ଭୁବନେଶ୍ୱର, ୫ା୪ (ବ୍ୟୁରୋ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ରାତି ୯ଟାରେ ସ୍ୱେଚ୍ଛାକୃତ ଭାବେ ଘର ଲାଇଟ ବନ୍ଦ କରିବା ପାଇଁ ଅନୁରୋଧ କରିଛନ୍ତି। ଏହି ସମୟରେ କେବଳ ଲାଇଟ ସୁଇଜ ବନ୍ଦ କରିବା ପାଇଁ ରାଜ୍ୟ ଶକ୍ତି ବିଭାଗ ପକ୍ଷରୁ ଜନସାଧାରଣଙ୍କୁ ନିବେଦନ କରାଯାଇଛି। ବିଭାଗ ପକ୍ଷରୁ କୁହାଯାଇଛି ଯେ, ଏହି ସମୟରେ ହଠାତ୍ ଲୋଡ କମିବା କିମ୍ବା ବଢ଼ିବାର ସମ୍ଭାବନା ଅଛି। ଏହା ଦ୍ୱାରା ଆମ ରାଜ୍ୟ ଓ ଦେଶରେ ବିଦ୍ୟୁତ୍ ବିଭ୍ରାଟ ହେବାର ଆଶଙ୍କା ରହିଛି। ଏହା ନ ହେବା ପାଇଁ ବିଦ୍ୟୁତ୍ ବିଭାଗ ରାଜ୍ୟ ଏବଂ ଦେଶ ସ୍ତରରେ ବିଭିନ୍ନ ପଦକ୍ଷେପ ନେଉଛନ୍ତି। ତେଣୁ ରାତି ୯ଟାରେ କେବଳ ଲାଇଟ୍ ସୁଇଜ୍ ବନ୍ଦ କରିବା ପାଇଁ ବିଭାଗ ପକ୍ଷରୁ ନିବେଦନ କରାଯାଇଛି। ବିଭାଗ ପକ୍ଷରୁ କୁହାଯାଇଛି ଯେ, ଅନ୍ୟ କୌଣସି ସୁଇଜ୍ ବନ୍ଦ କରନ୍ତୁ ନାହିଁ। ମେନ୍ ସୁଇଜ୍ ଆଦୌ ବନ୍ଦ କରନ୍ତୁ ନାହିଁ। ଲାଇଟ୍ ସୁଇଜ୍ ଗୁଡ଼ିକ ଏକା ସାଙ୍ଗରେ ବନ୍ଦ ନ କରି, ଏହି ସମୟର କିଛି ପୂର୍ବରୁ ଏବଂ କିଛି ସମୟ ପରେ ଛାଡ଼ି ଛାଡ଼ି ବନ୍ଦ କରନ୍ତୁ ଓ ଅନ୍ କରିବାକୁ ପରାମର୍ଶ ଦିଆଯାଇଛି।
