ଭୁବନେଶ୍ୱର,୨୧।୧୨ (ସ୍ପୋଟର୍ସ ବ୍ୟୁରୋ)- ସ୍ଥାନୀୟ ଇଷ୍ଟକୋଷ୍ଟ ରେଲଓ୍ବେ ଇନଡୋର ଷ୍ଟାଡିୟମରେ ଚାଲିଥିବା ୩୩ତମ ଜାତୀୟ ସବ- ଜୁନିୟର ବ୍ୟାଡମିଣ୍ଟନ ଚାମ୍ପିୟନଶିପ୍ ଏସିଆ ଜୁନିୟର ୧୫ ବର୍ଷରୁ କମ୍ ବାଳିକା ରନର୍ସଅପ୍ ତାରା ଶାହା ପ୍ରଥମ ଖେଳାଳିଭାବେ ସେମିଫାଇନାଲରେ ପ୍ରବେଶ କରିଛନ୍ତି। ଟପ୍ ସିଡ ମାନ୍ୟତା ପାଇଥିବା ପୁଣେର ତାରା ୧୫ ବର୍ଷରୁ କମ୍ ପ୍ରଥମ ସିଙ୍ଗଲ୍ସ କ୍ୱାର୍ଟର ଫାଇନାଲରେ ହାରିୟାଣାର ଉନାତି ହୁଦାଙ୍କୁ ୨୧-୧୬, ୨୧-୧୮ରେ ହରାଇ ସେମିକୁ ଉଠିଛନ୍ତି। ଅନ୍ୟଏକ କ୍ୱାର୍ଟର ଫାଇନାଲରେ ଅଷ୍ଟମ ସିଡ ହରିୟାଣାର ଦେବିକା ସିହାଗ ଚତୁର୍ଥ ସିଡ୍ ଖେଳାଳି ରାଧିକା ଶର୍ମାଙ୍କୁ ସିଧାସଳଖ ଗେମ୍ରେ ହରାଇ ସେମିରେ ପ୍ରବେଶ କରିଛନ୍ତି। ଅନ୍ୟପଟେ ବାଳକ ଡବଲ୍ସ ଇଭେଣ୍ଟରେ ଓଡ଼ିଶାର ଆୟୁଷ ପଟ୍ଟନାୟକ ଓ କର୍ନାଟକର ସୁହାସ୍ ୨୧-୧୯,୨୧-୧୬ରେ ଓଡ଼ିଶାର ଅୟୁଷ ଦାଶ ଓ ପାର୍ଥସାରଥି ମିଶ୍ରଙ୍କୁ ହରାଇ କ୍ୱାର୍ଟର ଫାଇନାଲରେ ପ୍ରବେଶ କରିନ୍ତି।
ଅପରପକ୍ଷରେ ୧୭ ବର୍ଷରୁ କମ ସିଙ୍ଗଲ୍ସ ଇଭେଣ୍ଟରେ ଟପ୍ ସିଡ ତେଲଙ୍ଗାନାର ପ୍ରଣବ ରାଓ ଗନ୍ଧାମ, ତୃତୀୟ ସିଡ ହରିୟାଣାର ଜୟନ ରାଣା ଓ ଚତୁର୍ଥ ସିଡ ଉତ୍ତରପ୍ରଦେଶର ଆୟୁଷ ରାଜ ଗୁପ୍ତା ସେମାନଙ୍କ ମ୍ୟାଚ୍ ଜିତି କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ପ୍ରଥମ ଦିବସରେ ଡବଲ୍ସ ଓ ମିକ୍ସଡ ଡବଲ୍ସ ମ୍ୟାଚ୍ଗୁଡିକ ମଧ୍ୟ ଖେଳାଯାଇଥିଲା ଓ କୋତୋଟି ବିପର୍ଯ୍ୟୟ ଦେଖିବାକୁ ମିଳିଥିଲା।
