପୀଠ ଏହାର ପ୍ରାରମ୍ଭିକ ଶୁଣାଣି କରିଥିଲେ ଏବଂ ଏହାର ଶୁଣାଣି ୩ ଜଣିଆ ଖଣ୍ଡପୀଠରେ ହେବ ବୋଲି ନିର୍ଦ୍ଦେଶ ଦେଇଥିଲେ। ଖଣ୍ଡପୀଠ ଦର୍ଶାଇଛନ୍ତି ଯେ, ଜିଏସ୍ଟି ଫାଙ୍କି କ୍ଷେତ୍ରରେ ଅଭିଯୁକ୍ତଙ୍କୁ ଅଗ୍ରିମ ଜାମିନ ପ୍ରଦାନ ବେଳେ ବିଭିନ୍ନ ହାଇକୋର୍ଟ ଭିନ୍ନ ଦୃଷ୍ଟିକୋଣ ଆପଣାଇଛନ୍ତି। ଏଣୁ ଜିଏସ୍ଟି ଆଇନ ଅଧୀନରେ ଗିରଫ କରିବାର ଅଧିକାର ବ୍ୟବସ୍ଥା ଉପରେ ନିଷ୍ପତ୍ତି ନେବାର ଆବଶ୍ୟକତା ଦେଖାଦେଇଛି। ସମସ୍ତ ହାଇକୋର୍ଟ ଜିଏସ୍ଟି ଫାଙ୍କି ମାମଲାରେ ଆଗୁଆ ଜାମିନ ପ୍ରଦାନ ବେଳେ ସର୍ବୋଚ୍ଚ ଅଦାଲତର ପୂର୍ବ ଆଦେଶକୁ ଧ୍ୟାନରେ ରଖିବା ଲାଗି ଖଣ୍ଡପୀଠ ତାଙ୍କ ନିର୍ଦ୍ଦେଶରେ କହିଛନ୍ତି। ବାସ୍ତବରେ ତେଲେଙ୍ଗାନା ହାଇକୋର୍ଟଙ୍କ ସମ୍ପର୍କରେ ଖଣ୍ଡପୀଠ ଏହା ଉଲ୍ଲେଖ କରିଥିଲେ। ସୂଚନାଥାଉ କି, ପୂର୍ବରୁ ତେଲେଙ୍ଗାନା ହାଇକୋର୍ଟ ତାଙ୍କ ରାୟରେ ଦର୍ଶାଇଥିଲେ ଯେ, ଏଭଳି ମାମଲାରେ କୌଣସି ବ୍ୟକ୍ତିଙ୍କୁ ଗିରଫଦାରୀରୁ ରକ୍ଷା କରାଯାଇପାରିବ ନାହିଁ। ତେବେ ତେଲେଙ୍ଗାନା ହାଇକୋର୍ଟଙ୍କ ରାୟକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ଏହାର ଶୁଣାଣି କରି ସର୍ବୋଚ୍ଚ ଅଦାଲତ ଗତ ୨୭ରେ ଏହାକୁ ଖାରଜ କରି ହାଇକୋର୍ଟଙ୍କ ରାୟକୁ କାଏମ ରଖିଥିଲେ।
