ନିମାପଡ଼ା,୧।୭ (ଡି.ଏନ୍.ଏ.) : ନିମାପଡ଼ା ବ୍ଲକ ଅନ୍ତର୍ଗତ ରେଞ୍ଚଶାସନ ପଞ୍ଚାୟତର ବିଶ୍ୱାଳସାହି ଗ୍ରାମରେ ରବିବାର ବାତ୍ୟା କ୍ଷତିଗ୍ରସ୍ତ ଘରଭଙ୍ଗା ତଦନ୍ତ କରିବାକୁ ଯାଇ ଜଣେ ଅତିରିକ୍ତ ତହସିଲଦାର ହଟହଟା ହୋଇଛନ୍ତି। ଏପରିକି ଗ୍ରାମର ଶତାଧିକ ମହିଳା ଅତିରିକ୍ତ ତହସିଲଦାରଙ୍କୁ ଅଟକାଇବା ସହ ଗ୍ରାମ ଭିତରକୁ ଛାଡି ନ ଥିଲେ। ପ୍ରକାଶ ଯେ, ବାତ୍ୟାରେ ନିମାପଡ଼ା ବ୍ଲକ ଅଧୀନ ଅଞ୍ଚଳଗୁଡିକ ଅଧିକ କ୍ଷୟକ୍ଷତି ହୋଇଥିଲା। ଶତାଧିକରୁ ଊର୍ଦ୍ଧ୍ୱ ଲୋକ ବାସଗୃହ ହରାଇ ବେସାହାରା ହୋଇପଡିଥିଲେ। ଏ ନେଇ ବାତ୍ୟା ପରେ ରାଜସ୍ବ ନିରୀକ୍ଷକ(ଆରଆଇ) ଓ ଅନ୍ୟ ସରକାରୀ କର୍ମଚାରୀଙ୍କ ସହ ବିଶ୍ୱାଳସାହି ଗ୍ରାମକୁ ଆସି ଘରଭଙ୍ଗା ତଦନ୍ତ କରିଥିଲେ। ଇତିମଧ୍ୟରେ ବାତ୍ୟା ଯିବାର ଓ ତଦନ୍ତ କରିବାର ବହୁଦିନ ବିତିଯାଇଥିଲେ ମଧ୍ୟ ନିମାପଡ଼ାର ଅନେକ ଅଞ୍ଚଳବାସୀ ଠିକ ଭାବେ ସହାୟତା ପାଇନାହାନ୍ତି। ଏହାସହ ତଦନ୍ତରେ ଅନିୟମିତତା ହୋଇଥିବା ନେଇ ଗ୍ରାମବାସୀ ଅଭିଯୋଗ କରିବାପରେ ନିମାପଡ଼ା ତହସିଲର ଅତିରିକ୍ତ ତହସିଲଦାର ଲୋଚନ ଦାସ ରବିବାର ପୁନଃ ତଦନ୍ତ ପାଇଁ ବିଶ୍ୱାଳସାହି ଗ୍ରାମକୁ ଯାଇଥିଲେ। କିନ୍ତୁ ଶତାଧିକ ମହିଳା ସେମାନଙ୍କୁ ଅଟକାଇ ପୂର୍ବରୁ ତଦନ୍ତ ହୋଇଥିବା ରିପୋର୍ଟ କୁଆଡେ ଗଲା, କିଭଳି ତଦନ୍ତ ହୋଇଛି ବୋଲି ପ୍ରଶ୍ନ କରିଥିଲେ। ଫଳରେ ଅତିରିକ୍ତ ତହସିଲଦାର ପୂର୍ବ ରିପୋର୍ଟରେ ଅନିୟମିତତା ଥିବାର ଅଭିଯୋଗ ହେବା ଯୋଗୁ ପୁନଃ ଏହି ତଦନ୍ତ ହୋଇଛି ବୋଲି ମହିଳାମାନଙ୍କୁ ବୁଝାଇଥିଲେ। କିନ୍ତୁ ମହିଳାମାନେ ନିଜ ଜିଦ୍ରେ ଅଟଳ ରହିବାରୁ ବାଧ୍ୟହୋଇ ଅତିରିକ୍ତ ତହସିଲଦାର ବିନା ତଦନ୍ତରେ ନିରାଶ ହୋଇ ସେଠାରୁ ଫେରିଥିଲେ। ଏ ସମ୍ପର୍କରେ ଅତିରିକ୍ତ ତହସିଲଦାର ଲୋଚନ ଦାସ କୁହନ୍ତି, ଶତାଧିକ ମହିଳା ମୋତେ ଅଟକାଇ ତଦନ୍ତ ପାଇଁ ଗ୍ରାମକୁ ନ ଛାଡିବାରୁ ମୁଁ ବିଶ୍ୱାଳସାହି ଗ୍ରାମରୁ ଫେରିଆସି ଅନ୍ୟ ଗ୍ରାମକୁ ତଦନ୍ତ ପାଇଁ ଯାଇଥିଲି ବୋଲି କହିଥିଲେ।
