ନୟାଗଡ଼ ଅଫିସ,୧୮।୧୨-ନୟାଗଡ଼ ସହରରେ ମାତିଛନ୍ତି ଜମି ମାଫିଆ। ସହରର ପାହାଡ଼ କଡ଼ରେ ଥିବା ଉଭୟ ଜଙ୍ଗଲ ଓ ଗୋଚର ଜମିକୁ ଶାଗମାଛ ଦରରେ ଏମାନେ ଲୋକମାନଙ୍କୁ ବିକ୍ରି କରୁଛନ୍ତି। ଏହି ମାଫିଆମାନେ ପାହାଡ଼କୁ ଫଟାଇ କାଟି ସଫା କରି ପ୍ଲଟିଂରେ ବିକ୍ରି କରୁଛନ୍ତି। ପ୍ରଶାସନିକ କର୍ମଚାରୀଙ୍କୁ ହାତ କରି ମାଫିଆମାନେ ନୟାଗଡ଼ ସହରରେ ନିର୍ଭୟରେ ଏହିଭଳି ବ୍ୟବସାୟ କରୁଥିବା ଦେଖିବାକୁ ମିଳିଛି।
ପୌରପାଳିକାର ୬ ନମ୍ବର ୱାର୍ଡ ନାଏକସାହିଠାରେ ଥିବା ବଳରାମ ପାହାଡ଼ ତଳେ ଏଭଳି ଘଟଣା ଦେଖିବାକୁ ମିଳିଛି। ବଳରାମ ପାହାଡ଼ ନିକଟରେ ଥିବା କିଛି ଗୋଚର ଜମି ଓ ପାହାଡ଼କୁ ଫଟାଇ ଜଙ୍ଗଲ ଜମିକୁ ପ୍ଲଟିଂ କରି ଉକ୍ତ ଜାଗାକୁ ବିକ୍ରି କରୁଛନ୍ତି । ଏପରିକି କେତେଜଣ ବ୍ୟକ୍ତି ସେମାନଙ୍କଠାରୁ ଜମି କିଣି ଘର ତିଆରି କରି ସେଠାରେ ରହିଲେଣି। ଉଭୟ ଜଙ୍ଗଲ ଓ ରାଜସ୍ବ ବିଭାଗର କର୍ମଚାରୀମାନଙ୍କୁ ହାତ କରି ଏମାନେ ଏହିଭଳି ବେଆଇନ କାର୍ଯ୍ୟ କରୁଥିବା ଅଭିଯୋଗ ହେଉଛି। ସହରରେ ଖଣ୍ଡିଏ ଜାଗା ପାଇଁ ଲୋକଙ୍କ ନିଦ ହଜିଯାଉଥିବା ବେଳେ କମ୍ ଦାମରେ ଜାଗା ମିଳିଯାଉଥିବାରୁ ଏହା ମାଫିଆମାନଙ୍କୁ ସୁହାଉଛି। ସେମାନେ ଖୁବ୍ କମ୍ ଦରରେ ଲୋକମାନଙ୍କୁ ଜମି ବିକ୍ରି କରୁଛନ୍ତି। କିପରି ଗୋଚର ଜମିକୁ ପ୍ଲଟିଂ କରି ବିକ୍ରି କରାଯାଉଛି ତାହା ତଦନ୍ତ ସାପେକ୍ଷ। ସହର ନିକଟରେ ଏତେ ସବୁ ଘଟଣା ଘଟୁଥିଲେ ମଧ୍ୟ କିପରି ପ୍ରଶାସନିକ ଅଧିକାରୀମାନେ ଏହା ଜାଣିପାରୁନାହାନ୍ତି ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହେଉଛି। ପ୍ରଶାସନ ସବୁ ଜାଣି ନୀରବ ବୋଲି ସେମାନେ ଅଭିଯୋଗ କରିଛନ୍ତି। ଏ ନେଇ ନୟାଗଡ଼ ତହସିଲଦାର କାର୍ଯ୍ୟାଳୟର ଜଣେ ଅଧିକାରୀଙ୍କୁ ପଚାରିବାରୁ ସେ ଏହାର ତଦନ୍ତ କରିବେ ବୋଲି ପ୍ରକାଶ କରିଥିଲେ। ଏଥିପ୍ରତି ବିଭାଗ ଦୃଷ୍ଟିଦେବାକୁ ସାଧାରଣରେ ଦାବି ହେଉଛି।
