ଭୁବନେଶ୍ୱର,୨୦ା୭(ବ୍ୟୁରୋ): କେନ୍ଦ୍ରାପଡାରେ କାର୍ଯ୍ୟରତ ଜଣେ ଟିଭି ଖବରଦାତାଙ୍କୁ ଏସ୍ପି ନୀତି ଶେଖର ହାତ ଉଠାଇବା ସହ ଦୁର୍ବ୍ୟବହାର କରିଥିଲେ। ଏହି ଘଟଣାକୁ ନେଇ ରାଜ୍ୟବ୍ୟାପୀ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିବାବେଳେ ଶୁକ୍ରବାର ଓଡ଼ିଶା ବିକାଶ ପରିଷଦ ପକ୍ଷରୁ ରାଜ୍ୟ ମାନବାଧିକାର କମିଶନ(ଓଏଚଆରସି)ଙ୍କ ନିକଟରେ ଅଭିଯୋଗ ହୋଇଛିି। ସଂଗଠନ ସଭାପତି ସୁଶାନ୍ତ କୁମାର ପାଢ଼ୀ ଦେଇଥିବା ପିଟିଶନ୍ରେ ଉଲ୍ଲେଖ କରିଛନ୍ତି ଯେ, ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମରେ ଖବରଦାତା ଜଣକ ଖବର ସଂଗ୍ରହ ପାଇଁ ଯାଇଥିଲେ। ସେ କୌଣସି ବିଶୃଙ୍ଖଳା କରି ନ ଥିଲେ ମଧ୍ୟ ମୁଖ୍ୟମନ୍ତ୍ରୀଙ୍କୁ ସୁରକ୍ଷା ଦେବା ଆଳରେ ଏସ୍ପି ତାଙ୍କୁ ଦୁର୍ବ୍ୟବହାର କରିଥିଲେ। ଗୋଟିଏ ହାତରେ ଖବରଦାତାଙ୍କ ଶାର୍ଟ କାଲର ଭିଡି ଅନ୍ୟ ହାତ ମାରିବା ପାଇଁ ଉଠାଇବା ଏସ୍ପିଙ୍କ ଗୁଣ୍ଡାରାଜର ପ୍ରମାଣ କରୁଛି। ତେଣୁ ରାଜ୍ୟରେ ଚତୁର୍ଥସ୍ତମ୍ବ ଗଣମାଧ୍ୟମ ମଧ୍ୟ ସୁରକ୍ଷିତ ନାହିଁ। ଗଣତନ୍ତ୍ର ବଦଳରେ ପୋଲିସତନ୍ତ୍ର ଚାଲିଛି। ଏହାଦ୍ୱାରା ଖବରଦାତାଙ୍କ ମାନବିକ ଅଧିକାର ଉଲ୍ଲଂଘନ ହୋଇଛି। ତେଣୁ ଏସ୍ପିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଗୃହ ବିଭାଗର ମୁଖ୍ୟ ଶାସନ ସଚିବ,ପୋଲିସ ଡିଜି ଓ କେନ୍ଦ୍ରାପଡା ଜିଲାପାଳଙ୍କୁ ତଦନ୍ତ ନିର୍ଦ୍ଦେଶ ଦେବା ପାଇଁ କମିଶନରଙ୍କୁ ପାଢୀ ନିବେଦନ କରିଛନ୍ତି।
