ଅନୁଗୋଳ ଅଫିସ, ୨୬।୧୧
ଫାକ୍ଟ୍ରିଜ ଆଣ୍ଡ ବଏଲର୍ସ ଅନୁଗୋଳ ଜୋନ ସହ ନିର୍ଦ୍ଦେଶକ ଉମାକାନ୍ତ ସାମନ୍ତରାୟଙ୍କ ତତ୍ତ୍ବାବଧାନରେ ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡ (ଜେଏସ୍ପିଏଲ୍) ପରିସରରେ କ୍ଲୋରିନ ନିରାପତ୍ତା ପାଇଁ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କ୍ଲୋରିନ ଗ୍ୟାସ ନିରାପତ୍ତା ପାଇଁ ଆବଶ୍ୟକ ହେଉଥିବା ବ୍ୟବସ୍ଥା ଉପରେ ଆଲୋଚନା କରିବା ସହ ଆପାତକାଳୀନ ପରିସ୍ଥିତିରେ ନିଆଯାଉଥିବା ପଦକ୍ଷେପ ସମ୍ପର୍କରେ ଉପସ୍ଥିତ ୧୫୦ ଜଣ କର୍ମଚାରୀ, ଶ୍ରମଜୀବୀଙ୍କୁ ସହ ନିର୍ଦ୍ଦେଶକ ସାମନ୍ତରାୟ ସଚେତନ କରାଇଥିଲେ। ଏହି ଅବସରରେ ଜେଏସ୍ପିଏଲ୍ ମ୍ୟାନେଜମେଣ୍ଟ ଦ୍ୱାରା ନିରାପତ୍ତା ପାଇଁ ନିଆଯାଉଥିବା ବହୁବିଧ ପଦକ୍ଷେପକୁ ସେ ପ୍ରଶଂସା କରିଥିଲେ। ନିର୍ବାହୀ ନିର୍ଦ୍ଦେଶକ ମେଣ୍ଟେନାନ୍ସ ସୁରେଶ କୁମାର, ଜେଏସ୍ପିଏଲ୍ ଗ୍ରୁପ୍ ସୁରକ୍ଷା ବିଭାଗ ମୁଖ୍ୟ ରବିକାନ୍ତ ସୋମନୀ ଓ ବିଭିନ୍ନ ବିଭାଗୀୟ ମୁଖ୍ୟ ଉପସ୍ଥିତ ଥିଲେ। ଜେଏସ୍ପିଏଲ୍ ମ୍ୟାନେଜମେଣ୍ଟ ପକ୍ଷରୁ ମଧ୍ୟ ଠିକଣା ଦିଗ୍ଦର୍ଶନ ପାଇଁ ସାମନ୍ତରାୟଙ୍କୁ ଧନ୍ୟବାଦ ପ୍ରଦାନ କରାଯାଇଥିଲା। ଜେଏସ୍ପିଏଲ୍ ଓଡ଼ିଶାର ମୁଖ୍ୟ ପରିଚାଳନା ଅଧିକାରୀ ପଙ୍କଜ ଗତମ ଏହି ଅବସରରେ ସମସ୍ତଙ୍କୁ ସୁରକ୍ଷା ନିୟମ ମାନି କାର୍ଯ୍ୟ କରିବାକୁ ପରାମର୍ଶ ଦେବା ସହ ଏକ ଦାୟିତ୍ୱସମ୍ପନ୍ନ କର୍ପୋରେଟ ହିସାବରେ ଜେଏସ୍ପିଏଲ୍ ସମଗ୍ର ବ୍ୟବସାୟିକ କାର୍ଯ୍ୟରେ ବିଶ୍ୱସ୍ତରୀୟ ନିରାପତ୍ତା ବ୍ୟବସ୍ଥା ଆପଣାଇଥାଏ ବୋଲି ପ୍ରକାଶ କରିଥିଲେ। ଏହି ଅବସରରେ ଜେଏସ୍ପିଏଲ୍ ପରିସରରେ ନିରାପତ୍ତା ସମ୍ବନ୍ଧୀୟ ଏକ ଉପକ୍ରମ ‘ଆଇନା’ର ପ୍ଲେଟ ମିଲ ଓ ଶିଣ୍ଟର ପ୍ଳାଣ୍ଟଠାରେ ଉଦ୍ଘାଟନ କରିବା ସହ ଉଭୟ ୟୁନିଟ୍ ମଧ୍ୟରେ ଉତ୍କୃଷ୍ଟ ଆଇନା ପ୍ରଦର୍ଶନ ପାଇଁ ପ୍ରତିଯୋଗିତାର ଆୟୋଜନ କରିଥିଲେ। ବିଭାଗୀୟ ମୁଖ୍ୟ ପ୍ଲେଟ ମିଲ ଯୋଗେଶ ପଟେଲ, ବିଭାଗୀୟ ମୁଖ୍ୟ ଶିଣ୍ଟର ପ୍ଳାଣ୍ଟ ବ୍ରିଜ ଭଦଦ୍ରା ପ୍ରମୁଖ ଉପସ୍ଥିତ ଥିଲେ। ଜିଏମ୍ ନିରାପତ୍ତା ନବୀନ ଗତମ କାର୍ଯ୍ୟକ୍ରମଟି ସଂଯୋଜନା କରିଥିଲେ।
