ବାରିପଦା ଅଫିସ, ୧୫ା୫- ଯେଉଁ ଶ୍ରମିକମାନେ ଦିନେ ଠିକାଦାରଙ୍କ ଈସାରାରେ ଗଛ କାଟି ରାସ୍ତା ଓ ଘର ନିର୍ମାଣ କରୁଥିଲେ, ସେହି ଗଛ ଆଜି ସେମାନଙ୍କ ପାଇଁ ଆଶ୍ରୟସ୍ଥଳୀ ପାଲଟିଛି। ମୟୂରଭଞ୍ଜ ଜିଲା ହାତୀବାରିଠାରେ ଥିବା ଓଡ଼ିଶା-କୋଲକାତା ସୀମାନ୍ତ ଗେଟ୍ ପାଖ ଖୋଲା ପଡ଼ିଆରେ ଥିବା କେତେକ ଗଛ ତଳେ ହଜାର ହଜାର ଶ୍ରମିକ ବିଶ୍ରାମ ନେବା ଘଟଣାରୁ ଏହା ସ୍ପଷ୍ଟ ହୋଇଛି। ଲକ୍ଡାଉନ୍ ଯୋଗୁ ବିଭିନ୍ନ ଶିଳ୍ପ ବନ୍ଦ ହୋଇଥିବା ବେଳେ ସେଠାରେ କାର୍ଯ୍ୟ କରୁଥିବା ଶ୍ରମିକମାନେ ଘରକୁ ଫେରିବାକୁ ଲାଗିଲେଣି। କୋଲକାତାର ବହୁ ଲୋକ କେନ୍ଦୁଝର, ମୟୂରଭଞ୍ଜ, ଯାଜପୁର ଓ ଭଦ୍ରକ ଆଦି ଜିଲାରେ କାମ କରନ୍ତି। କାର୍ଯ୍ୟ ବନ୍ଦ ଯୋଗୁ ସେମାନେ ଚାଲି ଚାଲି ହାତୀବାରିସ୍ଥିତ ଚେକ୍ଗେଟ୍ଠାରେ ପହଞ୍ଚୁଛନ୍ତି। ଦିନେ ଦୁଇ ଦିନ ଅପେକ୍ଷା ପରେ ପଶ୍ଚିମବଙ୍ଗ ସରକାର ସେମାନଙ୍କ ପାଇଁ ଗାଡ଼ି ପଠାଇ ନିଜ ରାଜ୍ୟକୁ ନେଉଛନ୍ତି। ଏହି ଦୁଇଦିନ ସେମାନେ ଗଛ ମୂଳକୁ ଆଶ୍ରୟସ୍ଥଳୀ ବାଛି ନେଉଛନ୍ତି। ସ୍ଥାନୀୟ ଭୁରୁଷାଣି ପଞ୍ଚାୟତ ପକ୍ଷରୁ ସେମାନଙ୍କ ପାଇଁ ରନ୍ଧାଖାଦ୍ୟ ଓ ପାଣିର ବନ୍ଦୋବସ୍ଥ କରାଯାଉଛି। ମାତ୍ର ଆଶ୍ରୟସ୍ଥଳୀର ବ୍ୟବସ୍ଥା ନ ଥିବାରୁ ବର୍ତ୍ତମାନ ମୁଣ୍ଡଫଟା ଖରାରେ ଗଛ ତଳେ ଗାମୁଛା ପାରି ଉକ୍ତ ଶ୍ରମିକମାନେ ବିଶ୍ରାମ ନେଉଥିବା ଦେଖିବାକୁ ମିଳିଛି।
