ଜଟଣୀ, ୩୧ା୭ (ଡି.ଏନ.ଏ.): ପାରାଦୀପରେ ଏଲ୍ପିଜି ଇମ୍ପୋର୍ଟ ଟର୍ମିନାଲ,ଖୋର୍ଦ୍ଧାରେ ଏଲ୍ପିଜି ବଟ୍ଲିଂ ପ୍ଲାଣ୍ଟ, ବ୍ରହ୍ମପୁରରେ ଅନ୍ୟ ତୈଳ କମ୍ପାନୀ ସହ ମିଶି ଡିପୋ ଟର୍ମିନାଲ ସ୍ଥାପନ ହେବାକୁ ଯାଉଥିବା ଓଡ଼ିଶାସ୍ଥିତ ଆଇଓସିଏଲ୍ର ଚିଫ ଜେନେରାଲ ମ୍ୟାନେଜର(ସିଜିଏମ୍) ଶୁଭୋଜିତ ଘୋଷ କହିଛନ୍ତି। ଜଟଣୀସ୍ଥିତ ଆଇଓସିଏଲ ସ୍ମାର୍ଟ ଟର୍ମିନାଲ ପରିସରରେ ସୁରକ୍ଷା ଓ ନିରାପତ୍ତା ଉପରେ ମଙ୍ଗଳବାର ଅନୁଷ୍ଠିତ ମକ୍ଡ୍ରିଲ ପରିପ୍ରେକ୍ଷୀରେ ଗଣମାଧ୍ୟମକୁ ସିଜିଏମ୍ ଘୋଷ ଏହା କହିଥିଲେ। ୧୧ ଶହ କୋଟି ଟଙ୍କା ନିବେଶରେ ଉପରୋକ୍ତ ୩ଟି ପ୍ରକଳ୍ପ ସ୍ଥାପନ ହେବ। ଏଥିରେ ପ୍ରତ୍ୟକ୍ଷ ଓ ପରୋକ୍ଷ ଭାବେ ଅନେକ ନିଯୁକ୍ତି ସୃଷ୍ଟି ହେବ। ସେହିପରି ପ୍ରଦୂଷଣ ମୁକ୍ତ ପରିବେଶ ପାଇଁ ପେଟ୍ରୋଲ ପମ୍ପଗୁଡ଼ିକୁ କିପରି ସବ୍ସିଡି ସୁବିଧା ଦିଆଯାଇ ସୋଲାର ବ୍ୟବସ୍ଥା କରାଯାଉଛି ସେ ନେଇ ସୂଚନା ଦେଇଥିଲେ। ଏଥିସହ ବିଭିନ୍ନ ସମୟରେ ତେଲ ଚୋରି ଭଳି ଘଟଣାକୁ ରୋକିବା ପାଇଁ ଇ-ଲକିଂ ବ୍ୟବସ୍ଥା ପ୍ରଚଳନ ସହ କର୍ପୋରେଟ୍ ସାମାଜିକ ଦାୟିତ୍ୱବୋଧ (ସିଏସ୍ଆର୍) ଉପରେ ଆଇଓସିଏଲ୍ କିପରି ଗୁରୁତ୍ୱ ପ୍ରଦାନ କରୁଛି ସେନେଇ କହିଥିଲେ। ସାମାଜିକ ଦାୟିତ୍ୱବୋଧରେ ପରିବେଶ, ସ୍ବାସ୍ଥ୍ୟସେବା, ପରିମଳ, ପାନୀୟ ଜଳ ସୁବିଧା, ଶିକ୍ଷା, ଦକ୍ଷତା ବିକାଶ, ମହିଳା ସଶକ୍ତୀକରଣ ଆଦି ବିଭିନ୍ନ କ୍ଷେତ୍ରରେ କମ୍ପାନୀ କାର୍ଯ୍ୟ କରୁଛି। ସେହିପରି ରାଜସ୍ବ ଆଦାୟ କ୍ଷେତ୍ରରେ ଦେଶର ଏହି ବୃହତ କମ୍ପାନୀ ‘ଫର୍ଚୁନ୍-୫୦୦ ଇଣ୍ଡିଆ’ ତାଲିକାରେ ଶୀର୍ଷସ୍ଥାନ ଓ ୨୦୧୯ ‘ଫର୍ଚୁନ୍ ଗ୍ଲୋବାଲ୍-୫୦୦’ରେ ୧୧୭ ସ୍ଥାନ ଅଧିକାର କରିଛି। ୩୩ ହଜାରରୁ ଅଧିକ ଶ୍ରମଶକ୍ତି, ବ୍ୟାପକ ଶୋଧନ, ବିତରଣ, ବଜାରୀକରଣ ଭିତ୍ତିଭୂମି, ଉନ୍ନତ ଅନୁସନ୍ଧାନ ଓ ବିକାଶ ସୁବିଧା ସହ ସାମାଜିକ-ଅର୍ଥନୈତିକ ବିକାଶଧାରାକୁ ତ୍ୱରାନ୍ବିତ କରିବା ଦିଗରେ ମହତ୍ତ୍ୱପୂର୍ଣ୍ଣ ଭୂମିକା କମ୍ପାନୀ ଗ୍ରହଣ କରିପାରିଛି। ୨୦୧୮-୧୯ ଆର୍ଥତ୍କ ବର୍ଷରେ କମ୍ପାନୀ ୬,୦୫,୯୨୪ କୋଟି ଟଙ୍କା ବ୍ୟବସାୟ ସହ ୧୬,୮୯୫ କୋଟି ଟଙ୍କା ପ୍ରତ୍ୟକ୍ଷ ଲାଭ କରିଛି। ଏଥିରେ ଅନ୍ୟମାନଙ୍କ ମଧ୍ୟରେ ଜିଏମ୍ (ଅପରେଶନ୍) ରବି କୁମାର, ଜଟଣୀ ଟର୍ମିନାଲର ଜିଏମ୍ ଏନ୍.ସି. ସେଠୀ, କଲିକତା କର୍ପୋରେଟ କମ୍ୟୁନିକେଶନର ଜିଏମ୍ ଅରୂପ ଦାସ, ଚିଫ୍ ମ୍ୟାନେଜର ଶ୍ରୀନିବାସ ପାତ୍ର ଓ ଅନ୍ୟ ଅଧିକାରୀମାନେ ଉପସ୍ଥିତ ରହିଥିଲେ।
ଜଟଣୀ ସ୍ମାର୍ଟ ଟର୍ମିନାଲ ପରିସରରେ ସୁରକ୍ଷା ଓ ନିରାପତ୍ତା ଉପରେ ଆଇଓସିଏଲ୍ କିପରି ସବୁବେଳେ ପ୍ରସ୍ତୁତ ରହିଛି ସେ ନେଇ ମକ୍ଡ୍ରିଲ୍ ମାଧ୍ୟମରେ ପ୍ରଦର୍ଶିତ କରାଯାଇଥିଲା। ହଠାତ୍ ଯଦି ତେଲ ଲିକ୍ ହୋଇ ନିଅଁା ଲାଗି ଯାଏ ବା କୌଣସି ଦୁର୍ଘଟଣା ଘଟେ ଦାୟିତ୍ୱରେ ଥିବା କର୍ମଚାରୀ କିପରି ପ୍ରଥମେ ଜୋର ପାଟି କରିବା, ୱାକିଟକି ମାଧ୍ୟମରେ କଣ୍ଟ୍ରୋଲ ରୁମ୍କୁ ଖବର ଦେବା, ସାଇରନ୍ ବାଜିବା ଆଦି ରହିଥିବା ବିଭିନ୍ନ ପର୍ଯ୍ୟାୟର ସୁରକ୍ଷା ବ୍ୟବସ୍ଥା ଏହି ମକ୍ଡ୍ରିଲରେ ସ୍ଥାନ ପାଇଥିଲା। ରହିଥିବା କୋମ୍ବାଟ ଟିମ୍, ଅକ୍ସିଲାରି ଟିମ୍ ଓ ରେସ୍କ୍ୟୁ ଟିମ୍ର ତାଲିମପ୍ରାପ୍ତ ସଦସ୍ୟମାନେ ଘଟଣାସ୍ଥଳରେ ପହଞ୍ଚତ୍ ନିଅଁାକୁ ଆୟତ କରିବା, ଆହତ ବ୍ୟକ୍ତିଙ୍କୁ ଚିକିତ୍ସା ସୁବିଧା ଆଦି ନାନା ସୁରକ୍ଷା ସମ୍ବନ୍ଧିତ ମକ୍ଡ୍ରିଲ ମାଧ୍ୟମରେ ସମ୍ପାଦନ କରିଥିଲେ।
