ମୁମ୍ବାଇ,୩।୬: ବଲିଉଡ୍ ଜଗତର ଭେଟେରାନ ଗାୟକ କିଶୋର କୁମାରଙ୍କ ପତ୍ନୀ ଓ ଅଭିନେତ୍ରୀ ରୁମା ଗୁହା ଠାକୁରତାଙ୍କ ସୋମବାର ଦେହାନ୍ତ ହୋଇଛି। କୋଲକାତା ସ୍ଥିତ ନିଜର ବାସଭବନ ବାଲିଗଙ୍ଗେ ପ୍ୟାଲେସରେ ତାଙ୍କର ନିଧନ ହୋଇଛି। ସୋମବାର ସନ୍ଧ୍ୟାରେ ତାଙ୍କର ଅନ୍ତିମ ସଂସ୍କାର କରାଯିବ ବୋଲି ଜଣାପଡ଼ିଛି। ଅପରପକ୍ଷରେ ରୁମାଙ୍କ ନିଧନରେ ପଶ୍ଚିମ ବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଶୋକ ପ୍ରକାଶ କରିଛନ୍ତି। ଫିଲ୍ମ ଜଗତରେ ଥିବା ତାଙ୍କର ଅବଦାନକୁ କେହି ଭୂଲିପାରିବେ ନାହିଁ ବୋଲି ମମତା ଟୁଇଟ କରି କହିଛନ୍ତି। ଏଥିସହ ତାଙ୍କର ପରିବାର ଲୋକଙ୍କୁ ମମତା ସମବେଦନା ଜଣାଇଛନ୍ତି। ୧୯୩୪ରେ କୋଲକାତାରେ ଜନ୍ମ ହୋଇଥିବା ରୁମା ୧୯୫୧ରେ ଅଭିନେତା ତଥା ଗାୟକ କିଶୋର କୁମାରଙ୍କୁ ବିବାହ କରିଥିଲେ। ହେଲେ ତାଙ୍କର ଏହି ସମ୍ପର୍କ ବହୁ ଦିନ ଧରି ଚାଲି ନ ଥିଲା। ବିବାହର ୬ ବର୍ଷ ପରେ ସେମାନଙ୍କର ଡିଭୋର୍ସ ହୋଇଯାଇଥିଲା। କିଶୋର ଓ ରୁମାଙ୍କ ଜଣେ ପୁତ୍ର ସନ୍ତାନ ଅଛନ୍ତି। ପୁଅ ଅମିତ କୁମାର ମଧ୍ୟ ଜଣେ ପପୁଲାର ଗାୟକ। ଏହାପରେ ରୁମା ୧୯୬୦ରେ ଅରୁପ ଗୁହା ଠାକୁରତାଙ୍କ ସହ ବିବାହ କରିଥିଲେ। ଏହି ବିବାହ ପରେ ସେମାନଙ୍କର ଗୋଟିଏ ଝିଅ ଥିବା ଜଣାପଡ଼ିଛି। ୧୯୪୪ରେ ଜ୍ୱାର ଭାଟା ଫିଲ୍ମରୁ ଡେବ୍ୟୁ କରିଥିଲେ ରୁମା। ଗଙ୍ଗା, ଅଭିଯାନ, ପଳାତକ, ଏଣ୍ଟୋନୀ, ଫିରଙ୍ଗୀ, ବାଳିକା ବଧୂରେ ତାଙ୍କର ଦମ୍ଦାର ଅଭିନୟ ଦେଖିବାକୁ ମିଳିଛି।
