ବଡ଼ବିଲ,୧୩ା୫(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ଥାନା ଅନ୍ତର୍ଗତ ବଳିତା ଗାଁ ନିକଟ ଜଙ୍ଗଲରୁ ରବିବାର ପୂର୍ବାହ୍ନରେ ଯୋଡ଼ା ଥାନା ଲହଣ୍ଡା ମୁଣ୍ଡା ସାହିର ୭୦ ବର୍ଷୀୟା ବୁଦୁନି ମୁଣ୍ଡାଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର ଘଟଣାର ପର୍ଦ୍ଦାଫାଶ କରିଛି ବଡ଼ବିଲ ପୋଲିସ। ଡାହାଣୀ ସନ୍ଦେହରେ ଶାଶୁ ବୁଦୁନିଙ୍କୁ ହତ୍ୟା ପରେ ପୋଡ଼ି ଦେଇଥିବା ଅଭିଯୋଗରେ ପୋଲିସ ବୁଦୁନିଙ୍କ ସମ୍ପର୍କୀୟ ବୋହୂ ସବିତା ମୁଣ୍ଡାଙ୍କୁ ବୁଧବାର ସକାଳେ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି। ପୋଲିସ ଅଭିଯୁକ୍ତ ସବିତାଙ୍କ ନିକଟରୁ ହତ୍ୟାରେ ବ୍ୟବହୃତ ଏକ ରକ୍ତ ରଞ୍ଜିତ କଟୁରି ଓ ଲୁଗା ଜବତ କରିଛି।
ମିଳିଥିବା ସୂଚନା ଅନୁଯାୟୀ, ଗତ ରବିବାର ସକାଳେ ବଡ଼ବିଲ ଥାନା ବଳିତା ଜଙ୍ଗଲରୁ ୭୦ ବର୍ଷୀୟା ବୁଦୁନି ମୁଣ୍ଡାଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର ହୋଇଥିଲା। ତାଙ୍କୁ ହତ୍ୟା କରାଯାଇଥିବା ଓ ଏହି ଘଟଣାରେ ସମ୍ପର୍କୀୟ ବୋହୂର ସଂପୃକ୍ତି ନେଇ ବୁଦୁନିଙ୍କ ପୁଅ ସାହେବ ମୁଣ୍ଡା ଅଭିଯୋଗ କରିଥିଲେ। ଏ ନେଇ ବଡ଼ବିଲ ପୋଲିସ କେସ୍ ନଂ ୭୫/୨୦ ଅନୁଯାୟୀ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ପହଞ୍ଚି ପୋଲିସର ତଦନ୍ତରେ ସହାୟତା କରିଥିଲାବେଳେ ଏହି ଘଟଣାର ପର୍ଦ୍ଦାଫାଶ କରିବାକୁ ସକ୍ଷମ ହୋଇଛି ପୋଲିସ। ଘଟଣା ପରଠାରୁ ସମ୍ପର୍କୀୟ ବୋହୂ ସବିତା ଫେରାର ଥିବାରୁ ତାଙ୍କ ଉପରେ ପୋଲିସର ସନ୍ଦେହ ଘନୀଭୂତ ହୋଇଥିଲା। ଜଙ୍ଗଲରେ ଲୁଚି ରହିଥିବା ସବିତାଙ୍କୁ ପୋଲିସ ବୁଧବାର ଦିନ ଗିରଫ କରି ପଚରା ଉଚରା କରିବାରୁ ଡାହାଣୀ ସନ୍ଦେହରେ ଶାଶୁ ବୁଦୁନିଙ୍କୁ ହତ୍ୟା ପରେ ପୋଡ଼ି ଦେଇଥିବା ସେ ସ୍ବୀକାର କରିଛନ୍ତି।
