ଜୟପୁର,୫।୧: ରାଜସ୍ଥାନର କୋଟାରେ ଥିବା ଜେକେ ଲୋନ ହସ୍ପିଟାଲରେ ରବିବାର ସକାଳ ସୁଦ୍ଧା ଶିଶୁ ମୃତ୍ୟୁ ସଂଖ୍ୟା ୧୧୦ରେ ପହଞ୍ଚିଛି। ଶନିବାର ଏହି ଘଟଣାର ଯାଞ୍ଚ ପାଇଁ ଏକ କେନ୍ଦ୍ରୀୟ ଟିମ୍ କୋଟା ହସ୍ପିଟାଲରେ ପହଞ୍ଚିଥିବା ବେଳେ ପୁଣିଥରେ ରବିବାର ଶିଶୁ ମୃତ୍ୟୁ ଘଟଣା ସାମ୍ନାକୁ ଆସିବା ସମସ୍ତଙ୍କୁ ଚିନ୍ତାରେ ପକାଇ ଦେଇଛି। ଏହାର ପ୍ରକୃତ କାରଣ ଏପର୍ଯ୍ୟନ୍ତ ଜଣା ନ ପଡିଥିବା ବେଳେ ଅତ୍ୟଧିକ ଥଣ୍ଡା ଯୋଗୁ ଶିଶୁଙ୍କ ମୃତ୍ୟୁ ହେଉଥିବା କୁହାଯାଉଛି। ପୁଣି ହସ୍ପିଟାଲରେ ଆବଶ୍ୟକ ଚିକିତ୍ସା ଉପକରଣ ନ ଥିବା, ଅପରିଷ୍କାର ପରିବେଶ ପାଇଁ ମଧ୍ୟ ଶିଶୁ ମୃତ୍ୟୁ ସଂଖ୍ୟା ବଢୁଛି ବୋଲି ମଧ୍ୟ କୁହାଯାଉଛି। ହେଲେ ଏହା ପଛର ଅସଲ କାରଣ ଏପର୍ଯ୍ୟନ୍ତ ଜଣାପଡୁ ନାହିଁ। କେବଳ କୋଟା ନୁହେଁ ରାଜସ୍ଥାନର ଅନ୍ୟ କିଛି ହସ୍ପିଟାଲରେ ମଧ୍ୟ ଶିଶୁ ମୃତ୍ୟୁ ଘଟଣା ବଢୁଛି ବୋଲି ଆଲୋଚନା ହେଲାଣି।
