କୋର୍ଟକୁ ଯାଇପାରନ୍ତି ୭ ଆଇ-ଲିଗ୍‌ କ୍ଲବ
7:12 amJune 25, 2019 / 21

ନୂଆଦିଲ୍ଲୀ, ୨୫ା୬ (ପି.ଟି.)-ସର୍ବଭାରତୀୟ ଫୁଟ୍‌ବଲ ମହାସଂଘ (ଏଆଇଏଫ୍‌ଏଫ୍‌) ଯଦି ଇଣ୍ଡିଆନ ସୁପର ଲିଗ୍‌ (ଆଏସ୍‌ଏଲ୍‌)କୁ ବିଧିବଦ୍ଧ ଦେଶର ଟପ୍‌ ଲିଗ୍‌ ଘୋଷଣା କରେ ତେବେ ୭ଟି ଆଇ-ଲିଗ୍‌ କ୍ଲବ ମିଳିତ ଭାବେ କୋର୍ଟଙ୍କ ଦ୍ୱାରସ୍ଥ ହେବେ। ଏହି କ୍ଲବଗୁଡ଼ିକ ହେଲା ମୋହନ ବାଗାନ, ଇଷ୍ଟବେଙ୍ଗଲ, ଚର୍ଚ୍ଚିଲ ବ୍ରଦର୍ସ, ମିନର୍ଭା ପଞ୍ଜାବ ଏଫ୍‌ସି, ଆଇଜଲ ଏଫ୍‌ସି, ନେରୋକା ଏବଂ ଗୋକୁଳମ କେରଳ ଏଫ୍‌ସି। ସେମାନେ ସୋମବାର ନୂଆଦିଲ୍ଲୀରେ ଏକ ବୈଠକରେ ଏକାଠି ହୋଇଥିଲେ। ଏଆଇଏଫ୍‌ଏଫ୍‌ ସାଧାରଣ ସମ୍ପାଦକ କୁଶାଲ ଦାସ ସର୍ବସାଧାରଣରେ ଇଣ୍ଡିଆନ ସୁପର ଲିଗ୍‌କୁ ମୁଖ୍ୟ ଲିଗ୍‌ର ମାନ୍ୟତା ପ୍ରଦାନ କରିଛନ୍ତି। ଜୁଲାଇ ୩ରେ ଏଆଇଏଫ୍‌ଏଫ୍‌ କାର୍ଯ୍ୟନିର୍ବାହୀ କମିଟି ବୈଠକ ବସିବ। ଏଥିରେ ଆଇଏସ୍‌ଏଲ୍‌କୁ ଦେଶର ଟପ୍‌ ଲିଗ୍‌ ଘୋଷଣା କରାଯିବା ସମ୍ପର୍କରେ ନିଷ୍ପତ୍ତି ନିଆଯିବ। ଦାସ ହେଉଛନ୍ତି ଏଆଇଏଫ୍‌ଏଫ୍‌ର ସବୁଠାରୁ ପ୍ରଭାବଶାଳୀ ବ୍ୟକ୍ତି। ବୈଠକରେ କେବଳ ନାମକୁ ମାତ୍ର ଏହା ଅନୁମୋଦନ ଲାଭ କରିବ ବୋଲି ମିଡିଆ ରିପୋର୍ଟରେ ସୂଚନା ମିଳିଛି। ସୂଚନାଯୋଗ୍ୟ, ପାଉଣା ପ୍ରଦାନ କ୍ଷେତ୍ରରେ ଏଆଇଏଫ୍‌ଏଫ୍‌ ସେମାନଙ୍କ ପ୍ରତି ବୈମାତୃକ ମନୋଭାବ ଦେଖାଉଛି ଦର୍ଶାଇ ପ୍ରତିବାଦ ସ୍ବରୂପ ନିକଟରେ ୬ଟି ଆଇ-ଲିଗ୍‌ କ୍ଲବ ବିଦ୍ରୋହ କରି ସୁପର କପ୍‌ରୁ ଓହରିଯାଇଥିଲେ।
ଏଆଇଏଫ୍‌ଏଫ୍‌ ନିଷ୍ପତ୍ତିରେ ଆଇଏସଏଲ୍‌ର ପ୍ରମୋଟର ଆଇଏମ୍‌ଜି ରିଲାଏନ୍ସ ହସ୍ତକ୍ଷେପ କରୁଛି ବୋଲି ଯେଉଁ ଅଭିଯୋଗ ହୋଇଛି ଏଆଇଏଫ୍‌ଏଫ୍‌ ସାଧାରଣ ସମ୍ପାଦକ ଦାସ ତାହାର ଖଣ୍ଡନ କରିଛନ୍ତି। ଆଇଏମ୍‌ଜି ରିଲାଏନ୍ସ କମର୍ସିଆଲ ପାର୍ଟନର ହୋଇଥିବାରୁ ବିଶେଷ କରି ବ୍ୟବସାୟିକ କଥାବସ୍ତୁ ନେଇ ଫେଡେରେଶନ ସହିତ ଆଲୋଚନା କରିଥାଏ। ଏହି ସଂସ୍ଥା ଏଆଇଏଫ୍‌ଏଫ୍‌ର କୌଣସି କାର୍ଯ୍ୟରେ ହସ୍ତକ୍ଷେପ କରି ନ ଥାଏ ବୋଲି ସେ କହିଛନ୍ତି।