ପାତ୍ରପୁର,୨୩ା୧୦(ଡି.ଏନ୍.ଏ.): ଗଞ୍ଜାମ ଜିଲା ଜରଡ଼ା ଥାନା ମୁକୁନ୍ଦପୁର ଗ୍ରାମର ଏକ ଜମିରେ ଥିବା ପମ୍ପ ହାଉସରୁ ମଙ୍ଗଳବାର ସନ୍ଧ୍ୟାର ଦେବଦେବୀଙ୍କ ପିତ୍ତଳ ମୂର୍ତ୍ତି, ଫଟୋ ଓ ମନ୍ଦିର ନୀତିକାନ୍ତିରେ ବ୍ୟବହୃତ ପିତ୍ତଳ ବାସନ ମିଳିଛି। ଏହି ମୂର୍ତ୍ତି ମଧ୍ୟରେ ଏକ ଅଷ୍ଟଧାତୁର ମୂର୍ତ୍ତି ଥିବା ଆଲୋଚନା ହେଉଛି। ଯେ, ବମକେଇ ଗ୍ରାମରେ ଥିବା ପୂର୍ବତନ ବାଚସ୍ପତି ଚିନ୍ତାମଣି ଦ୍ୟାନ ସାମନ୍ତରାଙ୍କ ଉକ୍ତ ଜମିରେ ବବିନା ଗୌଡଙ୍କ ନେତୃତ୍ୱରେ କେତେଜଣ ଶ୍ରମିକ ମଙ୍ଗଳବାର କାମ କରୁଥିଲେ। ଏତିକିବେଳେ ଏକ ସାପ ପମ୍ପ ହାଉସକୁ ପଶୁଥିବା ଶ୍ରମିକମାନେ ଦେଖିଥିଲେ। ସାପ ଘଉଡ଼ାଇବାକୁ ସେମାନେ ପମ୍ପ ହାଉସର କବାଟ ଖୋଲିଥିଲେ। ପରେ ସାପଟି ବାହାରକୁ ବାହାରି ପଳାଇଥିଲା। ମାତ୍ର ସେଠାରେ ଦୁଇଟି ଟିଣବାକ୍ସ ଥିବା ଶ୍ରମିକମାନେ ଦେଖିଥିଲେ। ଏନେଇ ସାମନ୍ତରାଙ୍କ ପରିବାର ଲୋକଙ୍କ ସହ କଥାହୋଇ ବାକ୍ସ ଦୁଇଟିକୁ ବମକେଇସ୍ଥିତ ତାଙ୍କ ବାସଭବନକୁ ନେଇଥିଲେ। ସେଠାରେ ବାକ୍ସ ଖୋଲିବାପରେ ସେଥିରେ ହନୁମାନ ବିଗ୍ରହ ସହ ତାରା ତାରିଣି, ଘୋଡ଼ା, ଦୂର୍ଗା, ନୃସିଂହଙ୍କ ପ୍ରତିମା, ପିତ୍ତଳ ଥାଳି, ଗ୍ଲାସ, ମନ୍ଦିର ସାମଗ୍ରୀ ଥିବା ଦେଖିଥିଲେ। ଏନେଇ ଜରଡା ଥାନାକୁ ଖବର ଦିଆଯାଇଥିଲା। ପୋଲିସ ପହଞ୍ଚତ୍ ସମସ୍ତ ଜିନିଷକୁ ଥାନାକୁ ନେଇ ତଦନ୍ତ ଆରମ୍ଭ କରିଛି। କେହି ଦୁର୍ବୃତ୍ତ ମନ୍ଦିରରୁ ମୂର୍ତ୍ତି ଚୋରି କରି ଆଣି ଏଠାରେ ଲୁଚାଇଥିବା ଅନୁମାନ କରାଯାଉଛି। ମୂର୍ତ୍ତି ଗୁଡିକ ପିତ୍ତଳ ଏଥିରେ ଅଷ୍ଟଧାତୁ ମୂର୍ତ୍ତି ନାହିଁ। ତଦନ୍ତ ପରେ ପ୍ରକୃତ କାରଣ ଜଣାପଡ଼ିବ ବୋଲି ଜରଡ଼ା ଥାନା ଅଧିକାରୀ ମୃତ୍ୟୁଞ୍ଜୟ ସ୍ବାଇଁ ସୂଚନା ଦେଇଛନ୍ତି।
