ଜାମଟିକ୍ରା, ୨୭।୪ (ଡି.ଏନ୍.ଏ.): ଓଡ଼ିଶାରେ ଗଁାଗଁଲିନୁ ଆରମ୍ କରି ସହର ତକ୍ ସମକର ପସନ୍ ପଖାଲ। ଖରାଦିନ୍ ଆରମ୍ ହେଲେ ସମ୍କର ମନ୍ ପଖାଲ ଖାଏବାକେ ଘିଚି ହେସି। ହେଲେ ଦିନୁଦିନ୍କେ ସାମାଜିକ ଥିତି ବଦଲିବାର ସଂଗେ ଆମର ଖାଏଦ୍ପାନ୍ ବି ବଦଲୁଛେ, ତାର ସଂଗେ ସବୁ ଜିନିଷର ଦରଦାମ୍ ବଢ଼ୁଛେ। ଏନ୍ତାଥି ପଖାଲ ସଂଗେ ଲୋକ୍ ଖାଉଥିବାର ତୁନ୍ଶାଗ ବି ଗରିବ୍ ଦୁଖିକର ଲାଗି ଦିନୁଦିନ୍କେ ଦୁରଲଭ ହେଇଯାଉଛେ। ଲୋକ୍ ପଖାଲ ସଂଗେ ଶାଗ୍ ଖରଡ଼ା, ଭଜା, ତେଁତେଲ, ଆମୁଲ, ଦେଶୀ ଉଲି ପାଗ୍କରି ଖାଉଥିଲେ। ପଛେ ସରକାର ଟଁକାଟେରେ ଗରିବ୍ ଦୁଖିକୁ ଚାଉଲ ଦେଇ ଲୁକ୍କର ମୁହେଁ ହଁସ୍ ଫୁଟେଇଥିଲେ। ହେଲେ ସରକାର ଚାଉଲ କେ.ଜି. ଟଁକେରେ ଯୁଗେଇ ଦେଲେ କାଣା ହେବା, ଶାଗ୍ କେ.ଜି. ତ ୪୦ ଟଁକାରେ ପୁହୁଁଚିଲାନ। ଯେନ୍ଥିରଲାଗି ଦିନୁଦିନ୍କେ ଗରିବ୍ ଦୁଖିକର ପଖାଲ ଗରସେ ଖାଏବାର ସରାଗ୍ ବି ମେଟିଯାଉଛେ। ଇଆଡ଼େ ପଖାଲଟା ଏହେଦେ ଧନୀ ଲୁକ୍କର ମନ୍ପସନ୍ର ଖାଏଦ୍ ହେଇଛେ। ରାଏଜର ଛୋଟରୁ ବଡ଼ ସବୁ ହୋଟେଲମାନକୁ ଖରାଦିନେ ଜାତିର ଜାତିର ପଖାଲ ମିଲୁଛେ। ସେ ହିସାବେ ପଖାଲର ଦାମ୍ ବି ରହୁଛେ। ଖରାଦିନେ ବଡ଼ଭାଗି ଚାକ୍ରିଆ ଲୋକ୍ ହୋଟେଲମାନକେ ପଖାଲ ଖାଏବାକେ ମନ୍ କରୁଛନ୍। ହେଲେ ପନିପରିବାର ଆକାଶ ଛୁଅଁ। ଦର ଗରିବ୍ ଦୁଖିକର ମୁହୁଁରୁ ଇ ପଖାଲ ଦୁରାକ ଛଡ଼େଇ ନେଉଛେ।
ଦିନାକେତେ ହେଲା ଅତାବିରା ବଜାରରେ ସବୁ ପନିପରିବା ଦର ୪୦ ଟଁକାରୁ ଉପରେ ରହିଛେ। ପୁଟଲ କେ.ଜି. ୬୦, କରଲା ୪୦, ବାଇଗନ ୩୦ରୁ ୪୦, ମାଖନ ୧୫, ଭେଁଡ଼ି ୪୦ ଟଁକା ରହିଛେ। ସେନ୍ତା ବାଜିଶାଗ୍ କେ.ଜି. ୪୦ ଟଁକା, ମୁନଗା ଶାଗ, ଖଡ଼ା ଶାଗ, ଲଲିତା ଶାଗ କେ.ଜି. ବି ୪୦ ଟଁକା ରହିଛେ। ଯେନ୍ଥିରଲାଗି ଗରିବ୍ ଦୁଖି ପଖାଲ ଦୁରା ଖାଏବାରୁ ବଁଚିତ୍ ହେଉଛନ୍। ଇଆଡ଼େ ରାଏଜ୍ ଆର କେନ୍ଦ୍ର ସରକାର ଗରିବ୍ ଦୁଖିକୁ ଚାଉଲ ଦେଇ ଖାଏଦ୍ ସୁରକ୍ଷା ଯୁଗେଇ ଦେଉଥିବାର ଡିଂଗରା ପିଟୁଛନ୍। ଇଆଡ଼େ ଆକଶ ଛୁଅଁା ଦରଦାମ୍ ଉପରେ ଯୋଗାଣ ବିଭାଗର ଲଗାମ୍ ନାଇଁ ରହିବାର, ଯେନ୍ଥିରଲାଗି ଅନେକ ଜାଗାରେ ନିହାତି ଗରିବ୍ ଦୁଖି ପଖାଲ ଦୁରା ଖାଏବାର ଲାଗି ତରସି ଯାଉଛନ୍। ପନିପରିବାର ଆକଶ ଛୁଅଁା ଦରଦାମ୍ ଉପରେ ରାଏଜ୍ ସରକାର ଆର ଥାନୀୟ ପରଶାସନ୍ ଲଗାମ କସବାକେ ଜନ ସାଧାରନରେ ଦାବି ହେଉଛେ।
