ଅନୁଗୋଳ ଅଫିସ, ୫।୬- ଅନୁଗୋଳ ହୁଲୁରୁସିଂହା ଜେମାଦେଈପୁରରେ ଥିବା ଏକ ନର୍ସିଂହୋମର ଶୌଚାଳୟ ପାଣି ଗଁା ମଝି ଦେଇ ଲିଙ୍ଗରାଯୋଡି ନାଳକୁ ଛଡ଼ାଯାଉଥିବା ଅଭିଯୋଗ କରି ସୋମବାର ରାତିରେ ଗ୍ରାମବାସୀ ନର୍ସିଂହୋମ ଘେରାଉ କରିଥିଲେ। ଏହାକୁ ନେଇ ଉତ୍ତେଜନା ପ୍ରକାଶ ପାଇଥିଲା। ବୁଝାଶୁଝା ପରେ ଗ୍ରାମବାସୀ ଫେରିଯାଇଥିଲେ। ହେଲେ ଘଟଣାକୁ ନେଇ ରାତିରେ ନର୍ସିଂହୋମ ମାଲିକାଣୀ ଥାନାର ଦ୍ୱାରସ୍ଥ ହେବାରୁ ମଙ୍ଗଳବାର ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି। ପୋଲିସ ଗ୍ରାମବାସୀଙ୍କୁ ଥାନାକୁ ଡାକି ସେମାନଙ୍କ ବିରୋଧରେ ନଂ. ୩୯୮/୧୯ରେ ମାମଲା ରୁଜୁ ହୋଇଥିବା ଜଣାଇଥିବା ବେଳେ ସ୍ଥାନୀୟ ସରପଞ୍ଚଙ୍କ ସ୍ବାମୀ ଘଟଣାର ସମାଧାନ ପାଇଁ ଉଦ୍ୟମ ଜାରି ରଖିଛନ୍ତି।
ପ୍ରକାଶ ଯେ, ସୋମବାର ବିଳମ୍ବିତ ରାତିରେ ହୁଲୁରୁସିଂହା ଗ୍ରାମର ଶତାଧିକ ମହିଳା ଓ ପୁରୁଷ ଉକ୍ତ ନର୍ସିଂହୋମ ଘେରାଉ କରିଥିଲେ। ସେମାନେ ଅଭିଯୋଗ କରିଥିଲେ ଯେ, ନର୍ସିଂହୋମ କର୍ତ୍ତୃପକ୍ଷ ଶୌଚାଳୟ ପାଣି ସହ ବିଭିନ୍ନ ବର୍ଜ୍ୟବସ୍ତୁ ଲିଙ୍ଗରାଯୋଡ଼ି ନାଳରେ ପକାଉଛନ୍ତି। ଏପରି କି ଗାଁ ରାସ୍ତା ଦେଇ ଶୌଚାଳୟ ପାଣି ଛାଡ଼ି ଦେଉଛନ୍ତି। ଏଭଳି ଘଟଣା ଦିନେ କି ମାସକର ନୁହେଁ। ଏ ନେଇ ବାରମ୍ବାର ବିଭିନ୍ନ ସ୍ଥାନରେ ଅଭିଯୋଗ କରାଯାଇଛି। କିନ୍ତୁ କାର୍ଯ୍ୟାନୁଷ୍ଠାନ ଶୂନ। ପୂର୍ବରୁ ଥରେ ଗ୍ରାମବାସୀ ଥାନାର ଦ୍ୱାରସ୍ଥ ହୋଇଥିଲେ। ସେତେବେଳେ ନର୍ସିଂହୋମ କର୍ତ୍ତୃପକ୍ଷ ପାଚେରି କରିବା ସହ ଶୌଚାଳୟ ପାଣି ଗାଁ ଦେଇ ଯୋରକୁ ଛଡ଼ାଯିବ ନାହିଁ ବୋଲି କହିଥିଲେ। କିନ୍ତୁ ପ୍ରତିଶ୍ରୁତି ନ ରଖି ପୁନର୍ବାର ପାଣି ଛାଡ଼ୁଥିବାରୁ ଗ୍ରାମବାସୀ ନର୍ସିଂହୋମ ମାଲିକାଣୀଙ୍କ ସହ ଆଲୋଚନା କରି ସମାଧାନ ବାଟ ବାହାର କରିବାକୁ ଆସିଥିଲେ। କିନ୍ତୁ ସେ ଅସଭ୍ୟ ଭାଷାରେ ଗାଳି ଗୁଲଜ କରିବା ସହ ସିସିଟିଭି ଫୁଟେଜ ଆଧାରରେ ଥାନାରେ ଗ୍ରାମବାସୀଙ୍କ ନଁାରେ ଏତଲା ଦେବାକୁ ଧମକାଇଥିଲେ ବୋଲି ଗ୍ରାମବାସୀ ପ୍ରକାଶ କରିଥିଲେ। ଘଟଣାସ୍ଥଳରେ ଉପସ୍ଥିତ ଥିବା ପୋଲିସ ଓ ସରପଞ୍ଚଙ୍କ ସ୍ବାମୀ ବୁଝାଶୁଝା କରି ଗ୍ରାମବାସୀଙ୍କୁ ଫେରାଇ ଦେଇଥିଲେ ହେଁ ନର୍ସିଂହୋମ ମାଲିକାଣୀ ସୋମବାର ରାତିରେ ଏ ନେଇ ଥାନାରେ ଏତଲା ଦେଇଥିଲେ। ଗ୍ରାମବାସୀ ମଙ୍ଗଳବାର ସକାଳେ ଏତଲା ସମ୍ପର୍କରେ ପୋଲିସଠାରୁ ଜାଣିବାକୁ ପାଇଥିଲେ। ପୋଲିସ ଗଁାକୁ ଯାଇ ଏତଲା ହୋଇଥିବା କହିବା ସହ ସନ୍ଧ୍ୟାରେ ଥାନାରେ ହାଜର ହେବାକୁ ତାଗିଦ କରିଥିଲା। ଏହାକୁ ନେଇ ଗ୍ରାମବାସୀ ଆଶ୍ଚର୍ଯ୍ୟ ହୋଇଯାଇଥିଲେ। ସେମାନେ ସମସ୍ୟା ଭୋଗୁଥିବା ବେଳେ ପୋଲିସ ସେମାନଙ୍କୁ ନ୍ୟାୟ ଦେବା ବା ସମାଧାନ କରିବା ପରିବର୍ତ୍ତେ ନର୍ସିଂହୋମ ମାଲିକାଣୀଙ୍କ ଏତଲାକୁ ଆଧାର କରି ସେମାନଙ୍କୁ ଥାନାକୁ ଡାକିବା ନେଇ ପ୍ରଶ୍ନ କରିଥିଲେ। କିନ୍ତୁ ସନ୍ଧ୍ୟାରେ ଗ୍ରାମବାସୀ ଥାନାକୁ ଆସିଥିଲେ ହେଁ ଘଟଣାର କିଛି ସମାଧାନର ବାଟ ବାହାରି ପାରି ନ ଥିଲା। ପରେ ସରପଞ୍ଚଙ୍କ ସ୍ବାମୀ ପହଞ୍ଚି ନର୍ସିଂହୋମ କର୍ତ୍ତୃପକ୍ଷ ପାଚେରି ବୁଲାଇବେ ଓ ସମସ୍ୟାର ସମାଧାନ ୧୫ ଦିନ ମଧ୍ୟରେ କରାଯିବ ବୋଲି ଗ୍ରାମବାସୀଙ୍କୁ ପ୍ରତିଶ୍ରୁତି ଦେଇଥିବା ଜଣାପଡ଼ିଛି।
ଘଟଣା ସମ୍ପର୍କରେ ନର୍ସିଂହୋମ ମାଲିକାଣୀ କହିଛନ୍ତି, ମୁଁ ଲୋକମାନଙ୍କୁ ସମସ୍ୟାରେ ପକାଇ ନାହିଁ। ବରଂ ସେମାନେ ପାଚେରିକୁ ଶାବଳ ମାରି ଭାଙ୍ଗିଛନ୍ତି। ନର୍ସିଂହୋମ ଝରକାକୁ ପଥର ମାଡ଼ କରିଛନ୍ତି। ଅସଭ୍ୟ ଭାଷାରେ ଗାଳିଗୁଲଜ କରିଛନ୍ତି। ତେଣୁ ସେମାନଙ୍କ ନାମରେ ଲିଖିତ ଅଭିଯୋଗ କରିଥିବା ନର୍ସିଂହୋମ ମାଲିକାଣୀ ପ୍ରକାଶ କରିଛନ୍ତି। ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ କହିଛନ୍ତି, ଅଭିଯୋଗ କ୍ରମେ ଥାନାରେ ମାମଲା ରୁଜୁ ହୋଇଛି। ଘଟଣାର ତଦନ୍ତ ଚାଲିଛି।
