ଜୁନାଗଡ,୨୧।୪(ଡି.ଏନ୍.ଏ.): କଳାହାଣ୍ଡି ଜିଲା ଇନ୍ଦ୍ରାବତୀ ଦକ୍ଷିଣ କେନାଲ ଅନ୍ତର୍ଗତ ଜୁନାଗଡ ବ୍ଲକ ତଳଜାରିଙ୍ଗ ପଞ୍ଚାୟତରେ କେନାଲ ପାଣି ତଳମୁଣ୍ଡରେ ପହଞ୍ଚି ପାରି ନ ଥିବାରୁ ରବିଧାନ ଫସଲ ଏବେ ମରିବାକୁ ବସିଛି। ରବି ଚାଷ ଆରମ୍ଭ ପୂର୍ବରୁ କେନାଲ ବିଭାଗ ୨୫ କ୍ୟୁବିକ ପାଣି ଦେବା ପାଇଁ ସର୍ତ୍ତ ରଖିଥିଲେ ମଧ୍ୟ ବିଜୁଳି ଉପତ୍ାଦନ ହେଉ ନ ଥିବା କାରଣ ଦର୍ଶାଇ ୧୫କ୍ୟୁବିକ ଦେବାରୁ ଏହି ପରିସ୍ଥିତି ସୃଷ୍ଟି ହେଲା ବୋଲି ଚାଷୀମାନେ ଅଭିଯୋଗ କରିଥିଲେ। ଏ ସମ୍ପର୍କରେ ୨୧ ତାରିଖ ଧରିତ୍ରୀରେ ଖବର ପ୍ରକାଶନ ପରେ ବିଭାଗୀୟ କର୍ତ୍ତୃପକ୍ଷଙ୍କ ଚେତା ପଶିଛି। ମଙ୍ଗଳବାର ଜୁନାଗଡ କୃଷି ଜିଲା ଅଧିକାରୀ ପରମେଶ୍ୱର ମଳ୍ଲିକ, ସହକାରୀ କୃଷି ଅଧିକାରୀ ଗଜାନନ ସାହୁ ଓ ଗ୍ରାମ୍ୟ କୃଷି କର୍ମଚାରୀ ହେମନ୍ତ ରାଉତ ପ୍ରମୁଖ ତଳଜାରିଙ୍ଗ ପଞ୍ଚାୟତର ଘଣ୍ଟବାହାଲି, ଗୁଞ୍ଜୁଗୁଡା ଓ ଲବଣୀପୁର ଗ୍ରାମର ରବିଧାନ କ୍ଷେତ ପରିଦର୍ଶନ କରିଥିଲେ। ଏହି ସମୟରେ ପାଣି ଅଭାବରୁ ନଷ୍ଟ ହେବାକୁ ବସିଥିବା ଚାଷ ଜମି ବୁଲି ଦେଖିଥିଲେ। ପରେ ସେମାନେ ଇନ୍ଦ୍ରାବତୀ ଏସ୍ଡିଓଙ୍କୁ ଶୀଘ୍ର ଏହି ଅଞ୍ଚଳକୁ ପାଣି ଯୋଗାଇଦେବା ପାଇଁ ଫୋନ୍ ଯୋଗେ କଥା ହୋଇଥିଲେ। ତେବେ ଦୁଇଦିନ ଭିତରେ ଏହି ଅଞ୍ଚଳକୁ ଆବଶ୍ୟକ ପରିମାଣରେ ପାଣି ଯୋଗାଇ ଦିଆଯିବ ବୋଲି ଏସ୍ଡିଓ କହିଥିଲେ। ଉଲ୍ଲେଖନୀୟ ଯେ, ପାଣି ଅଭାବରୁ ଅଞ୍ଚଳର ଲବଣୀପୁର ଗ୍ରାମର କେତେକ ଚାଷୀଙ୍କ ପ୍ରାୟ ୨୦ଏକର ଧାନ ଚାଷ ନଷ୍ଟ ହୋଇଥିବା ସେଠାକାର ଚାଷୀ ଅଭିଯୋଗ କରିଥିଲେ।
