କୋରାପୁଟ,୨୪ା୪(ସ୍ବ.ପ୍ର.)
ଗର୍ଭବତୀ ଥିବା ଜଣେ ମୂକ ବଧିର ମହିଳାଙ୍କ ପ୍ରସବ ବେଦନା ହେବା କ୍ଷଣି ପରିବାର ଲୋକେ ତାଙ୍କୁ ଘରୁ ତଡ଼ିଦେଲେ। ମହିଳା ଜଣକ ଘର ସାମ୍ନା ଅଳିଆଗଦାରେ ପଡ଼ିରହି ସନ୍ତାନ ଜନ୍ମ କଲେ। ଗାଁଲୋକେ ମଧ୍ୟ କିଛି ସହାୟତା କଲେନାହିଁ। କୋରାପୁଟ ଜିଲା ଲମତାପୁଟ ବ୍ଲକ ତୁସବା ପଞ୍ଚାୟତ ଆଉଡିଗୁଡ଼ା ଗ୍ରାମରେ ଅମାନବିକତାର ଏଭଳି ଅଭାବନୀୟ ଚିତ୍ର ଦେଖିବାକୁ ମିଳିଛି। ଜିଲା ଶିଶୁ ସୁରକ୍ଷା ବିଭାଗ ଏହି ଖବର ପାଇ ବୁଧବାର ପ୍ରସୂତି ଓ ନବଜାତ ଶିଶୁକୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛି।
ସୂଚନା ଅନୁଯାୟୀ, ଆଉଡିଗୁଡ଼ା ଗ୍ରାମର ଏହି ପୀଡ଼ିତା ମହିଳା (୨୯) ମୂକ ଓ ବଧିର ଅଟନ୍ତି। ଏହି ଅକ୍ଷମତାର ସୁଯୋଗ ନେଇ କେହି ତାଙ୍କ ସହ ଶାରୀରିକ ସମ୍ପର୍କ ରଖି ତାଙ୍କୁ ଗର୍ଭବତୀ କରିଥିଲେ। ମଙ୍ଗଳବାର ରାତିରେ ତାଙ୍କର ପ୍ରସବ ବେଦନା ଆରମ୍ଭ ହେବାରୁ ଲୋକଲଜ୍ଜା ଭୟରେ ପରିବାର ଲୋକେ ତାଙ୍କୁ ଘରୁ ତଡ଼ିଦେଇଥିଲେ। ମହିଳା ଜଣକ ଘର ସମ୍ମୁଖ ଅଳିଆଗଦାରେ ଯାଇ ରହିଥିବା ବେଳେ ସେଠାରେ ସନ୍ତାନ ପ୍ରସବ ହୋଇଥିଲା। ଏପରି ଅବସ୍ଥାରେ ଗାଁଲୋକେ ମଧ୍ୟ ମାନବିକତା ଦେଖାଇ ନଥିଲେ। ପ୍ରସୂତି ଜଣକ ଅନ୍ୟ କିଛି ଉପାୟ ନପାଇ ସଦ୍ୟଜାତ ସନ୍ତାନର ନାହି ନିଜେ କାଟିବା ସହ ମୂର୍ମୁଷୁ ଅବସ୍ଥାରେ ସେଠାରେ ରାତିସାରା ପଡ଼ିରହିଥିଲେ। ବୁଧବାର ସକାଳୁ ଗ୍ରାମର ଜଣେ ସହୃଦୟ ବ୍ୟକ୍ତି ତାଙ୍କ ପାଖକୁ ଆସି ମଶାରୀ ଓ ଚାଦର ସହ କିଛି ଖାଦ୍ୟ ଦେଇଥିଲେ। ଗାଁର ଅଙ୍ଗନଓ୍ବାଡ଼ି କର୍ମୀ ଗୀତା ଜାନି ଏ ସମ୍ପର୍କରେ କୋରାପୁଟ ମେଡିକାଲରେ ଥିବା ସଖୀ କେନ୍ଦ୍ରକୁ ଫୋନରେ ଜଣାଇବା ପରେ ସେଠାକାର ଇନଚାର୍ଜ କୋରାପୁଟ ଶିଶୁ ସୁରକ୍ଷା ଅଧିକାରୀ ରାଜଶ୍ରୀ ଦାସଙ୍କୁ ଏନେଇ ସୂଚନା ଦେଇଥିଲେ। ଡିସିପିଓ ଘଟଣାସ୍ଥଳରେ ପହଞ୍ଚତ୍ ଅସ୍ବାସ୍ଥ୍ୟକାର ପରିବେଶ ଓ ଅସହାୟ ଅବସ୍ଥାରେ ଥିବା ପ୍ରସୂତିଙ୍କ ସହ ତାଙ୍କର ନବଜାତ ଶିଶୁକୁ ଅଳିଆଗଦାରୁ ଉଦ୍ଧାର କରିଥିଲେ। ସେଠାରୁ ଉଭୟଙ୍କୁ କୋରାପୁଟ ସ୍ଥିତ ଡିସିପିଓ ଅଫିସ ଅଣାଯିବା ପରେ ଚିକିତ୍ସା ପାଇଁ ରାତି ୮ଟାରେ କୋରାପୁଟ ମେଡିକାଲରେ ଭର୍ତ୍ତି କରାଯାଇଛି।
