ଭୁବନେଶ୍ୱର,୨୯ା୩(ବ୍ୟୁରୋ): କୋଭିଡ୍-୧୯ର ସଂକ୍ରମଣକୁ ଏଡ଼ାଇବା ସହ ଜନସାଧାରଣଙ୍କ ସୁବିଧାକୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ଗୁରୁତ୍ୱ ଦେଇଛି। ୨୧ଦିନର ଲକ୍ଡାଉନ୍କୁ ଲକ୍ଷ୍ୟ କରି ବିଏମ୍ସି ରନ୍ଧା ଖାଦ୍ୟ ପରିବହନ କରି ଜନସାଧାରଣଙ୍କୁ ଦେଉଥିବା ଘରୋଇ ସଂସ୍ଥା ‘ସ୍ୱିଗି’ ସହ ହାତ ମିଳାଇଛି। ଏଣିକି ସ୍ୱିଗି ମଧ୍ୟ ଅନ୍ୟ ମଲ ଓ ଷ୍ଟୋର ଭଳି ଭୁବନେଶ୍ୱରବାସୀଙ୍କ ଘରେ ଅତ୍ୟାବଶକୀୟ ସାମଗ୍ରୀ ଯୋଗାଇବ। ଏହି ସାମ୍ପ୍ରତିକ ସ୍ଥିତିରେ ଜନସାଧାରଣଙ୍କ ସହଯୋଗ କରିବା ପାଇଁ ବିଏମ୍ସି ସ୍ୱିଗିକୁ ଏହି ଦାୟିତ୍ୱ ଦେଇଥିବା ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି।
ଏ ନେଇ ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ (ବିଏସ୍ଏସିଏଲ୍)ର ଜେନେରାଲ୍ ମ୍ୟାନେଜର (ପ୍ରଶାସନିକ) କମଲଜିତ୍ ଦାସ କହିଛନ୍ତିି, ସ୍ୱିଗି ଦ୍ୱାରା କାର୍ଯ୍ୟରତ ଡେଲିଭରି କର୍ମଚାରୀମାନେ ଭୁବନେଶ୍ୱରର ଗଳିକନ୍ଦି ସହ ଭଲ ଭାବେ ପରିଚିତ। ତେଣୁ ଲୋକଙ୍କ ସୁବିଧା ପାଇଁ ବିଏମ୍ସି ଏହି କାର୍ଯ୍ୟ ହାତକୁ ନେଇଛି। ଏଥିରେ ଲୋକ ବିଶେଷ ଭାବେ ଉପକୃତ ହେବାବେଳେ ସ୍ୱିଗି ମଧ୍ୟ ଉପକୃତ ହେବ। ଲକ୍ ଡାଉନ୍ ଘୋଷଣା ହୋଇଥିବା ବେଳେ ସଉଦା ଆଣିବା ବାହାନା ଦର୍ଶାଇ ବହୁ ଲୋକ ବାହାରକୁ ବାହାରୁଛନ୍ତି। ଭୁବନେଶ୍ୱରରେ ୩ କରୋନା ସଂକ୍ରମିତ ଚିହ୍ନଟ ହୋଇସାରିବା ପରେ ଲୋକମାନେ ଯେପରି ଜମାରୁ ଘରୁ ନ ବାହାରନ୍ତୁ ସେ ପାଇଁ ଏହି ପଦକ୍ଷେପ ନିଆଯାଇଥିବା ସେ କହିଛନ୍ତି। ଏହା ପୂର୍ବରୁ ମଧ୍ୟ ବିଏମ୍ସି ପକ୍ଷରୁ ରାଜଧାନୀର ୨୮ଟି ମଲ୍ ଏବଂ ଷ୍ଟୋର କର୍ତ୍ତୃପକ୍ଷଙ୍କ ସହ ହୋମ ଡେଲିଭରି ପାଇଁ ଚୁକ୍ତି ସ୍ବାକ୍ଷରିତ ହୋଇଛି।
