ନୂଆଦିଲ୍ଲୀ,୨୮ା୪: ଚତୁର୍ଥ ପର୍ଯ୍ୟାୟ ଲୋକ ସଭା ନିର୍ବାଚନ ଆସନ୍ତା ୨୯ ତାରିଖରେ ହେବାକୁ ଯାଉଥିବାବେଳେ ଶନିବାର ଅପରାହ୍ନରେ ପ୍ରଚାର ଶେଷ ହୋଇଛି। ଏହି ପର୍ଯ୍ୟାୟରେ ୯ଟି ରାଜ୍ୟର ୭୨ ଆସନରେ ମତଦାନ ହେବ। ଏଥିରେ ରହିଛି ବିହାରର ୫ ଆସନ, ଝାଡଖଣ୍ଡର ୩, ମଧ୍ୟପ୍ରଦେଶର ୬, ମହାରାଷ୍ଟ୍ରର ୧୭, ଓଡିଶାର ୬, ରାଜସ୍ଥାନର ୧୩, ଉତ୍ତରପ୍ରଦେଶର ୧୩, ଜମ୍ମୁ-କଶ୍ମୀରର ଗୋଟିଏ ଏବଂ ପଶ୍ଚିମବଙ୍ଗର ୮ ଆସନ। ମତଦାନ ଲାଗି ନିର୍ବାଚନ କମିଶନଙ୍କ ପକ୍ଷରୁ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚତ୍ଛି। ପୋଲିଂ କର୍ମଚାରୀ ଇଭିଏମ୍ ଏବଂ ଭିଭିପିଏଟି ସହ ବିଭିନ୍ନ ବୁଥ୍ରେ ପହଞ୍ଚତ୍ବାରେ ଲାଗିଛନ୍ତି।
ଚତୁର୍ଥ ପର୍ଯ୍ୟାୟରେ ମୋଟ ୯୪୩ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବାକୁ ଯାଉଥିବାବେଳେ ସେମାନଙ୍କ ମଧ୍ୟରୁ ୨୧୦ ଜଣଙ୍କ ବିରୋଧରେ ଅପରାଧ ମାମଲା ରହିଛି। ଶନିବାର ପ୍ରଚାର ଶେଷ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉତ୍ତରପ୍ରଦେଶର କନୌଜ, ହର୍ଦୋଇ ଏବଂ ସୀତାପୁରଠାରେ ନିର୍ବାଚନୀ ସଭାରେ ଯୋଗଦେଇଥିଲେ। ଆତଙ୍କବାଦ ବିରୋଧରେ ଲଢ଼େଇ ଲାଗି କଂଗ୍ରେସ, ସମାଜବାଦୀ ପାର୍ଟି (ଏସ୍ପି) ଏବଂ ବିଏସ୍ପିର କୌଣସି ଯୋଜନା ନାହିଁ ବୋଲି ପ୍ରଧାନମନ୍ତ୍ରୀ କହିଥିଲେ। ସେହିପରି ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହ ଝାଡଖଣ୍ଡର ପାଲାମୁ ଏବଂ ଓଡ଼ିଶାର ମୟୂରଭଞ୍ଜ ଓ ଯାଜପୁରରେ ନିର୍ବାଚନୀ ସଭା କରିଥିଲେ। ରାଜସ୍ଥାନରେ ଭାଜପା ଓ କଂଗ୍ରେସ ମଧ୍ୟରେ କଡ଼ା ଟକ୍କର ହେଉଥିଲାବେଳେ ବିହାରର ଦର୍ଭଙ୍ଗା, ଉଜିଆରପୁର, ସମସ୍ତିପୁର, ବେଗୁସରାଇ ଏବଂ ମୁଙ୍ଗେରରେ ଶେଷ ଦିନରେ ଜୋରଦାର ପ୍ରଚାର ହୋଇଥିଲା।
ଚତୁର୍ଥ ପର୍ଯ୍ୟାୟ ମହାରାଷ୍ଟ୍ର ପାଇଁ ଶେଷ ପର୍ଯ୍ୟାୟ ହୋଇଥିବାବେଳେ ମଧ୍ୟପ୍ରଦେଶ ଓ ରାଜସ୍ଥାନରେ ପ୍ରଥମ ଥର ମତଦାନ ହେବ। ସେହିପରି ଓଡିଶାରେ ଏହା ଶେଷ ପର୍ଯ୍ୟାୟ ଲୋକ ସଭା ଓ ବିଧାନସଭା ନିର୍ବାଚନ। ଏହି ପର୍ଯ୍ୟାୟରେ ଚର୍ଚ୍ଚିତ ପ୍ରାର୍ଥୀଙ୍କ ମଧ୍ୟରେ ରହିଛନ୍ତି ବେଗୁସରାଇରୁ ସିପିଆଇ ପ୍ରାର୍ଥୀ କହ୍ନେୟା କୁମାର ଏବଂ ଭାଜପା ପ୍ରାର୍ଥୀ ଗିରିରାଜ ସିଂ, ଛିନ୍ଦଓ୍ବାଡା ଲୋକ ସଭା ଆସନରୁ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ କମଳନାଥଙ୍କ ପୁଅ ନକୁଳ ଲଢ଼ୁଥିବାବେଳେ ଛିନ୍ଦଓ୍ବାଡା ବିଧାନସଭା ଆସନ ଉପନିର୍ବାଚନ ପାଇଁ କମଳନାଥ ପ୍ରାର୍ଥୀ ହୋଇଛନ୍ତି। ସିଧି ଆସନରୁ କଂଗ୍ରେସ ଅର୍ଜୁନ ସିଂଙ୍କ ପୁଅ ଅଜୟ ସିଂଙ୍କୁ ପ୍ରାର୍ଥୀ କରିଛି। ଜବଲପୁରରୁ ମଧ୍ୟପ୍ରଦେଶ ଭାଜପା ସଭାପତି ରାକେଶ ସିଂ ଲଢ଼ୁଛନ୍ତି। ଅନ୍ୟମାନଙ୍କ ମଧ୍ୟରେ ଅଛନ୍ତି ପୁନମ ମହାଜନ, ପ୍ରିୟା ଦତ୍ତ, ମିଲିନ୍ଦ୍ ଦେଓରା, ଊର୍ମିଳା ମାତୋଣ୍ଡକର ପ୍ରମୁଖ।
