ନୂଆଦିଲ୍ଲୀ,୧୩-୯(ଆଇଏଏନ୍ଏସ୍):ଆଇଏନ୍ଏକ୍ସ ମିଡିଆ ଦୁର୍ନୀତି ମାମଲାରେ ଗିରଫ ହୋଇ ତିହାର ଜେଲ୍ରେ ଥିବା ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ପି. ଚିଦାମ୍ବରମଙ୍କୁ ଘରରନ୍ଧା ଖାଦ୍ୟ ଦେବା ପାଇଁ ଦିଲ୍ଲୀ ହାଇକୋର୍ଟ ଅନୁମତି ଦେଇନାହାନ୍ତି। ଜେଲ୍ର ସବୁ ଅନ୍ତେବାସୀଙ୍କ ପାଇଁ ଖାଦ୍ୟ ସମାନ ବୋଲି ଜଷ୍ଟିସ୍ ସୁରେଶ କୁମାର କୈଟ ଗୁରୁବାର କହିଛନ୍ତି। ଜେଲ୍ରେ ଥିବା ତାଙ୍କ ମହକିଲଙ୍କୁ ୭୪ ବର୍ଷ ହୋଇଥିବାରୁ ତାଙ୍କୁ ଘରରନ୍ଧା ଖାଦ୍ୟ ପାଇଁ ଅନୁମତି ଦେବାକୁ ବରିଷ୍ଠ ଆଇନଜୀବୀ କପିଲ ସିବଲ କୋର୍ଟଙ୍କୁ ଅନୁରୋଧ କରିଥିଲେ। ଏହାର ଜବାବରେ ସଲିସିଟର ଜେନେରାଲ ତୁଷାର ମେହେଟ୍ଟା କହିଥିଲେ, ତାଙ୍କଠାରୁ ବୟସ୍କ ରାଜନୈତିକ ବନ୍ଦୀ ଓମ୍ ପ୍ରକାଶ ଚୌତାଲା ଅଛନ୍ତି। ତେଣୁ କାହାକୁ ବାଛବିଚାର କରାଯାଇପାରିବ ନାହିଁ ବୋଲି ସେ ଯୁକ୍ତି ବାଢ଼ିଥିଲେ। ଆଇଏନ୍ଏକ୍ସ ମିଡିଆ ମାମଲାରେ ଚିଦାମ୍ବରମଙ୍କ ନିୟମିତ ଜାମିନ ଆବେଦନର ଶୁଣାଣି ବେଳେ ଏଭଳି ଯୁକ୍ତି ଉପସ୍ଥାପନ କରାଯାଇଥିଲା।
