ବାଲେଶ୍ୱର ଅଫିସ,୧।୯-ବାଲେଶ୍ୱର ସହର ତଥା ଆଖପାଖ ଅଞ୍ଚଳରେ ଦୀର୍ଘଦିନ ଧରି ଆତଙ୍କ ସୃଷ୍ଟି କରୁଥିବା ଗ୍ୟାଙ୍ଗଷ୍ଟର ପାପା ଓରଫ୍ ଚିନ୍ମୟ ପଣ୍ଡା (୪୦)ଙ୍କୁ ବାଲେଶ୍ୱର ପୋଲିସ ଗିରଫ କରିଛି। ତାଙ୍କ ନାମରେ ସହଦେବଖୁଣ୍ଟା ମଡ଼େଲ ଥାନାରେ ୪, ଟାଉନ୍ ଥାନାରେ ୮, ଶିଳ୍ପାଞ୍ଚଳ ଥାନାରେ ୭ ଏବଂ ଦୀଘା ମୋହନା କୋଷ୍ଟାଲ ଥାନାରେ ଗୋଟିଏ ମୋଟ ୨୦ଟି ହତ୍ୟା, ଡକାୟତି, ଦାଦାବଟି ଏବଂ ହତ୍ୟା ଉଦ୍ୟମ ଭଳି ମାମଲା ରହିଛି। ସେ ପୋଲିସକୁ ଚକ୍ମା ଦେଇ ବାରମ୍ବାର ଖସି ଯାଉଥିଲେ। ଶନିବାର ମଧ୍ୟରାତ୍ରରେ ଏସ୍ପି ବି. ଯୁଗଳ କିଶୋର କୁମାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ରେମୁଣା ଆଇଆଇସି ଶୁଭ୍ରାଂଶୁ ଶେଖର ନାୟକଙ୍କ ନେତୃତ୍ୱରେ ପୋଲିସ୍ର ଏକ ସ୍ବତନ୍ତ୍ର ଟିମ୍ କଟକରୁ ତାଙ୍କୁ ଗିରଫ କରିଛି। ଏ ସମ୍ପର୍କରେ ରବିବାର ଅପରାହ୍ନ ୫ଟାରେ ଏସ୍ପିଙ୍କ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦିଆଯାଇଛି।
ସହଦେବଖୁଣ୍ଟା ଥାନା ଶୋଭାରାମପୁର ଅଞ୍ଚଳର ପାପା ଓଡ଼ିଶା, ଝାଡ଼ଖଣ୍ଡ, ପଶ୍ଚିମବଙ୍ଗ ରାଜ୍ୟର ବିଭିନ୍ନ ଅଞ୍ଚଳରେ ନିଜର ଗ୍ୟାଙ୍ଗ ଗଠନ କରି ବିଭିନ୍ନ ଅପରାଧ ଘଟାଉଥିଲା। ବାଲେଶ୍ୱର ସହରରେ ୩୦/୪୦ ଜଣଙ୍କ ନେଇ ସେ ଏକ ଗ୍ୟାଙ୍ଗ କରି ଅପରାଧିକ ସାମ୍ରାଜ୍ୟ ଚଳାଇଥିଲେ। ସ୍ଥାନୀୟ ବ୍ୟବସାୟୀ, ଠିକାଦାର, ଶିଳ୍ପପତିମାନଙ୍କଠାରୁ ସେ ଦାଦାବଟି ଆଦାୟ କରୁଥିଲେ। ୨ଟି ହତ୍ୟା ଘଟଣା ସହ ୨୦ଟି ବିଭିନ୍ନ ମାମଲାରେ ସେ ଜଡ଼ିତ ଥିବାର ଜଣାପଡ଼ିଛି। ଅଳ୍ପ ଦିନ ତଳେ ସହଦେବଖୁଣ୍ଟା ଥାନା ଅଞ୍ଚଳରେ ହୋଇଥିବା ଏକ ଡକାୟତି ମାମଲାରେ ତାଙ୍କୁ ଗିରଫ କରାଯାଇଛି। ତାଙ୍କୁ ଧରିବା ପାଇଁ ଜିଲା ପୋଲିସ ଯୋଜନାବଦ୍ଧ ଭାବେ କାର୍ଯ୍ୟ କରିଆସୁଥିଲା। ସେ ଏକାଧିକ ମୋବାଇଲ ବ୍ୟବହାର କରିବା ସହ ଝାଡ଼ଖଣ୍ଡ ଓ ପଶ୍ଚିମବଙ୍ଗରେ ରହୁଥିଲେ। ଗ୍ୟାଙ୍ଗରେ ଥିବା ଲୋକଙ୍କ ଦ୍ୱାରା ବାଲେଶ୍ୱରରେ ବିଭିନ୍ନ ଅପରାଧ କରୁଥିଲେ। ଶନିବାର ରାତିରେ ତାଙ୍କୁ କଟକ ରେଳଷ୍ଟେଶନ ନିକଟରେ ଠାବ କରାଯାଇ ଗିରଫ କରାଯାଇଥିଲା। ରବିବାର କୋର୍ଟଚାଲାଣ କରାଯାଇଛି। ପାପାଙ୍କୁ ରିମାଣ୍ଡରେ ଆଣିବା ପରେ ତାଙ୍କର ସମସ୍ତ ଗ୍ୟାଙ୍ଗ ଏବଂ ଅପରାଧ ସମ୍ପର୍କରେ ତଥ୍ୟ ମିଳିପାରିବ। ତାଙ୍କଠାରୁ ୧୧ଟି ମୋବାଇଲ ଜବତ ହୋଇଥିବାର ଏସ୍ପି କହିଛନ୍ତି। ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ତପନ କୁମାର ପଟ୍ଟନାୟକ, ଡିଏସ୍ପି ଉମେଶ ପଣ୍ଡା, ସହଦେବଖୁଣ୍ଟା ଥାନାଧିକାରୀ ପରେଶ ରାଉତ ପ୍ରମୁଖ ଉପସ୍ଥିତ ଥିଲେ।
