ଭୁବନେଶ୍ୱର,୨୬।୧୧(ବ୍ୟୁରୋ):ଜଗତସିଂହପୁର ଜିଲାରେ ଦଳିତ ଯୁବତୀ ଆତ୍ମହତ୍ୟାକୁ ନେଇ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ବିବୃତି ରଖିଛନ୍ତି। ଶୂନ୍ୟକାଳ ଆରମ୍ଭ ହେବାମାତ୍ରେ ମନ୍ତ୍ରୀ ଗୃହକୁ ସୂଚନା ଦେଇ କହିଛନ୍ତି ଯେ, ଜଗତସିଂହପୁର ଜିଲାର ନୂଆଗାଁ ଥାନା ଅଧୀନ ତେନ୍ତୁଇ ଗ୍ରାମରେ ଜଣେ ଯୁବତୀ ରଶି ଲଗାଇ ଆତ୍ମହତ୍ୟା କରିଥିଲେ। ମୃତକଙ୍କ ମା’ ଏନେଇ ଥାନାରେ ଅଭିଯୋଗ କରିଥିଲେ। ସେ କହିଥିଲେ ଯେ, ଝିଅର ଆତ୍ମହତ୍ୟା ଏକପାଖିଆ ପ୍ରେମ ସମ୍ପର୍କ ପାଇଁ ହୋଇଛି। ଜଣେ ପଡୋଶୀ ଦୀପକ ବେଉରା ତାଙ୍କ ଝିଅ ଆପତ୍ତିଜନକ ଫଟୋ ଉଠାଇ ସେଗୁଡିକ ତାଙ୍କ ଘର କାନ୍ଥରେ ଲଗାଇଥିଲେ। ଏଥିଯୋଗୁ ତାଙ୍କ ଝିଅ ଆତ୍ମହତ୍ୟା କରିଛନ୍ତି। ଏହି ରିପୋର୍ଟ ଆଧାରରେ ଆଇପିସି ୨୯୨(୨)(ଏ)/୩୦୬ରେ ନୂଆଗାଁ ଥାନାରେ ୧୬୫/୧୯ କେସ୍ ନମ୍ବର ରୁଜୁ କରାଯାଇ ଅଭିଯୁକ୍ତ ଦୀପକ ବେଉରାଙ୍କ ନାଁରେ ମାମଲା ରୁଜୁ କରାଯାଇଛି। ତଦନ୍ତକାରୀ ଅଧିକାରୀ ତୁରନ୍ତ ଘଟଣାସ୍ଥଳକୁ ଯାଇ ପରିବାର ସଦସ୍ୟଙ୍କୁ ପଚରାଉଚରା କରିବା ସହିତ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଥିଲେ। ମୃତକଙ୍କ ଆପତ୍ତିଜନକ ଫଟୋ ଏବଂ ଅନ୍ୟ ପ୍ରମାଣପତ୍ରକୁ ପୋଲିସ ଜବତ କରିଛି। ପ୍ରତ୍ୟକ୍ଷଦର୍ଶୀଙ୍କ ମତକୁ ଯାଞ୍ଚ କରାଯାଉଛି। ପ୍ରାଥମିକ ତଦନ୍ତରେ ଦୀପକ ବେଉରାଙ୍କ ବିରୋଧରେ ପ୍ରମାଣ କହିଛି। ଏଥିପାଇଁ ନଭେମ୍ବର ୯ ତାରିଖରୁ ତାଙ୍କୁ ଗିରଫ କରାଯାଇଛି। ଅଭିଯୁକ୍ତ ବର୍ତ୍ତମାନ ବିଚାର ବିଭାଗୀୟ ହେପାଜନରେ ରହିଛନ୍ତି। ବ୍ୟବଚ୍ଛେଦ ରିପୋର୍ଟରୁ ଜଣାଯାଇଛି ଯେ, ସମ୍ପୃକ୍ତ ଯୁବତୀଙ୍କର ଶ୍ୱାସରୁଦ୍ଧ ଯୋଗୁ ମୃତ୍ୟୁ ହୋଇଛି। ମୃତକ ଜଣକ ଅନୁସୂଚିତ ଜାତି ସମ୍ପ୍ରଦାୟର। ମୃତକଙ୍କ ପରିବାରକୁ ରାଜ୍ୟ ସରକାର ୧ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରିଛନ୍ତି।
