ଭବାନୀପାଟଣା,୩୦।୮(ଡି.ଏନ.ଏ.)-ଭବାନୀପାଟଣାର ଜଣେ ଓ୍ବେସ୍କୋ ଲାଇନ୍ମ୍ୟାନ ଚାକିରୀ ପ୍ରଲୋଭନ ଦେଖାଇ ଏକାଧିକ ଯୁବକଙ୍କଠାରୁ ପ୍ରାୟ ୪୦ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଅଭିଯୁକ୍ତଙ୍କ ନାମ ଜ୍ୟୋତି ରଞ୍ଜନ ସାମଲ ା ତାଙ୍କ ବିରୋଧରେ ବିଭିନ୍ନ ଥାନାରେ ଅଭିଯୋଗ ହେବା ପରେ ସେ ଗତ ୪ ମାସ ହେଲା ଫେରାର ଥିବା ଜଣାପଡିଛି । ଏ ନେଇ ପୋଲିସ ତନାଘନା କରିବା ବଦଳରେ ହାତବାନ୍ଧି ବସିଥିବା ଠକେଇ ଶିକାର ଯୁବକମାନେ ଅଭିଯୋଗ କରିଛନ୍ତି ା
ମିଳିଥିବା ସୂଚନା ମୁତାବକ, ୱେସ୍କୋର କଳାହାଣ୍ଡି ଜିଲା ଭବାନୀପାଟଣା ପୂର୍ବ ବିଦ୍ୟୁତ୍ ମଣ୍ଡଳ ଅନ୍ତର୍ଗତ ସେକ୍ସନ-୩ରେ ଲାଇନମ୍ୟାନ-ସି ଭାବେ କାମ କରନ୍ତି ଜ୍ୟୋତିରଞ୍ଜନ ା ସେ କୁଆଡ଼େ ଭବାନୀପାଟଣା ସହର ବଡପଡାର ମଦନ କୁମ୍ଭାରଙ୍କୁ ଚାକିରି ଦେବେ ବୋଲି କହି ୨୦୧୭ ଡିସେମ୍ବର ୨୬ରେ ୫୦ ହଜାର ଟଙ୍କା ନେଇଥିଲେ । ଚାକିରି ନ ମିଳିବାରୁ ମଦନ ଟଙ୍କା ଫେରସ୍ତ ମାଗିଥିଲେ । ଜ୍ୟୋତିରଞ୍ଜନ ତାଙ୍କୁ ଠକି ଚାଲିଥିଲେ। ଏ ନେଇ ଭବାନୀପାଟଣା ଟାଉନ ଥାନାରେ ଗତ ଅଗଷ୍ଟ ୨୦ ତାରିଖରେ ମଦନ ଲିଖିତ ଅଭିଯୋଗ କରିଥିଲେ। ସେହଭଳି ଜ୍ୟୋତିରଞ୍ଜନ ଭୂଲିଆ ଗ୍ରାମରେ ନିର୍ମଳ ନାଏକଙ୍କଠାରୁ ୩୨ ହଜାର ଟଙ୍କା, କିଶୋର ମାଝିଙ୍କଠାରୁ ୩୦ ହଜାର ଟଙ୍କା, ଉପରରାଚୁଗୁଡା ଗ୍ରାମର ରାଜେନ୍ଦ୍ର ନାଏକଙ୍କଠାରୁ ୨୦ ହଜାର ଟଙ୍କା, ପ୍ରଶାନ୍ତ ନାଏକଙ୍କଠାରୁ ୯୦ ହଜାର ଟଙ୍କା, କିଟପଦର ଗ୍ରାମର ଗଣେଶ ମାଝିଙ୍କ ଠାରୁ ୩୦ ହଜାର ଟଙ୍କା, ପଞ୍ଚା ମାଝିଙ୍କଠାରୁ ୩୦ ହଜାର ଟଙ୍କା, ସିକେରଗୁଡା ରାଜକୁମାର ନାଏକଙ୍କଠାରୁ ୫୦ ହଜାର ଟଙ୍କା, ବୁନୁ ମାଝିଙ୍କଠାରୁ ୨୫ ହଜାର ଟଙ୍କା, ମହିଯୋର ଗ୍ରାମର ଯୁଧିଷ୍ଠିର ବାଗଙ୍କଠାରୁ ୭୦ ହଜାର ଟଙ୍କା, ଭବାନୀପାଟଣା ନୂଆପଡାର ହରି ସାହୁଙ୍କଠାରୁ ୧ ଲକ୍ଷ ୨୦ ହଜାର ଟଙ୍କା, ଚୁରିହାରୀପଡାର ରାଜେଶ୍ୱର ତାଣ୍ଡିଙ୍କଠାରୁ ୮୦ ହଜାର ଟଙ୍କା ନେଇଥିବା ଅଭିଯୋଗ ହୋଇଛି । ସଦର ଥାନାରେ ଏ ନେଇ ୭ରୁ ଅଧିକ ଲିଖିତ ଅଭିଯୋଗ ହୋଇଛି। ପୋଲିସ ଏଥିରେ ଏତଲା ଦାଏର ନ କରି ଚୁପ ବସିଛି । ଜ୍ୟୋତିରଞ୍ଜନ ପ୍ରାୟ ୪୦ ଲକ୍ଷରୁ ଅଧିକ ଟଙ୍କା ହଡପ କରି ଫେରାର ହୋଇଥିବା ଅଭିଯୋଗ ହୋଇଛି । କେବଳ ଚାକିରି ଦେବାକୁ ନୁହେଁ, ଜ୍ୟୋତିରଞ୍ଜନ ବିପିଏଲ ଲାଇନ ସଂଯୋଗ ପାଇଁ ବି ଚାଞ୍ଚେର ଗ୍ରାମରେ ୬୪ ହଜାର ଟଙ୍କା ଆଦାୟ କରିଥିବା ଅଭିଯୋଗ ହୋଇଛି । ସେହିଭଳି ୱେସ୍କୋରେ ବିଭିନ୍ନ କାର୍ଯ୍ୟ କରାଇ ଦେବା ଆଳରେ ପ୍ରାୟ ୩ ଲକ୍ଷ ଟଙ୍କା ଆଦାୟ କରି ହଡପ କରିଥିବା ଅଭିଯୋଗ ହୋଇଛି । ଅଭିଯୁକ୍ତ ଜ୍ୟୋତିରଞ୍ଜନ ଗତ ୪ ମାସ ଧରି ନିରୁଦ୍ଦିଷ୍ଟ ଥିବା ୱେସ୍କୋ ଓ ପୋଲିସ ପକ୍ଷରୁ କୁହାଯାଇଛି। ଏ ନେଇ ୱେସ୍କୋ ନିର୍ବାହୀ ଯନ୍ତ୍ରୀ ଇଂ ଆଲୋକ ରଞ୍ଜନ ପଟ୍ଟନାୟକ ତାଙ୍କ ଘରକୁ ନୋଟିସ ପଠାଇଛନ୍ତି । କୌଣସି ଉତ୍ତର ନ ମିଳିଲେ ତାଙ୍କୁ ବିଜ୍ଞାପନ ଦେଇ ବରଖାସ୍ତ କରାଯିବ ବୋଲି କହିଛନ୍ତି। ଏ ସମ୍ପର୍କରେ ସଦର ଥାନା ଆଇଆଇସିଙ୍କୁ ପଚାରିବାରୁ ଏ ନେଇ ଅଭିଯୋଗ ଆସିଛି, କିନ୍ତୁ ଅଭିଯୋଗକାରୀମାନେ ବୁଝାମଣା ପାଇଁ ଆଲୋଚନା କରିଥିବା କହିଛନ୍ତି । ଅନ୍ୟପକ୍ଷରେ ଟାଉନ ଥାନା ଆଇଆଇସିଙ୍କୁ ପଚାରିବାରୁ ଠକେଇ ନେଇ ଏତଲା ହୋଇଛି । କିନ୍ତୁ ଅଭିଯୁକ୍ତ ଫେରାର ଥିବା କହିଛନ୍ତି।
ଫଟୋ :
