ବେଜିଂ,୮।୩: ଚାଇନାରେ ମହାମାରୀର ରୂପ ନେଇଥିବା କରୋନା ଭାଇରସ ଏବେ କଡ ଲେଉଟାଇଛି। ଗୋଟିଏ ଦିନରେ ଏଠାରେ ହଜାର ହଜାର ଲୋକ କରୋନା ଭାଇରସରେ ସଂକ୍ରମିତ ହୋଇଥିବା ବେଳେ ଏବେ ଏହି ସଂଖ୍ୟା ୧୦୦ରୁ ବି କମ୍ ହୋଇଯାଇଛି। ସାରା ବିଶ୍ୱରେ ଏବେ ପ୍ରାୟ ୧,୦୬,୨୧୧ ଜଣ ସଂକ୍ରମିତଙ୍କୁ ଚିହ୍ନଟ କରାଯାଇଥିବା ବେଳେ କେବଳ ଚାଇନାରେ ୮୦ ହଜାରରୁ ଉର୍ଦ୍ଧ୍ୱ ସଂକ୍ରମିତ ରହିଥିବା କୁହାଯାଏ। ଏବେ କିନ୍ତୁ ଏହା କିପରି କମ୍ ହୋଇଛି ତାହା ଜାଣିବା ପାଇଁ ନିକଟରେ ୧୩ ବିଦେଶୀ ବିଶେଷଜ୍ଞ ୧୨ ଜଣ ଚାଇନା ଏକ୍ସପର୍ଟଙ୍କ ସହ ସେଠାକାର ପ୍ରାୟ ୫ ସହର ବୁଲି ଯାଇଥିବା ଶୁଣିବାକୁ ମିଳିଛି। ଏହାପରେ ଯେଉଁ ତଥ୍ୟ ଆସିଛି ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଉକ୍ତ ବିଶେଷଜ୍ଞଙ୍କ କହିବା କଥା ହେଲା ଚାଇନା ପ୍ରଥମେ କରୋନା ଭାଇରସରେ ବେଶି ପ୍ରଭାବିତ ହୋଇଥିବା ସହର ବୁହାନ ଓ ହୁବଇକୁ ଜାନୁୟାରୀ ୨୩ରୁ ଲକଡାଉନ୍ କରି ଦେଇଥିଲା। ଏହାର ଅର୍ଥ ହେଉଛି ଏହି ୨ ସହରରେ ଅଧିକ ପରିମାଣରେ କରେନା ଭାଇରସ ସଂକ୍ରମିତଙ୍କୁ ଚିହ୍ନଟ କରାଯିବା ପରେ ଉକ୍ତ ସହରର କୌଣସି ଲୋକ ବାହାରକୁ ଯାଇ ପାରିବେ ନାହିଁ କି ବାହାରୁ କୌଣସି ଲୋକ ଉକ୍ତ ସହରକୁ ଯିବାକୁ ବାରଣ କରାଯାଇଥିଲା। ଏହାସହ ସମସ୍ତ ସ୍କୁଲ, କଲେଜ, ମଲ୍, ହୋଟେଲ, ସିନେମାହଲ ଆଦିକୁ ହସ୍ପିଟାଲରେ ପରିବର୍ତ୍ତନ କରାଯାଇଥିଲା। ଏହାସହ କିଛି ନୂଆ ହସ୍ପିଟାଲ ମଧ୍ୟ ନିର୍ମାଣ କରାଯାଇଥିଲା। ଏଭଳି ପଦକ୍ଷେପ ଫଳରେ ଏବେ ଚାଇନାରେ କରୋନା ଭାଇରସ ସଂକ୍ରମିତଙ୍କ ସଂଖ୍ୟା କମ୍ ହୋଇଛି ବୋଲି ବିଶେଷଜ୍ଞମାନେ କହିଛନ୍ତି।
