ରାଜନଗର,୨୨।୩(ଡି.ଏନ୍.ଏ.): ମହାମାରୀ ରୂପ ଧାରଣ କରିଥିବା କରୋନା ଭୂତାଣୁଠାରୁ ଦୂରରେ ରହିବା ପାଇଁ ପ୍ରଧାନମନ୍ତ୍ରୀ ଜନତା କର୍ଫ୍ୟୁ ଆହ୍ବାନ ଦେଇଛନ୍ତି। ଏହି ଆହ୍ବାନକୁ କେନ୍ଦ୍ରାପଡ଼ା ଜିଲା ରାଜନଗର ବ୍ଲକ ଅଞ୍ଚଳରେ ସମ୍ପୂର୍ଣ୍ଣ ପାଳନ କରାଯାଇଛି। ସବୁବେଳେ ଜନଗହଳି ଲାଗି ରହୁଥିବା ରାଜନଗର, ସାନବଡ଼ ଗୋପାଳପୁର, ଜରିମୂଳ, ତାଳଚୁଆ ଆଦି ଅଞ୍ଚଳ ଆଜି ଖାଁ ଖାଁ ଲାଗୁଛି। ଏନେଇ ରାଜନଗର ପୋଲିସ ପକ୍ଷରୁ ଶନିବାର ଗାଁ ଗାଁରେ ଜନସଚେତନତା ସୃଷ୍ଟି କରାଯାଇଥିଲା। ରବିବାର ରାଜନଗର ଥାନା ଇନ୍ସପେକ୍ଟର ତପନ କୁମାର ନାୟକ, ବିଡିଓ ମନ୍ଦରଧର ମହାଳିକ, ତହସିଲଦାର ଭୋଳାନାଥ ସେଠୀ ଓ ପୋଲିସ ବାହିନୀ ବିଭିନ୍ନ ସ୍ଥାନ ବୁଲି ଅନୁଧ୍ୟାନ କରିଛନ୍ତି।
