ରାୟପୁର,୧୨।୫: ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଅଜିତ୍ ଯୋଗୀ ଦୀର୍ଘ ୭୦ ଘଣ୍ଟା ଧରି କୋମାରେ ରହିଛନ୍ତି। ରାୟପୁରସ୍ଥିତ ଶ୍ରୀ ନାରାୟଣ ହସ୍ପିଟାଲରେ ତାଙ୍କ ଚିକିତ୍ସା ଜାରି ରହିଛି। ତାଙ୍କ ବ୍ରେନ୍କୁ ଆକ୍ଟିଭ୍ କରିବା ପାଇଁ ମ୍ୟୁଜିକ୍ ଥେରାପିର ସାହାରା ନିଆଯାଉଛି। ମଙ୍ଗଳବାର ବିଶ୍ୱ ନର୍ସିଂ ଦିବସ ଅବସରରେ ତାଙ୍କ ପାଇଁ ହସ୍ପିଟାଲର ନର୍ସମାନେ ପ୍ରାର୍ଥନା କରିଛନ୍ତି। ପୂର୍ବାହ୍ନ ୧୦ରେ ହସ୍ପିଟାଲ ପକ୍ଷରୁ ଅଜିତ୍ଙ୍କ ହେଲଥ୍ ବୁଲେଟିନ୍ ଜାରି କରାଯାଇଛି। ଏଥିରେ କୁହାଯାଇଛି ଯେ, ଅଜିତ୍ଙ୍କୁ ଭେଣ୍ଟିଲେଟରରେ ରଖାଯାଇଛି। ତାଙ୍କର ହାର୍ଟ ବିଟ୍, ୟୁରିନ୍ ଆଉଟ୍ପୁଟ୍ ଏବଂ ରକ୍ତଚାପକୁ ନିୟନ୍ତ୍ରିତ କରାଯାଇଛି। ତେବେ ନ୍ୟୁରୋଲୋଜିକାଲ୍ ସ୍ଥିତି ସ୍ବାଭାବିକ ହୋଇ ପାରିନାହିଁ। ଡାକ୍ତରଙ୍କ ପକ୍ଷରୁ ଉଦ୍ୟମ ଅବ୍ୟାହତ ରହିଥିବା ବୁଲେଟିନ୍ରେ କୁହାଯାଇଛି। ଇତିମଧ୍ୟରେ ରାଜ୍ୟପାଳ ଅନୁସୂୟା ୟୁଇକେ ଯୋଗୀଙ୍କୁ ଦେଖିବାକୁ ହସ୍ପିଟାଲରେ ପହଞ୍ଚିଛନ୍ତି। ସେହିପରି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଜିତ୍ଙ୍କ ପୁଅ ଅମିତ ଯୋଗୀଙ୍କ ସହିତ ଫୋନ୍ରେ କଥାବାର୍ତ୍ତା କରି ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି।
