ବେଜିଂ,୧୫।୧୨: ଚାଇନା ମହାକାଶକୁ କୃତ୍ରିମ ଚନ୍ଦ୍ର ପଠାଇବ। ଏନେଇ ୨୦୧୮ରେ ଚାଇନା ଘୋଷଣା କରି ସମସ୍ତଙ୍କୁ ଚକିତ କରିଦେଇଥିଲା। ତେବେ ଏହି ଯୋଜନା ଅନ୍ତଗର୍ର୍ତ ପ୍ରଥମ ଉପଗ୍ରହ ୨୦୨୦ରେ ମହାକାଶକୁ ପ୍ରେରଣ କରାଯିବ। ୨୦୨୨ ସୁଦ୍ଧା ଚାଇନା ଅନ୍ୟ ୩ଟି ଉପଗ୍ରହ ପ୍ରେରଣ କରିବ। ଏସବୁ ଉପଗ୍ରହରେ ଥିବା ଦର୍ପଣ ସୂର୍ଯ୍ୟାଲୋକକୁ ପ୍ରତିଫଳିତ କରିବ। ଚନ୍ଦ୍ର ତୁଳନାରେ ଏହି ଆଲୋକ ପ୍ରାୟ ୮ ଗୁଣା ଅଧିକ ଉଜ୍ଜଳ ହେବ। ଏହା ୧୦ରୁ ୮୦ କିମି କ୍ଷେତ୍ରକୁ ଆଲୋକିତ କରିବାକୁ ସକ୍ଷମ ହୋଇପାରିବ। ଏହା ଦ୍ୱାରା ଆଉ ଷ୍ଟ୍ରିଟ୍ ଲାଇଟ୍ର ଆବଶ୍ୟକତା ରହିବ ନାହିଁ। ପ୍ରାକୃତିକ ବିପର୍ଯ୍ୟୟ ସମୟରେ ବିଦ୍ୟୁତ୍ ଆଲୋକ ନ ଥିଲେ ମଧ୍ୟ ରାତିରେ କୌଣସି ଅସୁବିଧା ହେବ ନାହିଁ। ଏହାକୁ ପୃଥିବୀ ଏବଂ ଅନ୍ତର୍ଜାତୀୟ ମହାକାଶ କେନ୍ଦ୍ର ମଧ୍ୟରେ ସ୍ଥାପିତ କରାଯିବାର ଯୋଜନା ରହିଛି। ମାତ୍ର ଏହାକୁ ସ୍ଥାପନ କରିବା ଏକ ବଡ଼ ସମସ୍ୟା ଭାବେ ଦେଖାଯିବ। ପୃଥିବୀର ମାଧ୍ୟାକର୍ଷଣ ଶକ୍ତି ଯେପରି ଏହାକୁ ଆକର୍ଷିତ ନ କରି ପାରିବ ସେଥିପାଇଁ ପୃଥିବୀ ଚାରିପଟେ ଏହାର ଘୂର୍ଣ୍ଣନ ଗତିକୁ ଘଣ୍ଟା ପିଛା ୨୭ ହଜାର ୪ଶହ କିମି ରଖିବାକୁ ପଡ଼ିବ ବୋଲି କୁହାଯାଉଛି।
