ନୂଆଦିଲ୍ଲୀ,୧୬।୪(ପି.ଟି.): କରୋନା ଭାଇରସ ମହାମାରୀ ରୂପ ନେଇଥିବା ବେଳେ ସାରା ଦେଶରେ ଲକ୍ଡାଉନ୍ ଜାରି ରହିଛି। ଫଳରେ ଅନ୍ଲାଇନ କୋଚିଂ ପାଇଁ ଅଣ୍ଟା ଭିଡିଛନ୍ତି ଅଲ ଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ଓ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ)। ଆସନ୍ତା ସୋମବାରଠାରୁ ଏହି ଦୁଇ କ୍ରୀଡ଼ା ସଂସ୍ଥା ଅନ୍ଲାଇନ୍ କୋଚିଂ ଏଜୁକେଶନ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। ମେ ୨ ତାରିଖରେ ଏହି କୋଚିଂ ପ୍ରକ୍ରିୟା ଶେଷ ହେବ। ୧୩ ଦିନଧରି ଚାଲିବାକୁ ଥିବା ଏହି ରିଫ୍ରେଶିଂ କୋର୍ସରେ ସାଇ ଓ ଏଆଇଏଫ୍ଏଫ୍ର ଅନୁମୋଦିତ ୪୦୦- ୫୦୦ କୋଚ୍ ସାମିଲ ହେବେ। ଅନଲାଇନ୍ ମାଧ୍ୟମରେ ଏମାନେ ଏକାଠି ହେବେ। ଏହି କୋଚିଂ ପ୍ରକ୍ରିୟାରେ ବିଭିନ୍ନ ଗୁରୁତ୍ୱପୂର୍ଣ୍ଣ ବିଷୟ ସହ ଇଞ୍ଜୁରିରୁ କିପରି ଦୂରେଇ ରହିହେବ, ଭିଡିଓ ଆନାଲିସିସ୍ ନେଇ ଆଲୋଚନା ହେବ ବୋଲି କୁହାଯାଇଛି। ସାଇ ଓ ଏଆଇଏଫ୍ଏଫ୍ ଏକ ଅଭିନୟ ଉପାୟ ଅଲମ୍ବନ କରିଛନ୍ତି ଓ ଏହା ବେଶ୍ କାମରେ ଆସିବ ବୋଲି ପୂର୍ବତନ ଅନ୍ତର୍ଜାତୀୟ ଫୁଟବଲ ଖେଳାଳି ତଥା ଏଆଇଏଫ୍ଏଫ୍ କୋଚ୍ ସାଭିଓ ମେଡେଇରା କହିଛନ୍ତି।
ଏହି କୋଚିଂ ପ୍ରକ୍ରିୟାର ପ୍ରାରମ୍ଭିକ ପର୍ଯ୍ୟାୟ ତଥା ସେସନକୁ ନିହେଜ ମେଡେଇରା ସଂଯୋଜନା କରିବେ। ଏଆଇଏଫ୍ଏଫ୍ର ଏକାଧିକ ଇନ୍ଷ୍ଟ୍ରକ୍ଟରଙ୍କ ସମେତ ଭାରତୀୟ ଜାତୀୟ ଦଳ କୋଚ୍ ଆଇଗର ଷ୍ଟିମାନକ, ଏଆଇଏଫ୍ଏଫ୍ ଟେକ୍ନିକାଲ ଡାଇରେକ୍ଟର ଆଇଜାକ ଡୋରୁ ଓ ଅନ୍ୟମାନେ ବିଭିନ୍ନ ସେସନ୍ରେ ସାମିଲ ରହି ଶିକ୍ଷା ପ୍ରଦାନ କରିବେ। ଏହାପୂର୍ବରୁ ଏଆଇଏଫ୍ଏଫ୍ ମଧ୍ୟ ଏକ ଅନ୍ଲାଇନ କୋଚିଂ ସେମିନାର ମଧ୍ୟ ଆୟୋଜନ କରିଥିଲା। ଏହି ଅନ୍ଲାଇନ୍ କୋଚିଂ କୋର୍ସ କାମରେ ଆସିବ ବୋଲି ମେଡେଇରା କହିଛନ୍ତି। ରେଫରିମାନଙ୍କ ପାଇଁ ମଧ୍ୟ ଏଆଇଏଫ୍ଏଫ୍ ଏକ ଅନ୍ଲାଇନ୍ ଟିଉଟୋରିଆ କ୍ଲାସ୍ର ଆୟୋଜନ କରିଥିଲା। ଏହା ବ୍ୟତୀତ ୩ଟି ଅନ୍ଲାଇନ୍ ସେମିନାର ମଧ୍ୟ ଆୟୋଜନ ହୋଇଥିଲା।
