କଟକ ଅଫିସ, ୨୧ା୯: କୁଆଖାଇ ନଦୀବନ୍ଧ ସଂଲଗ୍ନ ମଞ୍ଚେଶ୍ୱରଠାରୁ କାନପୁର ରାସ୍ତାର ଦକ୍ଷିଣ ପାର୍ଶ୍ୱକୁ ବେଆଇନ ଭାବେ ଜବରଦଖଲ କରାଯାଇଛି। ଏହାକୁ ବିରୋଧ କରି ଶୁକ୍ରବାର ହାଇକୋର୍ଟରେ ଜନସ୍ବାର୍ଥ ମାମଲା ଦାଏର ହୋଇଛି। ଆବେଦନକାରୀ ତଥା ଆଇନଜୀବୀ ଅନ୍ତର୍ଯାମୀ ସ୍ବାଇଁଙ୍କ ପକ୍ଷରୁ ଦାଖଲ ହୋଇଥିବା ଏହି ମାମଲାରେ ରାଜ୍ୟ ସରକାରଙ୍କ ଆଇନ ବିଭାଗ, ଖୋର୍ଦ୍ଧା ଜିଲାପାଳ, ପ୍ରାଚୀ ଡିଭିଜନର ଏକ୍ଜିକ୍ୟୁଟିଭ ଇଞ୍ଜିନିୟର, ରାସ୍ତା ଓ ଗୃହ ନିର୍ମାଣ ବିଭାଗ, ଭୁବନେଶ୍ୱର ଡିଭିଜନ-୪ର ଏକ୍ଜିକ୍ୟୁଟିଭ ଇଞ୍ଜିନିୟର, ରାଜ୍ୟ ଶିଳ୍ପ ବିଭାଗ ସଚିବ, ଭୁବନେଶ୍ୱର ଡିସିପି ଓ ତହସିଲଦାରଙ୍କୁ ପକ୍ଷଭୁକ୍ତ କରାଯାଇଛି। ଆବେଦନକାରୀ ପିଟିଶନରେ ଦର୍ଶାଇଛନ୍ତି, ଉକ୍ତ ସରକାରୀ ଜମିକୁ ବେଆଇନ ଭାବେ ଜବରଦଖଲ କରାଯିବା ସହ ଅନୁମତି ନ ଥାଇ ହଜାର ହଜାର ଗୃହ ନିର୍ମାଣ ହେଉଛି। ପ୍ରତିପକ୍ଷମାନଙ୍କ ନିକଟରେ ଲିଖିତ ଅଭିଯୋଗ ସତ୍ତ୍ବେ କାର୍ଯ୍ୟାନୁଷ୍ଠାନ ହେଉନି। ଅପରପକ୍ଷରେ ସେମାନଙ୍କୁ ଉଚ୍ଛେଦ ସହ ବର୍ଷାଦିନରେ ନଦୀବନ୍ଧ ପ୍ରତି ବିପଦ ଯେପରି ଦେଖା ନ ଦେବ ସେଥିପାଇଁ ସମ୍ପୃକ୍ତ ବିଭାଗକୁ ତାଗିଦ୍ କରିବା ପାଇଁ ଅଦାଲତକୁ ପ୍ରାର୍ଥନା କରାଯାଇଛି। ଏଥିସହ ବେଆଇନ ଭାବେ ସରକାରୀ ଜମିରେ ନିର୍ମାଣ ହେଉଥିବା ଅଟ୍ଟାଳିକାଗୁଡ଼ିକ ତୁରନ୍ତ ଭଙ୍ଗାଯିବା ଲାଗି ଜିଲା ପ୍ରଶାସନ, ସ୍ଥାନୀୟ ତହସିଲଦାର ଓ ପୋଲିସକୁ ନିର୍ଦ୍ଦେଶ ଦେବା ଲାଗି ଆବେଦନକାରୀ ପିଟିଶନରେ ଦର୍ଶାଇଛନ୍ତି।
