ଗୁଜରାଟ,୨୫।୮: ପରିବେଶ ପ୍ରଦୂଷଣ କମ୍ କରିବାକୁ ଓ ବୃକ୍ଷ ସଂଖ୍ୟା ବଢାଇବାକୁ ଯାଇ ବିଶ୍ୱବିଦ୍ୟାଳୟର ଜଣେ ପ୍ରଫେସର ଭିନ୍ନ ଏକ ଉପାୟ ଅବଲମ୍ବନ କରିଛନ୍ତି। ଏଥିପାଇଁ ପ୍ରଫେସରଙ୍କ ନିୟମ ହେଲା ଯେଉଁ ଛାତ୍ରୀଛାତ୍ରମାନେ ବିଳମ୍ବରେ କ୍ଲାସକୁ ଆସିବେ ସେମାନଙ୍କୁ ଦଣ୍ଡ ସ୍ବରୂପ ବିଶ୍ୱବିଦ୍ୟାଳୟ ପରିସରରେ ଏକ ଚାରା ରୋପଣ କରିବାକୁ ପଡିବ। ପ୍ରାୟ ୮ ବର୍ଷ ପୂର୍ବରୁ ଆରମ୍ଭ ହୋଇଥିବା ଏହି ନିଆରା ଦଣ୍ଡ ପାଇଁ ଏବେ ବୀର ନର୍ମଦ ସାଉଥ୍ ଗୁଜରାଟ ଯୁନିର୍ଭସିଟି ପରିସରରେ ପାଖାପାଖି ୫୫୦ ବୃକ୍ଷ ଦେଖିବାକୁ ମିଳିଛି। ଏଥିରେ କିଛି ଗଛର ଉଚ୍ଚତା ପ୍ରାୟ ୨୦ ଫୁଟ ହୋଇ ଗଲାଣି। ପ୍ରଫେସର ମେହୁଲ ପଟେଲ ସେଠାରେ ଆର୍କିଟେକଚର ବିଭାଗରେ କାମ କରୁଥିବଳେ ସେ ତାଙ୍କ ବିଭାଗର ଛାତ୍ରୀଛାତ୍ରଙ୍କୁ ଦେଉଥିବା ଦଣ୍ଡ ସ୍ବରୂପ ଏବେ ତାଙ୍କ ବିଭାଗ ନିକଟରେ ଏକ ସବୁଜ ପରିବେଶ ସୃଷ୍ଟି ହୋଇଛି ବୋଲି ସେ କୁହନ୍ତି। ଯାହା ଫଳରେ ଏବେ ସେଠାରେ ବିଭିନ୍ନ ପକ୍ଷୀଙ୍କ କଳରବ ଶୁଣିବାକୁ ମିଳୁଥିବା ବେଳେ ବିଭିନ୍ନ ପ୍ରକାରର ପ୍ରଜାପତି ଓ ମହୁମାଛିଙ୍କୁ ମଧ୍ୟ ଦେଖିବାକୁ ମିଳୁଛି। ନିକଟରେ ଏକ ପୁଷ୍କରିଣୀ ଥିବାରୁ ପରିବେଶ ବେଶ୍ ମନମୁଗ୍ଧକର ହୋଇଥିବା ସେ ପ୍ରକାଶ କରନ୍ତି। ତେବେ କେବଳ କ୍ଲାସକୁ ବିଳମ୍ବରେ ଆସିଲେ ନୁହେଁ ଅନ୍ୟ ଛୋଟମୋଟ ଭୁଲ୍ ପାଇଁ ମଧ୍ୟ ପ୍ରଫେସର ମେହୁଲ ପଟେଲ ମଧ୍ୟ ଏହି ଦଣ୍ଡ ଦେଇଥାଆନ୍ତି। ଯେମିତିକି ଯଦି କେହି ଶିକ୍ଷାର୍ଥୀ ବିଳମ୍ବରେ ପ୍ରୋଜେକ୍ଟ ଦାଖଲ କରିଥାଆନ୍ତି, କାହାର ଫୋନ୍ ଯଦି କ୍ଲାସରେ ବାଜି ଉଠିଥାଏ ତେବେ ତାଙ୍କୁ ଗଛ ଲଗାଇବା ଭଳି ଦଣ୍ଡ ଦିଅନ୍ତି ପ୍ରଫେସର ମେହୁଲ ପଟେଲ। ଏଥିରେ ପିଲାମାନେ ଖୁସି ଅନୁଭବ କରିବା ସହ ଅନ୍ୟପଟେ ପରିବେଶକୁ ପ୍ରଦୂଷଣରୁ ମଧ୍ୟ ରକ୍ଷା କରାଯାଇ ପାରୁଛି।
