ଭଦ୍ରକ ଅଫିସ, ୨୭।୮- ଗଛବୃଚ୍ଛ ନ ରହିଲେ ପରିବେଶ ଉଜୁଡ଼ି ଯିବ। ୧୯୯୯ ମହାବାତ୍ୟାରେ ବହୁ ସଂଖ୍ୟାରେ ଗଛ ଭାଙ୍ଗି ପଡ଼ିବା ପରେ ବୃକ୍ଷରୋପଣକୁ ନିଜ ଜୀବନର ଅନ୍ୟତମ ଲକ୍ଷ୍ୟ ଭାବେ ଗ୍ରହଣ କରି ବିଷ୍ଣୁପ୍ରସାଦ ପାଢୀ(୫୦) ଏ ଦିଗରେ କାର୍ଯ୍ୟ କରି ଚାଲିଛନ୍ତି। ବିଭିନ୍ନ ସ୍ଥାନରେ ୬ ହଜାରରୁ ଊର୍ଦ୍ଧ୍ୱ ଗଛ ଲଗାଇବା ସହ ୩ ଏକର ଜାଗାରେ ଏକ ଉଦ୍ୟାନ ସୃଷ୍ଟି କରି ଚର୍ଚ୍ଚାକୁ ଆସିଛନ୍ତି।
ବିଷ୍ଣୁପ୍ରସାଦଙ୍କ ପେସା ଶିକ୍ଷକତା, ହେଲେ ନିଶା ଗଛ ଲଗାଇବା। ମହାବାତ୍ୟା ପରଠାରୁ ନିଜେ ଗଛ ଲଗାଇବା ସହ ଏ ଦିଗରେ ଅନ୍ୟମାନଙ୍କୁ ସଚେତନ କରାଇ ଆସୁଛନ୍ତି। ତାଙ୍କ ଘର ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ନାଅଁାମୀ ଗ୍ରାମରେ। ସେ କେନ୍ଦୁଝର ଜିଲା ସରଳା ଉଚ୍ଚ ପ୍ରାଥମିକ ବିଦ୍ୟାଳୟରେ ଏବେ ପ୍ରଧାନଶିକ୍ଷକ ଭାବେ କାର୍ଯ୍ୟ କରୁଛନ୍ତି। ବିଷ୍ଣୁପ୍ରସାଦ କହନ୍ତି, ଶିକ୍ଷକତା ଜୀବନରେ ସେ ଯେଉଁ ଯେଉଁ ସ୍କୁଲରେ ଚାକିରି କରିଆସିଛନ୍ତି ସେଠାରେ ଛାତ୍ରୀଛାତ୍ରଙ୍କ ସହଯୋଗରେ ସବୁଜବନାନୀ ସୃଷ୍ଟି କରିଛନ୍ତି। ଏଥିସହ ନିଜ ଦରମାର ଏକ ତୃତୀୟାଂଶ ଖର୍ଚ୍ଚ କରି ବିଭିନ୍ନ ସ୍ଥାନରେ ଚାରା ଲଗାଇ ଆସୁଛନ୍ତି। ବର୍ତ୍ତମାନ ପ୍ରଧାନଶିକ୍ଷକ ଭାବେ କାର୍ଯ୍ୟ କରୁଥିବା ସରଳା ଉଚ୍ଚ ପ୍ରାଥମିକ ବିଦ୍ୟାଳୟରେ ଏକ ସୁନ୍ଦର ଉଦ୍ୟାନ ସୃଷ୍ଟି କରି ଆଖପାଖ ଗାଁ ଲୋକଙ୍କ ପ୍ରିୟଭାଜନ ହୋଇପାରିଛନ୍ତି। ନିଜ ଘର ପାଖ ନାଆଁମୀ କଲେଜ ନିକଟସ୍ଥ ଏକ ୩ ଏକର ଜଙ୍ଗଲ କିସମ ଜାଗାରେ ଗଛ ଲଗାଇ ସୃଷ୍ଟି କରିଥିବା ଉଦ୍ୟାନ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ମଞ୍ଜୁରିରୋଡ ଷ୍ଟେଶନଠାରୁ ୨ କି.ମି. ଓ ଛତାବର ଜାତୀୟ ରାଜପଥ ଠାରୁ ୮କି.ମି. ଦୂରରେ ଏହି ଉଦ୍ୟାନ ରହିଛି। ଚାରା ଲଗାଇ ପରିବେଶକୁ ସୁରକ୍ଷିତ ରଖିବା ବାର୍ତ୍ତା ଦେବା ସକାଶେ ସେ ୨୦୧୬ ମସିହା ରଥଯାତ୍ରା ଦିନ ଏହି ଉଦ୍ୟାନ କାର୍ଯ୍ୟ ଆରମ୍ଭ କରିଥିଲେ। ସେଠାରେ ଔଷଧୀୟ ବୃକ୍ଷଠାରୁ ଆରମ୍ଭ କରି ବିଭିନ୍ନ ଫଳ ଓ ସାଧାରଣଗଛ ଲଗାଇଛନ୍ତି। ସମ୍ପ୍ରତି ସବୁଜିମା ମଣ୍ଡିତ ଏହି ଉଦ୍ୟାନରେ ହରିଡା, ବାହାଡା, ଶନି, ଅଶୋକ, ଲିମ୍ବ, ମହାଲିମ୍ବ, ସାତରୁ ଆଠ ପ୍ରକାରର ଆମ୍ବ ଆଦି ୩୦ ପ୍ରକାରର ଗଛ ରହିଛି। ପ୍ରତିଦିନ ସକାଳ ୫ ଟାରୁ ଉଠି ସେ ବଗିଚାରେ ବିଭିନ୍ନ ଗଛର ଯନତ୍ ନେବା ସହ ଔଷଧ ଓ ଖତ ପ୍ରଦାନ କରିଥାନ୍ତି। ପ୍ରାୟ ୯ଟା ପର୍ଯ୍ୟନ୍ତ ଗଛର ଯନତ୍ ନେଇ ୧୦ ଟାରେ ସ୍କୁଲକୁ ଯାଆନ୍ତି। ଅପରାହ୍ନ ୫ ଟାରେ ସ୍କୁଲରୁ ଫେରି ପୁଣି ଗଛର ଯନତ୍ ନେଇଥାନ୍ତି। ଏହି ବଗିଚାରେ ସେ ଏକ କୁଡ଼ିଆ ଘର ତିଆରି କରିଛନ୍ତି। ପ୍ରତି ସନ୍ଧ୍ୟାରେ ସ୍ଥାନୀୟ ଲୋକଙ୍କୁ ନେଇ ସେଠାରେ ରାତି ପ୍ରାୟ ୮ଟା ପର୍ଯ୍ୟନ୍ତ ଭଗବତ ଚର୍ଚ୍ଚା କରନ୍ତି। ବଗିଚାର ଦେଖାଶୁଣା ପାଇଁ ନଣ୍ଡା ଜେନା ନାମକ ଜଣେ ନିରାଶ୍ରୟ ବ୍ୟକ୍ତିଙ୍କୁ ଦାୟିତ୍ୱ ଦେଇଛନ୍ତି। ଉଦ୍ୟାନ ଚାରିପାଖେ ଦୁଇବର୍ଷରେ ଥରେ ବାଡକୁ ସୁଦୃଢ଼ କରିଥାନ୍ତି। ଏଥିଲାଗି ପ୍ରାୟ ଲକ୍ଷାଧିକ ଟଙ୍କା ଖର୍ଚ୍ଚ ହୋଇଥାଏ। ଗଛ ଲଗାଇବାକୁ ପରିବାର ଲୋକେ ତାଙ୍କୁ ଉସତ୍ାହିତ କରିଥାନ୍ତି ବୋଲି ସେ କୁହନ୍ତି। ଶିକ୍ଷାଦାନ ସାଙ୍ଗକୁ ସାମାଜିକ ଦାୟିତ୍ୱ ନିଭାଇ ବୃକ୍ଷରୋପଣ ଭଳି ମହତ୍ କାର୍ଯ୍ୟ କରି ସେ ନିଜ ପାଇଁ ବେଶ୍ ପ୍ରଶଂସା ସାଉଣ୍ଟିଛନ୍ତି। ବିଭିନ୍ନ ମହଲରୁ ମଧ୍ୟ ତାଙ୍କୁ ସମ୍ମାନିତ କରାଯାଇଛି।
