ଜାତିସଂଘ,୨୮।୯(ପି.ଟି.):ଆତଙ୍କବାଦ କୌଣସି ଗୋଟିଏ ଦେଶ ପାଇଁ ନୁହେଁ, ବରଂ ସାରା ବିଶ୍ୱ ପାଇଁ ଆହ୍ବାନ ଭାବେ ଉଭା ହୋଇଛି। ଆତଙ୍କବାଦକୁ ସବୁଠୁ ବଡ଼ ବିପଦ ଭାବେ ଅଭିହିତ କରି ଏହା ବିରୋଧରେ ଲଢ଼େଇ କରିବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଜାତିସଂଘରେ ବିଶ୍ୱ ସମୁଦାୟକୁ ଆହ୍ବାନ ଦେଇଛନ୍ତି। ପ୍ରଧାନମନ୍ତ୍ରୀ ମୋଦି ଶୁକ୍ରବାର ଭାରତୀୟ ସମୟ ରାତି ୭ଟା ୩୦ ମିନିଟରେ ଜାତିସଂଘ ସାଧାରଣ ସଭା (ୟୁଏନ୍ଜିଏ)କୁ ସମ୍ବୋଧିତ କରିଛନ୍ତି। ୟୁଏନ୍ଜିଏର ୭୪ତମ ଅଧିବେଶନରେ ମୋଦି ବିକାଶ, ନିରାପତ୍ତା, ଆତଙ୍କବାଦ ନିରୋଧୀ ଲଢ଼େଇ ଓ ଜଳବାୟୁ ପରିବର୍ତ୍ତନ ଆଦି ପ୍ରସଙ୍ଗକୁ ଗୁରୁତ୍ୱ ଦେଇଛନ୍ତି। ମୋଦି ହିନ୍ଦୀରେ ଅଭିଭାଷଣ ଦେଇ କହିଛନ୍ତି, ଆତଙ୍କବାଦ ପ୍ରସଙ୍ଗରେ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ସହମତି ପ୍ରକାଶ ନ ପାଇବା ଦୁର୍ଭାଗ୍ୟଜନକ। ଜାତିସଂଘ ଯେଉଁ ସିଦ୍ଧାନ୍ତଗୁଡ଼ିକୁ ନେଇ ପ୍ରତିଷ୍ଠା କରାଯାଇଥିଲା ଅସହମତି ତା’ର ପରିପନ୍ଥୀ। ଭାରତ ସେହି ଦେଶ, ଯାହା ବିଶ୍ୱକୁ ଯୁଦ୍ଧ ନୁହେଁ ବରଂ ବୁଦ୍ଧଙ୍କ ଶାନ୍ତିର ବାର୍ତ୍ତା। ଏଥିଯୋଗୁଁ ଆତଙ୍କବାଦ ବିରୋଧରେ ଆମର ସ୍ବର ବିଶ୍ୱକୁ ସତର୍କ କରାଇଛି। ମାନବିକତା ପାଇଁ ଆତଙ୍କବାଦ ବିରୋଧରେ ବିଶ୍ୱ ଏକାଠି ହେବା ଜରୁରୀ ହୋଇପଡ଼ିଛି ବୋଲି ମୋଦି କହିଛନ୍ତି। ଭାରତକୁ ପ୍ଲାଷ୍ଟିକ୍ମୁକ୍ତ କରିବା ନେଇ ନିଆଯାଉଥିବା ପଦକ୍ଷେପ ସମ୍ପର୍କରେ ମଧ୍ୟ ମୋଦି ନିଜ ବକ୍ତବ୍ୟ ରଖିଥିଲେ। ଥରୁଟିଏ ବ୍ୟବହାର ହେଉଥିବା ପ୍ଲାଷ୍ଟିକ୍ରୁ ଜାତିସଂଘକୁ ମୁକ୍ତ କରିବା ପାଇଁ ଏହାର ପ୍ରବେଶପଥରେ ଆହ୍ବାନ ଦିଆଯାଇଛି। ବିଶ୍ୱର ସମସ୍ତ ରାଷ୍ଟ୍ର ଏହି କ୍ଷେତ୍ରରେ ଅଭିଯାନ ଜାରି ରଖିବା ଉଚିତ। ବିଗତ ୫ ବର୍ଷରେ ‘କ୍ଲିନ୍ ଇଣ୍ଡିଆ ମିଶନ’ରେ ଭାରତରେ ୧୧ କୋଟି ଶୌଚାଳୟ ତିଆରି କରାଯାଇଛି। ଏହା ବିଶ୍ୱ ପାଇଁ ଏକ ପ୍ରେରଣାଦାୟକ ସନ୍ଦେଶ। ଭାରତ ସରକାରଙ୍କ ପକ୍ଷରୁ ଆରମ୍ଭ କରାଯାଇଥିବା ଏଭଳି ଜନମଙ୍ଗଳକାରୀ ଯୋଜନାଗୁଡ଼ିକ ବିଶ୍ୱ ପାଇଁ ନୂଆ ଆଶା ଓ ବିଶ୍ୱାସ ସୃଷ୍ଟି କରିଛି। ବିକାଶଶୀଳ ଦେଶଗୁଡ଼ିକ ଏହାକୁ ଦୃଷ୍ଟାନ୍ତ ଭାବେ ଗ୍ରହଣ କରି ଯୋଜନା ଓ ପ୍ରକଳ୍ପଗୁଡ଼ିର ଅନୁଭୂତିକୁ ଗ୍ରହଣ କରିପାରିବେ। ଜଳବାୟୁ ପରିବର୍ତ୍ତନର ମୁକାବିଲା ଭାରତ ନେତୃତ୍ୱ ନେଉଛି। ବିଶ୍ୱତାପନର ସମାଧାନ କ୍ଷେତ୍ରରେ ପଦକ୍ଷେପ ନେବାରେ ଭାରତ ଏକ ଅଗ୍ରଣୀ ରାଷ୍ଟ୍ର। ମହାମତ୍ା ଗାନ୍ଧୀଙ୍କ ସତ୍ୟ ଓ ଅହିଂସାର ବାର୍ତ୍ତା ଆଜି ମଧ୍ୟ ଶାନ୍ତି, ବିକାଶ ଏବଂ ପ୍ରଗତି ପାଇଁ ପ୍ରାସଙ୍ଗିକ। ତେଣୁ ସାରା ବିଶ୍ୱ ତାଙ୍କର ୧୫୦ତମ ଜୟନ୍ତୀ ପାଳନ କରୁଥିବାବେଳେ
ଜାତିସଂଘ ସାଧାରଣ ସଭାକୁ ସମ୍ବୋଧନ ଏକ ସ୍ବତନ୍ତ୍ର ଅବସର ବୋଲି ମୋଦି କହିଛନ୍ତି। ତେବେ ପ୍ରଧାନମନ୍ତ୍ରୀ କଶ୍ମୀର ପ୍ରସଙ୍ଗରେ ମୁହଁ ଖୋଲିନାହାନ୍ତି।
