୨୦୧୯ ବର୍ଷର ଆଇସିସି ସ୍ପିରିଟ୍ ଅଫ୍ କ୍ରିକେଟ ପୁରସ୍କାର ଭାରତୀୟ ଅଧିନାୟକ ବିରାଟ କୋହଲିଙ୍କୁ ମିଳିଛି। ତାଙ୍କ ଭଳି ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ମଧ୍ୟ ଗୋଟିଏ ନିଷ୍ପତ୍ତି ଯୋଗୁ ଏହି ସମ୍ମାନ ଜନକ ପୁରସ୍କାର ମିଳିଥିଲା। ୨୦୧୧ରେ ଟ୍ରେଣ୍ଟ ବ୍ରିଜଠାରେ ଇଂଲଣ୍ଡ ଓ ଭାରତ ମଧ୍ୟରେ ଖେଳାଯାଇଥିବା ଟେଷ୍ଟର ଦ୍ୱିତୀୟ ଇନିଂସରେ ଘରୋଇ ବ୍ୟାଟ୍ସମ୍ୟାନ ଇଆନ ବେଲ୍ ବିବାଦୀୟ ରନ୍ଆଉଟ୍ ଶିକାର ହୋଇଥିଲେ। କିନ୍ତୁ ଧୋନୀ ଟିମ୍ ଇଣ୍ଡିଆର ଆଉଟ୍ ଆବେଦନକୁ ପ୍ରତ୍ୟାହାର କରିନେଇଥିଲେ। ଘଟଣାଟି ଏଭଳି ଥିଲା କି, ଭାରତୀୟ ପେସର ଇଶାନ୍ତ ଶର୍ମାଙ୍କ ଓଭରର ଅନ୍ତିମ ବଲକୁ ଇଆନ ମୋର୍ଗାନ ମିଡ୍ଅନ ଅଞ୍ଚଳକୁ ଖେଳିଥିଲେ। ବଲକୁ ଫିଲ୍ଡର ବାଉଣ୍ଡରି ପୂର୍ବରୁ ରୋକି ଦେଇଥିଲେ। କିନ୍ତୁ ଏକଥା ଜଣା ନ ଥିଲା ବେଲ୍ଙ୍କୁ। ସେ କ୍ରିଜ୍ ବାହାରେ ବୁଲୁ ଥିବାବେଳେ ଫିଲ୍ଡର ପ୍ରବୀଣ କୁମାରଙ୍କ ଥ୍ରୋ ସଂଗ୍ରହ କରି ଧୋନୀ ରନ୍ଆଉଟ୍ କରିଥିଲେ। ଏହାକୁ ଅମ୍ପାୟର ମଧ୍ୟ ଆଉଟ୍ ଘୋଷଣା କରିଥିଲେ। ଏହାପରେ ମ୍ୟାଚ୍ର ଚା’ ପାନ ବିରତିବେଳେ ଇଂଲଣ୍ଡ ଦଳର ଅନୁରୋଧ କ୍ରମେ ଧୋନୀ ଭାରତୀୟ ଦଳର ଅପିଲକୁ ପ୍ରତ୍ୟାହାର କରିନେଇଥିଲେ। ଏହି ମ୍ୟାଚ୍ରେ ଭାରତୀୟ ଦଳ ୩୧୯ ରନ୍ରେ ପରାସ୍ତ ହୋଇଥିଲା। ବିଜୟୀ ଦଳ ପାଇଁ ବେଲ ୧୫୯ ରନ୍ର ଶତକୀୟ ଇନିଂସ ଖେଳିଥିଲେ।
