ଭୁବନେଶ୍ୱର,୧୩।୩(ବ୍ୟୁରୋ): ରାଜଧାନୀରେ ଦିନକୁ ଦିନ ଟ୍ରାଫିକ ପୋଲିସର ଦାଦାଗିରି ବଢ଼ିବାରେ ଲାଗିଛି। କିଛିଦିନ ତଳେ ସିଆରପି ଛକ ନିକଟରେ ଜଣେ ମହିଳାଙ୍କ ସ୍କୁଟିରୁ ଜବରଦସ୍ତି ଗାଡ଼ି ଚାବି କାଢି ନେଇ ହଇରାଣ କରିବା ଘଟଣା ନ ସରୁଣୁ ଗୁରୁବାର ପୁଣି ଚନ୍ଦ୍ରଶେଖରପୁର ଥାନା ଅଞ୍ଚଳରେ ଏଭଳି ଏକ ଘଟଣା ପଦାକୁ ଆସିଛି। କୌସ୍ତବ କଲେଜ ନିକଟରେ ଚେକିଂ ଚାଲିଥିବାବେଳେ ହେଲମେଟ ପିନ୍ଧି ନ ଥିବା ଜଣେ ଆଇନଜୀବୀଙ୍କୁ ଜଣେ ଟ୍ରାଫିକ ପୋଲିସ ମାଡ଼ ମାରିଥିବା ଅଭିଯୋଗ ହୋଇଛି। ମାଡ଼ରେ ଆଇନଜୀବୀ ଜଣଙ୍କ ବେହୋସ ହୋଇଥିବା ସେ କହିଛନ୍ତି। ଅନ୍ୟପଟେ ମାଡ଼ ମାରିଥିବା ଟ୍ରାଫିକ ପୋଲିସ ମଧ୍ୟ ଆଇନଜୀବୀଙ୍କ ନାମରେ ପାଲଟା ଅଭିଯୋଗ କରିଥିବା ଜଣାପଡିଛି। ପୋଲିସ ଉଭୟ ଅଭିଯୋଗ ଆଧାରରେ ତଦନ୍ତ କରୁଥିବା ଜଣାପଡିଛି।
ଆଇନଜୀବୀ କେଶବ ମିଶ୍ରଙ୍କ ଅଭିଯୋଗ ଅନୁଯାୟୀ, ଗୁରୁବାର ପୂର୍ବାହ୍ନ ୧୦ଟାରେ ଟ୍ରାଫିକ ପୋଲିସ ପକ୍ଷରୁ ଯାଞ୍ଚ ହେଉଥିଲା। ଏହି ସମୟରେ ଆଇନଜୀବୀ କେଶବ ପଟିଆରୁ ଇନ୍ଫୋସିସ୍ ଅଭିମୁଖେ ଯାଉଥିବାବେଳେ ଉକ୍ତ ଛକ ନିକଟରେ ପୋଲିସ ତାଙ୍କୁ ଅଟକାଇଥିଲା। ହେଲେ କେଶବ ଆଗକୁ ଯାଇ ବାଇକ ରଖିବା ସମୟରେ କାର୍ଯ୍ୟରତ ଟ୍ରାଫିକ ପୋଲିସ ତାଙ୍କୁ ଗୋଟିଏ ଚାପୁଡ଼ା ମାରିଥିଲେ। ଫଳରେ ସେ ତଳେ ପଡ଼ି ବେହୋସ ହୋଇଯାଇଥିଲେ। ସ୍ଥାନୀୟ ଲୋକେ ତାଙ୍କୁ ପାଣି ଛିଞ୍ଛିବା ପରେ ଚେତା ଫେରିଥିଲା ବୋଲି କେଶବ କହିଛନ୍ତି। ଅନ୍ୟପକ୍ଷେ ମାଡ଼ ମାରିଥିବା ଟ୍ରାଫିକ ପୋଲିସ ଜଣଙ୍କ କହିଛନ୍ତି, କେଶବ ବିନା ହେଲମେଟରେ ଯାଉଥିଲେ। ତାଙ୍କୁ ଅଟକାଇଥିଲେ ମଧ୍ୟ ସେ ରହି ନ ଥିଲେ। ଫଳରେ ପୋଲିସ ତାଙ୍କୁ ଧରିବା ପରେ ସେ ଏଭଳି ମିଥ୍ୟ ଅଭିଯୋଗ ଆଣିଥିଲେ। ତାଙ୍କୁ ସେଭଳି ମାଡ ହୋଇନାହିଁ। ଏ ନେଇ ଚନ୍ଦ୍ରଶେଖରପୁର ଥାନା ଅଧିକାରୀ ବିଶ୍ୱରଞ୍ଜନ ସେନାପତି କହିଛନ୍ତି,ଏ ସମ୍ପର୍କରେ ଉଭୟ ପକ୍ଷରୁ ଅଭିଯୋଗ ହୋଇଥିବାରୁ ଘଟଣାର ତଦନ୍ତ ଆରମ୍ଭ ହୋଇଛି।
କିନ୍ତୁ ଏହି ଘଟଣାକୁ ନେଇ ପ୍ରଶ୍ନ ଉଠାଇଛନ୍ତି ନାରୀନେତ୍ରୀ ଡଲି ରଥ। ସେ କହିଛନ୍ତି ଯେ, ଜଣେ ଟ୍ରାଫିକ ନିୟମ ଉଲ୍ଲଂଘନ କଲେ କ’ଣ ପୋଲିସ ସେମାନଙ୍କୁ ମାଡ଼ ମାରିବ। ଯଦି ଜଣେ ଟ୍ରାଫିକ ନିୟମ ଭାଙ୍ଗିଛି ତେବେ ତାଙ୍କୁ ଆଇନ ଅନୁଯାୟୀ ଜରିମାନା କରନ୍ତୁ। ଏଭଳି ଲୋକଙ୍କୁ ଯାଞ୍ଚ ନାଁରେ ମାଡ଼ ମାରିବା ଠିକ୍ ନୁହେଁ। ଏଭଳି ହେଲେ ଶେଷରେ ରାଜମହଲ ଭଳି ପରିସ୍ଥିତି ସୃଷ୍ଟି ହେବ ବୋଲି ସେ କହିଛନ୍ତି।
ଏ ନେଇ ଟ୍ରାଫିକ ଡିସିପି ସାଗରିକା ନାଥ କହିଛନ୍ତି, ପ୍ରକୃତ ଘଟଣା କ’ଣ ହୋଇଛି ସମସ୍ତେ ଜାଣିଛନ୍ତି। ଯଦି ଟ୍ରାଫିକ ପୋଲିସ ପିଟିବା ନେଇ ଅଭିଯୋଗ ହେଉଛି ତେବେ ଘଟଣାର ଯାଞ୍ଚ କରାଯିବ। ଟ୍ରାଫିକ ପୋଲିସ ଦୋଷୀ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
